ປີແລ້ວລາວສ້າງແຮງງານມີສີມື 21 ພັນກວ່າຄົນ

   ລະຫວ່າງວັນທີ 26-27 ມັງກອນ ຜ່ານມາ ທີ່ເຮືອນຮັບແຂກກະຊວງ ຮສສ, ນະຄອນຫຼວງວຽງຈັນ ໂດຍພາຍໃຕ້ການເປັນປະທານຂອງທ່ານ ຄຳແພງ ໄຊສົມແພງ ກຳມະການສູນກາງພັກລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ), ມີບັນດາທ່ານຮອງລັດຖະມົນຕີກະຊວງ ຮສສ, ບັນດາຫົວໜ້າກົມ, ຮອງກົມ, ຫົວໜ່ວຍວິຊາການ, ຫົວໜ້າພະແນກແຮງງານ ແລະສະຫວັດດີການສັງຄົມແຂວງ-ນະຄອນຫຼວງ, ຜູ້ຕາງໜ້າຂະແໜງການຕ່າງໆທີ່ກ່ຽວຂ້ອງ ແລະ ພະນັກ ງານວິຊາການຫຼັກແຫຼ່ງພາຍໃນ, ອອ້ມຂ້າງກະຊວງ ຮສສ ເຂົ້າຮວ່ມຢ່າງພ້ອມພຽງ.

  ກອງປະຊຸມວິຊາການໄດ້ຮັບຟັງການລາຍງານ ໂດຍສັງເຂບຜົນການປະຕິບັດແຜນພັດທະນາ ຮສສ 5 ປີ ຄັ້ງທີ IV ໄລຍະແຕ່ 2016-2020 ແລະ ທິດທາງແຜນ ການ 5 ປີ ຄັ້ງທີ V ໄລຍະແຕ່ 2021-2025, ຜົນການຈັດຕັ້ງປະຕິບັດແຜນພັດທະນາ ຮສສ ປະຈຳປີ 2020 ແລະທິດທາງແຜນການປີ 2021 ຊຶ່ງໃນປີ 2020 ຜ່ານມາ, ຂະແໜງແຮງງານ ແລະສະຫວັດດີການສັງຄົມຍັງໄດ້ເອົາໃຈໃສ່ປະຕິບັດພາລະບົດບາດ ແລະໜ້າທີ່ຂອງຕົນຢ່າງຕັ້ງໜ້າຊຶ່ງໄດ້ມີຜົນສຳເລັດຫຼາຍດ້ານ ແລະໄດ້ເພີ່ມທະວີໃນການປະຕິບັດ ບົດບາດ ດ້ານມະຫາພາກຢ່າງຕັ້ງໜ້າດ້ວຍການຄົ້ນຄ້ວາສ້າງກົດໝາຍ ແລະ ລະບຽບການຕ່າງໆ, ພ້ອມທັງຕິດຕາມຊຸກຍູ້ຈັດຕັ້ງປະຕິບັດຢ່າງກ້ວາງຂວາງ ແລະມີຄວາມສັກສິດກວ່າເກົ່າ, ການຈັດຕັ້ງປະຕິບັດຕົວເລກຄາດໝາຍສູ້ຊົນຫຼາຍດ້ານກໍມີຄວາມຄືບໜ້າດີຂຶ້ນເປັນຕົ້ນຕົວເລກການພັດທະນາສີມືແຮງ ງານ, ການຈັດຫາວຽກເຮັດງານທຳໄດ້ປະສານສົມທົບກັບບັນດາຂະແໜງການຂອງລັດ ແລະ ເອກະຊົນຈັດຕັ້ງການຝຶກ ແລະ ພັດທະນາສີມືແຮງງານໄດ້ທັງໝົດ 

