ເຜີຍແຜ່ກົດໝາຍວ່າດ້ວຍກີລາ-ກາຍະກຳ

  ວັນທີ 27 ມັງກອນ ຜ່ານມາ ທີ່ຫ້ອງປະຊຸມສຳນັກງານປົກຄອງ ແຂວງບໍລິຄຳໄຊ ກົມກີລາລະດັບສູງກະຊວງສຶກສາທິການ ແລະກີລາໄດ້ຈັດກອງປະຊຸມເຜີຍແຜ່ກົດ ໝາຍວ່າດ້ວຍກີລາ-ກາຍະກຳ (ສະບັບປັບປຸງ) ປີ 2019 ໃຫ້ແກ່ 6 ແຂວງ ແລະ 1 ນະຄອນຫຼວງວຽງຈັນໃຫ້ກຽດເປັນປະທານໂດຍ ທ່ານ ຄຳແຫວນ ປັນຍານຸວົງ ຮອງເຈົ້າແຂວງບໍລິຄຳໄຊ, ທ່ານ ນາງ ຂັນທະລີ ສິຣິພົງພັນ ຮອງລັດຖະ ມົນຕີກະຊວງສຶກສາທິການ ແລະ ກີລາ, ທ່ານ ສົມພູ ພົງສາ ຮອງ ປະທານ ແລະເລຂາທິການຄະນະ ກຳມະການໂອແລມປິກແຫ່ງຊາດ,ມີບັນດາກົມ,ຂະແໜງສຶກສາທິການ ແລະກີລາ,ພະນັກງານ-ວິຊາການທີ່ມາຈາກແຂວງບໍລິຄຳໄຊ, ຄຳມ່ວນ, ໄຊສົມບູນ, ຊຽງຂວາງ, ວຽງຈັນ, ຫົວພັນແລະນະຄອນຫຼວງວຽງຈັນເຂົ້າຮ່ວມ.

  ທ່ານ ຄຳແຫວນ ປັນຍານຸວົງ ຮອງເຈົ້າແຂວງບໍລິຄຳໄຊກ່າວວ່າ: ກອງປະຊຸມດັ່ງກ່າວແມ່ນມີຄວາມໝາຍ ແລະມີຄວາມສຳຄັນຊຶ່ງຈະສ້າງເງື່ອນໄຂອຳນວຍຄວາມສະດວກທີ່ດີໃຫ້ກັບບັນດາອົງການຈັດຕັ້ງທັງພາກລັດ, ເອກະຊົນ, ສັງຄົມ ແລະພາກສ່ວນທີ່ກ່ຽວຂ້ອງຕ່າງໆເວົ້າລວມ, ເວົ້າສະເພາະແມ່ນຂະແໜງການສຶກສາ ແລະກີລາໄດ້ຮັບຮູ້ ແລະເຂົ້າໃຈກ່ຽວກັບບັນດາເນື້ອໃນທີ່ໄດ້ຮັບການປັບປຸງ ແລະອັນໃໝ່ໆ ທີ່ໄດ້ກຳນົດໄວ້ໃນກົດໝາຍສະບັບນີ້ເພື່ອໃຊ້ເປັນບ່ອນອີງໃນການຈັດຕັ້ງປະຕິບັດ, ການຄຸ້ມຄອງ, ການ ສົ່ງເສີມ ແລະ ການພັດທະນາວຽກງານກີລາ-ກາຍະກຳຂອງແຂວງບໍລິຄຳໄຊກໍ່ຄືການພັດທະນາກີລາຂອງບັນດາແຂວງ ແລະຂອງຊາດໂດຍສະເພາະການພັດທະນາຊັບພະ ຍາກອນມະນຸດດ້ານສຸຂະພາບໃຫ້ມີຄວາມແຂງແຮງທັງດ້ານຮ່າງກາຍ ແລະຈິດໃຈຍົກລະດັບການພັດທະນາໃຫ້ຍັບເຂົ້າໃກ້ມາດຕະຖານຂອງອະນຸພາກພື້ນ, ພາກພື້ນ ແລະສາກົນເທື່ອລະກ້າວ.

  ທ່ານ ນາງ ຂັນທະລີ ສິຣີພົງ ພັນຮອງລັດຖະມົນຕີກະຊວງສຶກສາທິການ ແລະກີລາກ່າວວ່າ: ກົດໝາຍວ່າດ້ວຍກີລາ-ກາຍະກຳສະບັບປັບປຸງປີ 2019 ແມ່ນການປັບປຸງຄັ້ງທີ 2 (ສະບັບທີ 3) ຊຶ່ງຄັ້ງທຳອິດແມ່ນໄດ້ຖືກສ້າງຂຶ້ນໃນປີ 2008 ແລະ ໃນປີ 2012 ໄດ້ຖືກປັບປຸງ (ປັບປຸງຄັ້ງທີ 1). ເຫດຜົນໃນການປັບປຸງຄັ້ງນີ້ຍ້ອນພັກ ແລະ ລັດຖະບານໄດ້ເຫັນເຖິງຄວາມສໍາຄັນຂອງວຽກງານກີລາ-ກາຍະກຳໂດຍສະເພາະແມ່ນການສົ່ງເສີມການພັດທະນາວຽກງານກີລາ-ກາຍະກຳເພື່ອໃຫ້ມີຄວາມກ້າວໜ້າ, ທັນສະໄໝແລະມີຄວາມຍືນຍົງໃນຕໍ່ໜ້າ.

แชร์