ທຄຕລ ອຸດົມໄຊ ຮັບໃຊ້ປະຊາຊົນດ້ວຍໃຈຈິງ

  ທະນາຄານການຄ້າຕ່າງປະເທດລາວ ມະຫາຊົນ (ທຄຕລ) ສາຂາອຸດົມໄຊ ສາມາດດຳເນີນທຸລະກຳການເງິນດ້ວຍດີສະເໝີມາໂດຍສະເພາະໄດ້ປະຕິບັດແຜນຍຸດທະ ສາດປະຈໍາປີຂອງ ທຄຕລ ສຳນັກງານກໍ່ຄືສາຂາໃຫ້ບັນລຸຕາມແຜນການໂດຍໄດ້ບໍລິການລູກຄ້າດ້ວຍໃຈ,ຮັກສາຖານລູກຄ້າເກົ່າ ແລະຂະຫຍາຍຖານລູກຄ້າໃໝ່,ສິ່ງສຳຄັນຄະນະສາຂາໄດ້ສຶກສາອົບຮົມການເມືອງ-ແນວຄິດ ໃຫ້ພະນັກງານມີຄວາມເຊື່ອໝັ້ນຕໍ່ການນໍາພາຂອງພັກ-ລັດ; ຕີຖອຍປາກົດການຫຍໍ້ທໍ້ ແລະ ມີຄວາມສາມັກຄີທັງ ພາຍໃນ ແລະພາຍນອກໃຫ້ແໜ້ນແຟ້ນເຮັດໃຫ້ການຈັດຕັ້ງປະຕິບັດວຽກງານພາຍໃນສາຂາມີຜົນສໍາເລັດເປັນກ້າວໆ.

  ທ່ານ ນາງ ຈັນສະໄໝ ສຸລິຍະປັນຍາ ຮອງຫົວໜ້າ ທຄຕລ ສາຂາອຸດົມໄຊໄດ້ແຈ້ງໃຫ້ຮູ້ວ່າ: ໃນປີ 2020 ດ້ານຊັບສິນ-ໜີ້ສິນປະຕິບັດໄດ້ 825 ຕື້ກີບ,ທຽບໃສ່ແຜນປີ 2020 ປະຕິບັດໄດ້ 116%, ທຽບໃສ່ 2019 ປະຕິບັດໄດ້  130%; ດ້ານເງິນຝາກປະຕິບັດໄດ້ 827 ຕື້ກີບ, ທຽບໃສ່ແຜນປີ 2020 ປະຕິບັດໄດ້ 118%, ທຽບໃສ່ 2019 ປະຕິບັດໄດ້ 131%; ດ້ານເງິນກູ້ປະຕິບັດ ໄດ້ 117 ຕື້ກີບ, ທຽບໃສ່ແຜນປີ 2020 ປະຕິບັດໄດ້ 88%, ທຽບໃສ່ 2019 ປະຕິບັດໄດ້ 109%.

  ບັນຫາພົ້ນເດັ່ນໃນປີ 2020; ທຄຕລ ສາຂາອຸດົມໄຊໄດ້ເອົາໃຈໃສ່ບໍລິການເບີກຈ່າຍເງິນຊົດເຊີຍໃຫ້ກັບປະຊາຊົນທີ່ຖຶກຜົນກະທົບຈາກໂຄງການກໍ່ສ້າງທາງລົດໄຟໃນປີ 2020 ຕາມແນວທາງຂອງພັກ ແລະ ລັດຖະບານຊຶ່ງໄດ້ເບິກຈ່າຍເປັນງວດ 4 ຈໍານວນ 370 ຄອບຄົວ,ມູນຄ່າ59,96 ຕື້ກີບໄດ້ສໍາເລັດ;ເອົາໃຈໃສ່ບໍລິການເບີກຈ່າຍ ເງິນໂພສະນາການຂອງໂຄງການອາຫານໂລກ WFP  ໃຫ້ປະຊາຊົນຢູ່ເມືອງຫຼາ ແລະເມືອງນາໝໍ້ 221 ຄົນ; ເອົາໃຈໃສ່ເກັບລາຍຮັບຄ່າທໍານຽມທາງ ແລະພາສີທີ່ດິນໂດຍສົມທົບກັບອາກອນປະຈໍາແຂວງ, ອາກອນປະຈໍາຢູ່ແຕ່ລະເມືອງ ແລະຕົວແທນ BCOME ລົງສ້າງຂະບວນການເກັບລາຍຮັບປະຈໍາປີ 2020 ຈໍານວນ16 ຄັ້ງ, ເທສະບານເມືອງໄຊ 3 ຄັ້ງ, ເມືອງຫຼາ 1 ຄັ້ງ,ເມືອງຮຸນ 3 ຄັ້ງ,ນາໝໍ້ 2  ຄັ້ງ, ເມືອງປາກແບງ 6 ແລະເມືອງງາ 1 ຄັ້ງ, ປະຈຸບັນໄດ້ຂະຫຍາຍຕົວແທນ BCOME ຄົບທຸກເມືອງ, ຊຶ່ງຕົວແທນດັ່ງກ່າວສາມາດຮັບຊໍາລະຄ່າທໍານຽມທາງ, ພາສີທີ່ດິນໄດ້, ນອກຈາກນີ້ຕົວແທນ BCOME ຍັງສາມາດບໍລິການໂອນເງິນ, ຝາກເງິນ ແລະຖອນເງິນຈາກບັນຊີ ທຄຕລ ໄດ້ຊຶ່ງສາມາດອໍານວຍຄວາມສະດວກໃຫ້ກັບພໍ່ແມ່ປະຊາຊົນທີ່ຢູ່ຫ່າງໄກຈາກສາຂາ ແລະໜ່ວຍບໍລິການຂອງ ທຄຕລ.

