ລູກຄ້າທະນາຄານ 4 ແຂວງພາກເໜືອຮັບຜົນກະທົບຈາກໂຄວິດ 30 ຕື້ກີບ

  ທ່ານ ພອນສະຫວັນ ຄຳພາວົງ ຮອງຫົວໜ້າສາຂາທະນາຄານແຫ່ງ ສປປ ລາວ (ທຫລ) ພາກເໜືອ ແຂວງອຸດົມໄຊ ໄດ້ແຈ້ງຕໍ່ຜູ້ສື່ຂ່າວ ທຫລ ວ່າ: ສາຂາ ທຫລ ພວກເຮົາໄດ້ຄຸ້ມຄອງມະຫາພາກດ້ານເງິນຕາ-ສິນເຊື່ອໃນຂອບເຂດແຂວງອຸດົມໄຊ,ບໍ່ແກ້ວ, ຫຼວງນໍ້າ ທາ ແລະແຂວງຜົ້ງສາລີໂດຍສະເພາະຄຸ້ມຄອງ,ຕິດຕາມ-ກວດກາບັນດາສາຂາ ແລະໜ່ວຍບໍລິການທະນາຄານທຸລະກິດລັດ-ເອກະຊົນ ແລະສະເພາະກິດມີທັງໝົດ 19 ສາຂາ ແລະ 11 ໜ່ວຍບໍລິການທະນາຄານຕ່າງປະເທດ-ເອກະ ຊົນ.

  ການເຄື່ອນໄຫວຂອງທະນາຄານທຸລະກິດໃນ 4 ແຂວງມາຮອດເດືອນພະຈິກ 2020 ມີຍອດເຫຼືອຊັບສິນທັງໝົດ6.862,50 ຕື້ກີບເພີ່ມຂຶ້ນ 16,63% ທຽບໃສ່ທ້າຍປີ 2019; ມີຍອດເຫຼືອສິນເຊື່ອທັງໝົດ 2.449,04 ຕື້ກີບ ຫຼຸດລົງ 4,62% ເມື່ອທຽບໃສ່ທ້າຍປີ 2019. ມີຍອດເຫຼືອເງິນຝາກທັງໝົດ 6.246,12 ຕື້ກີບກວມ 88,17% ຂອງໜີ້ສິນທັງໝົດ; ໃນໄລຍະດັ່ງກ່າວ, ຍັງຮັບຜົນກະທົບຈາກການແຜ່ລະບາດພະຍາດໂຄວິດ-19 ໃນຂົງເຂດ 4 ແຂວງພາກເໜືອຕອນເທິງ ໂດຍສະເພາະລູກຄ້າຂອງທະນາຄານທຸລະກິດໄດ້ຮັບຜົນກະທົບໂດຍທາງກົງ ແລະທາງອ້ອມ.

  ມາຮອດທ້າຍເດືອນພະຈິກ 2020 ໃນຂົງເຂດ 4 ແຂວງພາກເໜືອມີລູກຄ້າສິນເຊື່ອທີ່ໄດ້ຮັບຜົນກະທົບຈາກການແຜ່ລະບາດຂອງພະຍາດດັ່ງກ່າວ 120 ລາຍລວມມູນຄ່າ 29,96 ຕື້ກີບ; ໃນນີ້ຂະແໜງກໍ່ສ້າງ 2 ລາຍກວມເອົາ 10,43%, ຂະແໜງປະກອບວັດຖຸ-ເຕັກນິກ 10 ລາຍກວມເອົາ 6,83%, ຂະແໜງກະສິກຳ-ປ່າໄມ້ 94 ລາຍ ກວມເອົາ 70,43%, ຂະແໜງການຄ້າ 10 ລາຍ ກວມເອົາ 6,76%, ຂະແໜງຂົນສົ່ງ-ໄປສະນີ 1 ລາຍກວມເອົາ 1,34% ແລະຂະແໜງບໍ ລິການ 3 ລາຍ ກວມເອົາ 4,20% ຂອງສິນເຊື່ອທີ່ໄດ້ຮັບຜົນກະທົບທັງໝົດ.

