ເຊກອງຈະໃຊ້ 2 ຕື້ກວ່າກີບ ເລືອກຕັ້ງ ສສຊ ແລະສສຂ

  ບັ້ນເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ IX ແລະສະມາຊິກສະພາປະຊາຊົນຂັ້ນແຂວງ (ສສຂ) ຊຸດທີ II ແຂວງເຊກອງມີຄວາມຕ້ອງການນໍາໃຊ້ງົບປະມານທັງໝົດ 2 ຕື້ກວ່າກີບ ເພື່ອຮັບປະກັນໃຫ້ແກ່ການກະກຽມ ແລະດໍາເນີນການເລືອກຕັ້ງສອດຄ່ອງກັບລັດຖະທໍາມະນູນ,ກົດໝາຍ ແລະທັງຮັບປະກັນຄວາມເປັນເອກະພາບໃນທົ່ວປະເທດ.

 ທ່ານ ຄໍາຮູ້ ອ່ອນມະນີ ຫົວໜ້າພະແນກການເງິນແຂວງໃຫ້ຮູ້ວ່າ: ເພື່ອຮັບປະກັນໃຫ້ແກ່ການຫ້າງຫາກະກຽມ ແລະດໍາເນີນການເລືອກຕັ້ງສະມາຊິກສະພາແຫ່ງຊາດຊຸດທີ IX ແລະ ສະມາຊິກສະພາປະຊາຊົນຂັ້ນແຂວງຊຸດທີ II ທີ່ຈະມີຂຶ້ນໃນມໍ່ໆນີ້ໃຫ້ປະສົບຜົນສໍາເລັດອັນຈົບງາມ, ແຂວງເຊກອງໄດ້ມີການແຕ່ງຕັ້ງອະນຸກໍາມະການຕ່າງໆເພື່ອຮັບປະກັນໃຫ້ແກ່ການດໍາເນີນການເລືອກຕັ້ງຄັ້ງນີ້ໄປຕາມທິດຊີ້ນຳຂອງກົມການເມືອງສູນກາງພັກ, ຮັບປະກັນຄວາມສະຫງົບ ແລະຄວາມເປັນລະບຽບຮຽບ ຮ້ອຍໃນສັງຄົມ.

  ຕາມການສັງລວມແຜນຄວາມຕ້ອງການງົບປະມານຕິດພັນກັບແຜນການເຄື່ອນໄຫວວຽກກະກຽມ ແລະດໍາເນີນການເລືອກຕັ້ງ ສສຊ ຊຸດທີ IX ແລະສສຂ ຊຸດທີ II ຂອງບັນດາອະນຸກໍາມະການຕ່າງໆມີທັງໝົດ 2 ຕື້ກວ່າກີບ, ແຕ່ແນວໃດກໍດີໃນປີ2020 ແຂວງໄດ້ຮັບງົບປະມານຈາກສູນກາງໃນການເຄື່ອນ ໄຫວວຽກດັ່ງກ່າວຈໍານວນ 857 ລ້ານກີບ ແລະ ປີ 2021 ຄາດວ່າຈະໄດ້ອີກຈໍານວນໜຶ່ງຊຶ່ງການນໍາໃຊ້ງົບປະມານຜ່ານມາແມ່ນນອນໃນ 5 ວຽກຫຼັກຄື: ຝຶກອົບຮົມຄະນະກໍາມະການເລືອກຕັ້ງຂັ້ນແຂວງ, ຂັ້ນເມືອງ, ຜັນຂະຫຍາຍເອກະສານການເລືອກຕັ້ງ, ເກັບກໍາຂໍ້ມູນຜູ້ມີສິດເລືອກຕັ້ງ, ຈຸດປ່ອນບັດເລືອກຕັ້ງ ແລະກໍານົດໜ່ວຍປ່ອນບັດ.

 ໃນໂອກາດນີ້ທ່ານ ຄໍາຮູ້ ອ່ອນມະນີ ຍັງໄດ້ຮຽກຮ້ອງໃຫ້ທຸກພາກສ່ວນທີ່ໄດ້ຮັບມອບໝາຍຈົ່ງເພີ່ມທະວີຄວາມເປັນເຈົ້າການໃນການຈັດຕັ້ງປະຕິບັດວຽກງານຂອງຕົນໃຫ້ດຳເນີນໄປດ້ວຍຜົນສຳເລັດ, ຮັບປະກັນໃຫ້ຜູ້ມີສິດໄປໃຊ້ສິດຂອງຕົນເອງດ້ວຍປະລິມານ ແລະ ຄຸນນະພາບ, ພ້ອມທັງຮັບປະກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມ.

-----------

ຂ່າວ: ສັນຍາ, ຮູບພາບ: ໜັງສືພິມເສດຖະກິດ-ສັງຄົມ

แชร์