21.580 ຄົນ, ຍິງ 7.497 ຄົນ ເທົ່າກັບ 41,85%,ຈັດຫາງານພາຍໃນໄດ້ 7.919 ຄົນ, ຍິງ 2.969 ຄົນ ແລະຈັດຫາງານໄປຕ່າງປະເທດ 28.055 ຄົນ, ຍິງ 14.835 ຄົນ; ວຽກຄຸ້ມຄອງແຮງງານໃນໄລຍະ 12 ເດືອນຜ່ານມາໄດ້ມີແຮງງານຕ່າງປະເທດທີ່ມາເຮັດວຽກຢູ່ ສປປ ລາວ ແບບຖືກຕ້ອງຕາມກົດໝາຍມີທັງ ໝົດ 22.544 ຄົນ, ຍິງ 3.459 ຄົນ; ປະກັນສັງຄົມແຫ່ງຊາດໄດ້ຂະຫຍາຍອັດຕາການປະກັນສັງຄົມໂດຍໄດ້ສຸ່ມໃສ່ຄົ້ນຄ້ວາ ແລະ ອອກບົດແນະນໍາການຈັດຕັ້ງປະ ຕິບັດກົດໝາຍວ່າດ້ວຍປະກັນສັງຄົມສະບັບປັບປຸງ ແລະໂຄສະນາເຜີຍ  ແຜ່ເນື້ອໃນຂອງກົດໝາຍດັ່ງກ່າວໃນ ຫົວໜ່ວຍທຸລະກິດຕ່າງໆຕາມເງື່ອນໄຂຕົວຈິງຊຶ່ງສາມາດຂະຫຍາຍອັດຕາປົກຄຸມປະກັນສັງຄົມໄດ້ 27.631 ຄົນ ເທົ່າກັບ 61,40% ຂອງແຜນການ 45.000 ຄົນ, ໃນນີ້ຫົວໜ່ວຍແຮງງານ 5 ຄົນຂຶ້ນໄປໄດ້ 23.872 ຄົນ ເທົ່າກັບ 56,83% ຂອງແຜນການປີ 42.000 ຄົນ, ສໍາລັບຜູ້ປະກອບອາຊີບສ່ວນບຸກຄົນ ແລະຜູ້ສະໝັກໃຈສາມາດປະຕິບັດໄດ້3.759 ຄົນ ເທົ່າກັບ 125% ຂອງແຜນການປີ 3.000 ຄົນ.

 ວຽກງານນະໂຍບາຍສະແດງຄວາມກະຕັນຍູຕໍ່ຜູ້ມີຜົນງານພາຍໃຕ້ໂຄງການສະແດງຄວາມກະຕັນຍູຮູ້ບຸນຄຸນ  272/ລບ ປີ 2020 ໃຫ້ເປົ້າໝາຍບູລິມະສິດ ແລະທົ່ວ ໄປໄດ້ທັງໝົດ  4.790 ທ່ານ, ຍິງ  613 ທ່ານ ເທົ່ກັບ137,28% ຂອງແຜນການປີ; ວຽກງານສັງຄົມສົງເຄາະ ແລະໄພພີບັດໄດ້ຮັບການບໍລິຈາກພາຍໃນ ແລະຕ່າງປະເທດເພື່ອຊ່ວຍເຫຼືອປະຊາຊົນທີ່ໄດ້ຮັບຜົນກະທົບຈາກໄພພິບັດທໍາມະຊາດຢູ່ແຂວງສະຫວັນນະເຂດເປັນເງິນສົດສະກຸນເງິນກີບ 115 ລ້ານກວ່າກີບ, ສະກຸນເງິນບາດ 2 ແສນບາດ ແລະ ເຄື່ອງອຸປະໂພກ-ບໍລິໂພກຈໍານວນໜຶ່ງລວມເປັນມຸນຄ່າ 63 ລ້ານກວ່າກີບ ແລະ 5 ລ້ານກວ່າໂດລາສະຫາລັດ; ປະສານສົມທົບກັບຄູ່ຮ່ວມພັດທະນາໃຫ້ການຊ່ວຍເຫຼືອເບື້ອງຕົ້ນເພື່ອບັນເທົາທຸກແກ່ຜູ້ປະສົບເຄາະຮ້າຍຈາກໄພພິບັດປະເພດຕ່າງໆ, ຜູ້ທຸກຍາກ, ຜູ້ດ້ອຍໂອກາດແລະຜູ້ຕົກເປັນເຫຍື່ອການຄ້າມະນຸດດ້ວຍຮູບການຕ່າງໆ.

 ແນວໃດກໍ່ຕາມ, ຄຽງຄູ່ກັບຜົນສຳເລັດກໍຍັງມີຂໍ້ຫຍຸ້ງຍາກ ແລະສິ່ງທ້າທາຍຫຼາຍປະການທີ່ຈະຕ້ອງໄດ້ພ້ອມກັນຄົ້ນຄ້ວາດ້ານວິຊາການ ແລະວາງແຜນການໃຫ້ມີຄວາມສອດຄ່ອງກັບສະພາບຄວາມເປັນຈິງ ແລະທ່າແຮງບົ່ມຊ້ອນທີ່ມີຢູ່ແຕ່ລະທ້ອງຖິ່ນເພື່ອຊອກຫາວິທີການ ແລະມີມາດຕະການໃນການຈັດຕັ້ງປະຕິບັດວຽກງານແຕ່ລະດ້ານໃນປີ 2021 ໃຫ້ມີຜົນສໍາເລັດດີກວ່າເກົ່າ.

-----------

ຂ່າວ:  ຮສສ, ຮູບພາບ: ໜັງສືພິມເສດຖະກິດ-ສັງຄົມ

แชร์