   ຕໍ່ບັນຫາດັ່ງກ່າວນີ້; ທ່ານຮອງຫົວໜ້າສາຂາ ທຫລ ພາກເໜືອ ແຂວງອຸດົມໄຊ ໄດ້ແຈ້ງໃຫ້ເຫັນເຖິງການຈັດຕັ້ງປະຕິບັດນະໂຍບາຍສິນເຊື່ອຕໍ່ລູກຄ້າໂດຍໃຫ້ທະນາ ຄານທຸລະກິດປະຕິບັດນະໂຍບາຍ ຫຼືປະຕິບັດການເລື່ອນກໍາ ນົດເວລາຊໍາລະຕົ້ນທຶນ ແລະດອກເບ້ຍໃຫ້ກັບລູກຄ້າ119 ລາຍ, ລວມມູນຄ່າ 30,52 ຕື້ກີບ;ການປັບຫຼຸດອັດຕາດອກເບ້ຍ, ຄ່າທໍານຽມໃຫ້ກັບລູກຄ້າ 6 ລາຍ, ລວມມູນຄ່າ 16,68 ຕື້ກີບ; ຍົກເວັ້ນຄ່າປັບໄໝລູກຄ້າທີ່ຄ້າງຊໍາລະໃຫ້ກັບລູກຄ້າ 20 ລາຍ, ລວມມູນຄ່າ 256 ລ້ານກີບ; ການປ່ອຍເງິນກູ້ບ້ວງໃໝ່ຜູ້ທີ່ໄດ້ຮັບຜົນກະທົບຈາດການລະບາດພະຍາດໃຫ້ກັບລູກຄ້າ 1 ລາຍ, ລວມມູນຄ່າ 500 ລ້ານກີບ.

 ໃນຜ່ານມາສາມາດສະຫຼຸບໄດ້ດ້ານດີ, ຂໍ້ສະດວກ ແລະຂໍ້ຫຍຸ້ງຍາກບາງດ້ານຕໍ່ກັບຜົນກະທົບຈາກການແຜ່ລະບາດຂອງພະຍາດ Covid-19 ສະເພາະຂໍ້ສະດວກຍ້ອນມີແນວທາງນະໂຍບາຍ, ມາດຕະການ ແລະວິທີໃນການຊ່ວຍຜ່ອນຜັນຕໍ່ກັບບັນດາປັດໄຈທີ່ໄດ້ຜົນກະທົບຈາກການແຜ່ລະບາດຂອງພະຍາດ Covid-19 ຈາກພັກ-ລັດກໍ່ຄື ທຫລ ວາງອອກແຕ່ລະໄລຍະເປັນຕົ້ນແມ່ນນະໂຍບາຍສິນເຊື່ອ ແລະໂຄງການສິນເຊື່ອເພື່ອຊຸກຍູ້ການຜະລິດ ແລະ ເພື່ອແກ້ໄຂຜົນກະທົບຈາກການແຜ່ລະບາດຂອງພະຍາດ Covid-19; ພ້ອມນັ້ນ, ທະນາຄານທຸລະກິດໄດ້ຮັບຄວາມເອົາໃຈໃສ່ໃນການຊີ້ນໍາໆພາຢ່າງໃກ້ສິດຈາກຄະນະອໍານວຍການກໍ່ຄືຄະນະສາຂາ; ນອກນີ້ກໍ່ຍ້ອນມີ ນະໂຍບາຍ, ແຈ້ງການ ແລະບົດແນະນໍາທີ່ກໍານົດໂດຍສໍານັກງານໃຫຍ່ຂອງທະນາຄານທຸລະກິດເຮັດໃຫ້ບັນດາສາຂາ ແລະໜ່ວຍບໍລິການໃນຂອບເຂດ 4 ແຂວງພາກເໜືອສາມາດນໍາມາຈັດຕັ້ງປະຕິບັດໄດ້ທັນກັບສະພາບ ແລະມີຄວາມສອດຄ່ອງ, ຮັດກຸມ,ເຂັ້ມງວດ;ຍ້ອນພະນັກງານຢູ່ບັນດາສາຂາ ແລະໜ່ວຍບໍລິການຂອງທະນາຄານທຸລະກິດໄດ້ເອົາໃຈໃສ່ ແລະ ໃຫ້ຄວາມສຳຄັນໃນການຕິດຕາມ, ກວດກາ, ທົບທວນ ແລະ ເກັບກໍາຂໍ້ມູນເພື່ອສະຫຼຸບສັງລວມລາຍງານຍັງສໍານັກງານໃຫ້ຕົນ ແລະ ສາຂາ ທຫລ ພາກເໜືອ ແຂວງອຸດົມໄຊ ຮັບຊາບຢ່າງເປັນປົກກະຕິ.

