ທຸລະກິດ ສສງ ຫົວແຊຈະເລີນເຕີບໃຫຍ່ມີຜົນກຳໄລ

 ຍັງຮັກສາມາດຖານຂອງການບໍລິຫານຈັດການທີ່ມີຄຸນນະພາບສູງໄດ້ເປັນຢ່າງດີສໍາລັບສະຫະກອນສິນເຊື່ອ ແລະເງິນຝາກປະຢັດ (ສສງ) ຫົວແຊຈະເລີນເຖິງແມ່ນວ່າໃນປີ 2020 ຜ່ານມາຈະພົບບັນຫາເລື່ອງສະພາບເສດຖະກິດຫົດຕົວ ແລະຜົນກະທົບຈາກການແຜ່ລະບາດຂອງພະຍາດໂຄວິດ-19ແຕ່ທຸລະກິດຂອງທາງສະຫະກອນກໍ່ຍັງສືບຕໍ່ຂະຫຍາຍຕົວໃນລະດັບ 40% ແລະສາມາດສ້າງຜົນກໍາໄລໄດ້ 2 ຕື້ກວ່າກີບ.

  ທ່ານ ໄຊຍາ ທໍາມະວົງແສງ ຜູ້ອໍານວຍການ ສສງ ຫົວແຊຈະເລີນ ເມືອງບາຈຽງຈະເລີນສຸກ ແຂວງຈໍາປາສັກ ໄດ້ເປີດເຜີຍຕໍ່ນັກຂ່າວໜັງສືພິມເສດຖະກິດ-ສັງຄົມປະຈໍາແຂວງເມື່ອບໍ່ດົນມານີ້ໃຫ້ຮູ້ວ່: ໃນປີ 2020 ຜ່ານມາຫຼາຍຂະແໜງການແມ່ນໄດ້ຮັບຜົນກະທົບການຈາກພາບເສດຖະກິດຫົດຕົວ ແລະ ຜົນກະທົບຈາກການແຜ່ລະ ບາດຂອງພະຍາດໂຄວິດ-19 ສໍາລັບສະຫະກອນສິນເຊື່ອ ແລະເງິນຝາກຫົວແຊຈະເລີນຂອງພວກເຮົາແມ່ນໄດ້ເຮັດທຸລະກິດຮ່ວມກັບສະມາຊິກສ່ວນໃຫຍ່ແມ່ນຢູ່ເຂດຊົນນະບົດ ແລະມີອາຊີບຫຼັກໆເປັນຊາວສວນ,ຊາວນາເຮັດໃຫ້ບໍ່ມີຜົນກະທົບຫຼາຍຈາກການແຜ່ລະບາດຂອງພະຍາດດັ່ງກ່າວ,ທີ່ສໍາຄັນແມ່ນພວກເຮົາມີການຂະຫຍາຍຖານບໍລິການທີ່ກ້ວາງຂວາງໃນ 4-5 ຕົວເມືອງພາຍໃນແຂວງຈໍາປສັກ ເຮັດໃຫ້ສາມາດປະຄອງໂຕໄດ້ ແລະ ທຸລະກິດກໍ່ມີການຂະຫຍາຍຕົວໃນລະດັບ 40% ແລະມີຜົນກໍາໄລ 2 ຕື້ກວ່າກີບ,ທຽບໃສ່ແຜນປີແມ່ນບໍ່ໄດ້ຕາມກໍານົດທີ່ວາງໄວ້,ສາເຫດເນື່ອງຈາກວ່າທາງສະຫະກອນໄດ້ມີນະໂຍບາຍຕໍ່ສະມາຊິກໃນຊ້ວງທີ່ໂຄວິດ-19 ລະບາດ, ເຖິງວ່າຕົວເລກສະມາຊິກ ແລະເງິນກູ້ຍັງສຶບຕໍ່ເພີ່ມຂຶ້ນແຕ່ຜົນກໍາໄລຫຼຸດຍ້ອນຢຸດເກັບຄ່າທໍານຽມເງິນກູ້ ແລະເລື່ອນການຊໍາລະໃຫ້ແກ່ສະມາຊິດ 2-3 ເດືອນ ແລະໄດ້ຫລຸດອັດຕາດອກເບ້ຍເງິນກູ້ລົງ.

  ແຕ່ເຖິງຢ່າງໃດກໍ່ຕາມທ່ານຜູ້ອໍານວຍການໃຫ້ຮູ້ຕື່ມວ່າ: ສໍາລັບໃນປີ 2021 ນີ້ຖືວ່າຫຼາຍຂະແໜງການແມ່ນຍັງສຶບຕໍ່ໄດ້ຮັບຜົນກະທົບຈາກພະຍາດດັ່ງກ່າວຢູ່ສໍາລັບສະຫະກອນແມ່ນໄດ້ຮັບຜົນກະທົບໜ້ອຍ ແລະຄາດວ່າທຸລະກິດຈະຍັງສືບຕໍ່ຂະຫຍາຍຕົວໃນລະດັບ 30-40% ແລະ ຄາດກໍາໄລບໍ່ຫຼຸດ 2 ຕື້ກີບ ແລະສະຫະກອນມີແຜນຂະຫຍາຍໜ່ວຍບໍລິການເພີ່ມອີກ 1 ແຫ່ງໃນມໍ່ໆນີ້, ຊຶ່ງປະຈຸບັນແມ່ນມີໜ່ວຍບໍລິການແລ້ວ 1 ແຫ່ງທີ່ເມືອງປະທຸມພອນນອກຈາກນີ້ແມ່ນຈະໄດ້ມີການປັງປຸງການບໍລິການໃຫ້ລະດວກສະບາຍ ແລະກະທັດຮັດເຂົ້າກວ່າເກົ່າເພື່ອເຮັດໃຫ້ລູກຄ້າກໍ່ຄືສະມາຊິກເຂົ້າເຖິງແຫຼ່ງທຶນໄດ້ງ່າຍຂຶ້ນ ແລະມີຄວາມປະກັນຍິ່ງຂຶ້ນ.

แชร์