ຜົນສຳເລັດຂອງກອງປະຊຸມສາທາລະນະສຸກທົ່ວປະເທດ

   ກອງປະຊຸມສາທາລະນະສຸກທົ່ວປະເທດຄັ້ງທີ VIII ໄຂຂຶ້ນຢ່າງເປັນທາງການ ແລະໄດ້ດໍາເນີນເປັນເວລາ 2 ວັນ ແຕ່ວັນທີ 28 ຫາ 29 ມັງກອນ 2021 ທີ່ຫ້ອງປະຊຸມ CTC, ນະຄອນຫຼວງວຽງຈັນ, ໄດ້ປິດລົງດ້ວຍຜົນສໍາເລັດອັນຈົບງາມໃນຕອນບ່າຍວັນທີ 29 ມັງກອນນີ້ ໂດຍການເຂົ້າຮ່ວມຂອງທ່ານ ທອງລຸນ ສີສຸລິດ ນາຍົກລັດຖະມົນຕີ,ມີຄະນະລັດຖະມົນຕີກະຊວງສາທາລະນະສຸກ,ບັນດາທ່ານຮອງລັດຖະມົນຕີອ້ອມຂ້າງສູນກາງ,ຜູ້ຕາງໜ້າຄະນະກໍາມະທິການວັດທະນະທໍາ-ສັງຄົມສະພາແຫ່ງຊາດ, ຫ້ອງວ່າການສູນກາງພັກ, ຫ້ອງວ່າການສໍານັກງານນາຍົກລັດຖະມົນຕີ, ສູນກາງແນວລາວສ້າງຊາດ,ສູນກາງສະຫະພັນແມ່ຍິງລາວ, ສູນກາງສະຫະພັນກໍາມະບານ,ທ່ານຮອງເຈົ້າຄອງນະຄອນຫຼວງ,ຮອງເຈົ້າແຂວງຈາກທົ່ວປະເທດ,ຄະນະອະທິການບໍດີມະຫາວິທະຍາໄລວິທະຍາສາດສຸຂະພາບ, ຫ້ອງການ, ກົມ, ສະຖາ ບັນ, ໂຮງໝໍສູນກາງ,ສູນຕ່າງໆອ້ອມຂ້າງກະຊວງສາທາລະນະສຸກ, ພະແນກສາທາລະນະສຸກແຂວງ, ໂຮງໝໍແຂວງ, ວິທະຍາໄລວິທະຍາສາດສຸຂະພາບຈາກແຂວງ, ມີບັນດາອະດີດການນໍາ ແລະພະນັກງານອະວຸໂສບໍານານ, ວິລະຊົນແຫ່ງຊາດ, ຜູ້ຕາງໜ້າອົງການຈັດຕັ້ງສາກົນທັງໝົດ 285 ທ່ານ,.

 ທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກໄດ້ລາຍງານຜົນສໍາເລັດຂອງກອງປະຊຸມຄັ້ງນີ້ວ່າເປັນການເຜີຍແຜ່-ເຊື່ອມຊຶມການຈັດຕັ້ງປະຕິບັດວຽກ ງານສາທາລະນະສຸກ 5 ປີ ຄັ້ງ ທີ VIII (2016-2020), ການຈັດຕັ້ງປະຕິບັດວຽກງານສາທາລະນະສຸກປີ 2020 ບົນຈິດໃຈດັ່ງກ່າວກອງປະຊຸມໄດ້ຜ່ານແຜນ ການ 5 ປີ ຄັ້ງທີ IX (2021-2025) ແລະແຜນການສາທາລະນະສຸກ ປີ 2021, ເຜີຍແຜ່-ເຊື່ອມຊຶມການຈັດຕັ້ງປະຕິບັດຍຸດທະສາດປະຕິຮູບສາທາລະນະສຸກ ໄລຍະທີ II (2016-2020) ແລະແຜນຍຸດທະສາດປະຕິຮູບສາທາລະນະສຸກ ໄລຍະທີ III (2021-2025); ຕີລາຄາສະພາບ ແລະຄວບຄຸມການລະບາດຂອງພະຍາດ Covid-19 ປີ2020 ແລະແຜນດຳເນີນງານໃນຕໍ່ໜ້າ;.