  ໃນຂະນະດຽວກັນນັ້ນ; ກໍ່ຍັງມີຂໍ້ຫຍຸ້ງຍາກເວົ້າສະເພາະໃນໄລຍະການສັງໂຈະຊົ່ວຄາວກ່ຽວກັບການເດີນທາງລະຫວ່າງທ້ອງຖິ່ນກໍ່ຄືບ້ານ,ເມືອງ,ບາງແຂວງ ແລະຕ່າງປະເທດຊຶ່ງໄດ້ສົ່ງຜົນເຮັດໃຫ້ການລົງຕິດຕາມ, ກວດກາ, ທົບທວນຢ່າງເປັນປົກກະຕິ-ຕໍ່ເນື່ອງຂອງທະນາຄານທຸລະກິດບໍ່ໄດ້ປະຕິບັດຢ່າງເປັນປົກກະຕິ-ຕໍ່ເນື່ອງ, ພ້ອມນີ້ຍັງສົ່ງຜົນເຮັດໃຫ້ການຂົນສົ່ງສິນຄ້າຖືກຢຸດສະງັກເປັນບາງໄລຍະ-ຊົ່ວຄາວ; ລູກຄ້າບາງລາຍທີ່ສະເໜີຂໍການປະຕິບັດນະໂຍບາຍຈາກທະນາຄານທຸລະກິດບາງສາຂາຈໍານວນໜຶ່ງແມ່ນມີເງື່ອນໄຂຍັງບໍ່ທັນຄົບຖ້ວນ ຫຼືພຽງພໍ ແລະບາງລາຍລູກຄ້າທຸລະກິດບໍ່ມີຕົວຕົນ;ການເຄື່ອນໄຫວສີນເຊື່ອໃນປະຈຸບັນກໍ່ພົບບັນຫາຫຼາຍໃນການຊໍາລະຕົ້ນທຶນ ແລະດອກເບ້ຍເນື່ອງຈາກກິດຈະການຫຼາຍຢ່າງໄດ້ຮັບຜົນກະທົບເປັນຕົ້ນ: ບ້ານພັກ, ໂຮງແຮມ, ຮ້ານອາຫານ ແລະຮ້ານກິນດື່ມໄດ້ສັ່ງໂຈະຊົ່ວຄາວເປັນບາງໄລຍະເຮັດໃຫ້ລູກຄ້າບາງລາຍບໍ່ມີລາຍຮັບຈາກກິດຈະການຕ່າງໆ ເພື່ອມາຊໍາລະໜີ້ສິນຄືນໃຫ້ທະນາຄານ.

-----------

ຂ່າວ: ຣັດສະໝີ ດວງສັດຈະ

 

ຮູບພາບ: ໜັງສືພິມເສດຖະກິດ-ສັງຄົມ

แชร์