ສະພາການຄ້າ ລົງຊຸກຍູ້ຊາວກະສິກອນຜະລິດເປັນສິນຄ້າ

 ເມື່ອອາທິດຜ່ານມາທ່ານ ບຸນເລີດ ຫຼວງປະເສີດ ຮອງປະທານສະພາການຄ້າ ແລະອຸດສາຫະກຳແຫ່ງຊາດ, ທ່ານ ບຸນທ່ຽງ ລັດຕະນະວົງ ຮອງປະທານສະພາການຄ້າ ແລະອຸດສາຫະກຳນະຄອນຫຼວງວຽງຈັນ, ທ່ານ ໄຊຍະເພັດ ຈັນທິສອນ ປະທານສະພາການຄ້າ ແລະອຸດສາຫະກຳ ແຂວງບໍລິຄຳໄຊ, ຕາງໜ້າທະນາຄານລາວ-ຝຣັ່ງ, ຕາງໜ້າສະຖາບັນການເງິນຈຸລະພາກ ແລະຜູ້ຊ່ຽວຊານທີ່ປຶກສາດ້ານກະສິກຳພ້ອມດ້ວຍຄະນະໄດ້ລົງຊຸກຍູ້ຊາວກະສິກອນຢູ່ເມືອງປາກກະດິງ ແຂວງບໍລິຄຳໄຊ ປູກພືດ-ຜັກຂາຍເປັນສິນຄ້າຢູ່ພາຍໃນປະເທດ,ໂດຍແນໃສ່ເຮັດໃຫ້ປະເທດລາວປູກພືດ-ຜັກກຸ້ມຕົນເອງ,ປາສະຈາກສິນຄ້າພືດ-ຜັກທີ່ນຳເຂົ້າຈາກຕ່າງປະເທດເພື່ອຫຼີກລ່ຽງຄວາມສ່ຽງຕໍ່ການແຜ່ລະບາດຂອງພະຍາດໂຄວິດ-19.

  ການລົງເຄື່ອນໄຫວຄັ້ງນີ້ໄດ້ຮັບການຕ້ອນຮັບຈາກ ທ່ານ ດຳ ເພີນຈິດ ຫົວໜ້າຫ້ອງການກະສິກຳ ແລະປ່າໄມ້ເມືອງປາກກະດິງພ້ອມດ້ວຍຄະນະ ແລະຕາງໜ້າຊາວກະສິກອນແຕ່ລະເຂດທີ່ບ້ານຊອດພ້ອມທັງໄດ້ລາຍງານໃຫ້ຮູ້ວ່າ: ຢູ່ເມືອງປາກກະດິງມີເນື້ອທີ່ນາດຳ 7.060 ເຮັກຕາ, ນາຫວ່ານ 1.100 ເຮັກຕາ,ນາສັກ 70 ເຮັກຕາ, ໄຮ່ເຂົ້າ 20 ເຮັກຕາສະເລ່ຍສະມັດຕະພາບເຂົ້າ 3,34 ໂຕນຕໍ່ເຮັກຕາ ແລະຍັງມີເນື້ອທີ່ປູກພືດລະດູຝົນ ແລະ ລະດູແລ້ງ 2.679 ເຮັກຕາ, ທີ່ພົ້ນເດັ່ນແມ່ນສາລີຫວານ, ໝາກນັດ, ໝາກແຕງ, ໝາກໂມ, ມັນຕົ້ນ, ໝາກຫຸ່ງ, ໝາກອຶ, ໝາກໂຕ່ນ, ຜັກກະລໍ່າປີ, ໝາກເຜັດ, ໝາກເຂືອ ແລະພືດຜັກອື່ນໆອີກ.

ການລົງເຄື່ອນໄຫວຄັ້ງນີ້ຍັງໄດ້ສົນທະນາກັບຊາວກະສິກອນວ່າ: ຊາວກະສິກອນຍັງຂາດຕະຫຼາດຮັບຊື້ທີ່ແນ່ນອນ, ບາງເທື່ອປູກຫຼາຍກໍ່ບໍ່ມີບ່ອນຂາຍເຮັດໃຫ້ລາຄາຕົກ ຕໍ່າ ແລະ ຍັງຂາດທຶນໃນການທຳການຜະລິດ, ພ້ອມດຽວກັນນີ້ຊາວກະສິກອນຍັງໄດ້ສະເໜີວ່າຫາກມີຕະຫຼາດຮັບຊື້ທີ່ແນ່ນອນ ແລະ ມີແຫຼ່ງທືນໃຫ້ເຂົ້າເຖິງແມ່ນສາ ມາດເຮັດໄດ້ຫຼາຍເພາະວ່າປະຈຸບັນຍັງມີເນື້ອທີ່ທຳການຜະລິດຫຼາຍ ແລະຊາວກະສິກອນກໍ່ມີມູນເຊື້ອດຸໝັ່ນມາແຕ່ດຶກດຳບັນ ແລະພ້ອມທີ່ຈະລົງມືເຮັດ.

  ຜ່ານການສົນທະນາກັນເຫັນວ່າມີຄວາມເປັນໄປໄດ້ສູງສະນັ້ນໃນນາມຕາງໜ້າສະພາການຄ້າແຫ່ງຊາດ-ນະຄອນຫຼວງ ແລະແຂວງບໍລິຄຳໄຊ ຈຶ່ງໄດ້ສະເໜີໃຫ້ຈັດຕັ້ງກັນເປັນກຸ່ມທີ່ແນ່ນອນ, ສະເໜີຜ່ານພາກສ່ວນທີ່ກ່ຽວຂ້ອງຕາມຂັ້ນຕອນເພື່ອພ້ອມກັນຈັດຕັ້ງປະຕິບັດໃຫ້ເປັນຮູບປະທຳອັນແທ້ຈິງເພາະວ່າປະຈຸບັນຍັງມີຄວາມຕ້ອງ ການຕະຫຼາດພືດ-ຜັກ ເຂົ້າສູ່ຕະຫຼາດເປັນຈຳນວນຫຼາຍ.

แชร์