 ກອງປະຊຸມໄດ້ຄົ້ນຄວ້າ ແລະປະກອບຄວາມຄິດຄວາມເຫັນຢ່າງກົງໄປກົງມາເພື່ອຊອກໃຫ້ເຫັນໄດ້ດ້ານດີ, ຂໍ້ຄົງຄ້າງ,ສິ່ງທ້າທາຍ ແລະສາຍເຫດຕໍ່ການຈັດຕັ້ງປະຕິບັດວຽກງານໃນໄລຍະ 5 ປີຜ່ານມາF ໄດ້ເປັນເອກະພາບໃນການຜັນຂະຫຍາຍມະຕິກອງປະຊຸມໃຫ່ຍຄັ້ງທີ IX ຂອງອົງຄະນະພັກກະຊວງສາທາລະນະສຸກ, ມະຕິ 03/ກມສພ ຂອງກົມການເມືອງວ່າດ້ວຍວຽກງານສາມສ້າງ ແລະ ມະຕິຂອງສະພາແຫ່ງຊາດສະບັບເລກທີ 103/ສພຊ ວ່າດ້ວຍການຮັບຮອງເອົາການຊີ້ແຈງຂອງລັດຖະ ບານກ່ຽວກັບການປັບປຸງຄຸນນະພາບການບໍລິການການປິ່ນປົວຢູ່ໂຮງໝໍ, ສຸກສາລາ ແລະມະຕິຂອງສະພາແຫ່ງຊາດສະບັບເລກ ທີ 099/ ສພຊ ວ່າດ້ວຍການຮັບຮອງ ເອົາ 11 ຕົວຊີວັດທີ່ມອບໃຫ້ກະຊວງສາທາລະນະສຸກເຂົ້າໃນແຜນພັດທະນາສາທາລະນະສຸກ 5 ປີຄັ້ງທີ IX (2021-2025) ແລະ ປະຈໍາປີ 2021 ໃຫ້ເປັນຮູບປະທຳ,ໃນນັ້ນໄດ້ຮັບຮອງເອົາບົດສະຫຼຸບການຈັດຕັ້ງປະຕິບັດຍຸດທະສາດປະຕິຮູບສາທາລະນະສຸກໄລຍະທີ II (2016-2020) ແລະແຜນຍຸດທະສາດປະຕິຮູບສາທາ ລະນະສຸກໄລຍະທີ III (2021-2025); ຮັບຮອງເອົາບົດສະຫຼຸບການຈັດຕັ້ງປະຕິບັດວຽກງານສາທາລະນະສຸກ 5 ປີ ຄັ້ງທີ VIII (2016- 2020) ແລະວຽກ ງານປະຈໍາປີ 2020, ຮັບຮອງເອົາແຜນພັດທະນາສາທາລະນະສຸກ 5 ປີຄັ້ງທີ IX (2021-2025) ແລະແຜນປະຈໍາປີ 2021.

   ກອງປະຊຸມສາທາລະນະສຸກທົ່ວປະເທດ 5 ປີຄັ້ງທີ VIII ຍັງໄດ້ສະເໜີໃຫ້ມີວິທີການຄຸ້ມຄອງແຜນການ ແລະ ການເງິນໄປຕາມສາຍຕັ້ງຕາມມະຕິສະພາແຫ່ງຊາດ 2018 ຜ່ານມາ, ພ້ອມທັງສະເໜີໃຫ້ຫັນກອງທຶນປະກັນສຸຂະພາບໃຫ້ກາຍເປັນກອງທຶນທີ່ສົມບູນແບບບໍ່ໃຫ້ນອນຢູ່ໃນງົບປະມານຈັດສັນຂອງກະຊວງສາທາລະນະສຸກ ໂດຍອີງໃສ່ດໍາລັດເລກທີ 470 ຂອງນາຍົກລັດຖະມົນຕີ ແລະສະເໜີໃຫ້ເພີ່ມງົບປະມານໃຫ້ຂະແໜງສາທາລະນະສຸກປະມານ 4.800 ຕື້ກີບຕໍ່ປີຕື່ມອີກ.

 ຈາກນັ້ນ, ທ່ານທອງລຸນ ສີສຸລິດ ນາຍົກລັດຖະມົນຕີໃຫ້ກຽດໂອ້ລົມ ແລະໃຫ້ທິດຊີ້ນໍາຕໍ່ກອງປະຊຸມເພື່ອໃຫ້ຜູ້ແທນກອງປະຊຸມນໍາໄປຈັດຕັ້ງຜັນຂະຫຍາຍເຂົ້າໃນວຽກ ງານຕົວຈິງໃຫ້ມີຜົນສໍາເລັດໃນຕໍ່ໜ້າ.

ໂດຍ: ເຂີຍຫລ້າ

ຮູບພາບ: ໜັງສືພິມເສດຖະກິດ-ສັງຄົມ

แชร์