  ສຳລັບວຽກງານປ້ອງກັນພະຍາດໂຄວີດ-19; ກໍ່ໄດ້ເອົາໃຈໃສໃນການຈັດຕັ້ງປະຕິບັດຕາມມາດຕະການ ແລະແຈ້ງການຂອງລັດຖະບານວາງອອກຢ່າງເຂັ້ມງວດໂດຍສະເພາະການປ້ອງກັນລູກຄ້າ ແລະພະນັກງານຢູ່ສາຂາ ແລະໜ່ວຍບໍລິການໂດຍມີການວັດແທກອຸນນະພູມກ່ອນເຂົ້າຫ້ອງການ, ຕັ້ງຈຸດລ້າງມືດ້ວຍນໍ້າສະອາດໃສ່ສະບູ ແລະລ້າງມີດ້ວຍເຈວແອວກໍຮໍ, ເຮັດປ້າຍບອກແນະນໍາລູກຄ້າໃຫ້ລ້າງມື ແລະສວມໃສ່ຜ້າອັດປາກ ກ່ອນເຂົ້າຫ້ອງການ, ນອກຈາກນີ້ ຍັງແນະນໍາແມ່ບ້ານອານາໄມທໍາຄວາມສະອາດຢ່າງສະໝໍ່າສະເໝີ, ເພື່ອສຸຂະພາບທີ່ດີ ແລະເພື່ອປ້ອງກັນພະຍາດລະບາດດັ່ງກ່າວທ່ານຮອງຫົວໜ້າ ທຄຕລ ສາຂາອຸດົມໄຊໄດ້ແຈ້ງໃຫ້ຮູ້ວ່າ: ທິດທາງແຜນການຈັດຕັ້ງປະຕິບັດໃນປີ 2021 ຍັງຈະສືບຕໍ່ການຂະຫຍາຍສິນເຊື່ອໃຫ້ບັນລຸຕາມແຜນການທີ່ຂຶ້ນໄວ້ ແລະ ເຂົ້າເຖິງບັນດາຫົວໜ່ວວຍທຸລະກິດ SMEs ຫຼືກຸ່ມລູກຄ້າເປົ້າໝາຍທີ່ເປັນລູກຄ້າລາຍໃຫຍ່; ສືບຕໍ່ຕິດຕາມ ແລະ ທົບທວນເຈລະຈາກັບລູກຄ້າໃນການແກ້ໄຂໜີ້ສິນຮ່ວມກັນຕາມລະບຽບ, ນະໂຍບາຍ ແລະ ຂັ້ນຕອນຂອງວຽກງານສິນເຊື່ອ; ປະຕິບັດຕາມລະບຽບ ແລະຍຸດທະສາດໃນການແກ້ໄຂໜີ້ສິນຕາມລະບຽບກົດໝາຍ; ສືບຕໍ່ລະດົມທຶນຈາກທຸກພາກສ່ວນທີ່ເຫັນວ່າມີຄວາມເປັນໄປໄດ້ໂດຍສະເພາະແມ່ນບັນດາໂຄງການ, ບໍລິສັດໃຫ່ຍກໍ່ຄືບັນດາຫ້າງຮ້ານ ແລະບັນດາພະແນກການຕ່າງໆ ສືບຕໍ່ໂຄສະນາຂາຍຜະລິດຕະພັນບັດ Visa Credit and Visa Debit,BCEL One ATM ແລະBCE LONE PAY ໃຫ້ບັນດາພະນັກງານ-ລັດຖະກອນ ແລະ ບັນດາຫ້າງຮ້ານ, ຕ່າງໆນໍາຜູ້ທີ່ມີເງື່ອນໄຂເພື່ອນໍາໃຊ້ຜະລິດຕະພັນຂອງ ທຄຕລ ໃຫ້ນັບມື້ນັບຫຼາຍຂຶ້ນດສືບຕໍ່ລົງໂຄສະນາ ແລະຊອກຫາລູກຄ້າຕົວແທນ Bcome ນໍາບັນດາເມືອງທີ່ເຫັນວ່າມີຄວາມເໝາະສົມ ແລະສືບ ຕໍ່ລົງທົບທວນບັນດາໂຄງການ Bill Payment ການຊໍາລະຄ່າໄຟ້າ ແລະຊໍາລະຄ່ານໍ້າປະປາເພື່ອຖອດຖອນບົດຮຽນນໍາເຈົ້າຂອງໂຄງການ.

-------------

ຂ່າວ: ຣັດສະໝີ ດວງສັດຈະ

ຮູບພາບ: ໜັງສືພິມເສດຖະກິດ-ສັງຄົມ

แชร์