5 ປີ ສູນເລືອດລະດົມເລືອດໄດ້ 2,5 ແສນຖົງ

   ສູນເລືອດແຫ່ງຊາດອົງການກາແດງລາວຈັດກອງປະຊຸມສະຫຼຸບຖອດຖອນບົດຮຽນແຜນການປຸກລະດົມຈັດຫາເລືອດປີ 2020 ແລະວາງແຜນຮັບບໍລິຈາກເລືອດປີ 2021 ຂຶ້ນໃນວັນທີ 25 ມັງກອນ ໂດຍການເຂົ້າຮ່ວມຂອງທ່ານ ປະເດີມພອນ ສິນທະນີ ຮອງລັດຖະມົນຕີກະຊວງແຮງງານ ແລະສະຫວັດດີການສັງຄົມທັງເປັນຮອງປະທານຄະນະກໍາມະການສົ່ງເສີມການບໍລິຈາກເລືອດ-ສົ່ງເລືອດແຫ່ງຊາດ,ມີຫົວໜ້າກົມ,ຫົວໜ້າຫ້ອງການຜູ້ປະສານງານການປຸກລະດົມບໍລິຈາກເລືອດຈາກກະຊວງອົງການລັດອ້ອມຂ້າງສູນກາງພ້ອມດ້ວຍພະນັກງານວິຊາການເຂົ້າຮ່ວມ.

  ທ່ານ ຈັນທະລາ ສຸກສາຄອນ ຫົວໜ້າສູນເລືອດແຫ່ງຊາດກ່າວວ່າ: ກອງປະຊຸມຄັ້ງນີ້ຈັດຂຶ້ນເພື່ອປຶກສາຫາລືແລກປ່ຽນບົດຮຽນກ່ຽວກັບການສືບຕໍ່ເອົາໃຈໃສ່ເຮັດວຽກ ງານປຸກລະດົມແນວຄິດຈິດໃຈຂອງພະນັກງານຄູ-ອາຈານນັກຮຽນນັກສຶກສາໃຫ້ມີຄວາມຮັບຮູ້ເຂົ້າໃຈກ່ຽວກັບການບໍລິຈາກເລືອດຢ່າງກວ້າງຂວາງພ້ອມທັງມີສ່ວນຮ່ວມໃນການບໍລິຈາກເລືອດຢ່າງເປັນປະຈໍາ ແລະເພື່ອກໍານົດຄາດໝາຍສູ້ຊົນ ແລະວັນເວລາຮັບບໍລິຈາກເລືອດຢູ່ຕາມກະຊວງຕ່າງໆ ແລະຮັບບໍລິຈາກເລືອດເນື່ອງໃນວັນສໍາຄັນ ຕ່າງໆຂອງຊາດປະຈໍາປີ 2021 ນໍາອີກ.

  ສໍາລັບການເຄື່ອນໄຫວໃນ 5 ປີຜ່ານມາ (2016-2020), ສູນເລືອດແຫ່ງຊາດອົງການກາແດງລາວໄດ້ອອກແຮງສູ້ຊົນປະຕິບັດຕາມແຜນການໃນການບຸກລະດົມຫາຜູ້ບໍລິຈາກເລືອດໂດຍຜ່ານສື່ຕ່າງໆເຊັ່ນ: ວິດທະຍຸ, ໂທລະພາບ ແລະສື່ອອນລາຍດ້ວຍຫຼາຍວິທີໃນນັ້ນມີທັງຜູ້ມາບໍລິຈາກກັບສູນ ແລະອອກຮັບບໍລິຈາກຕາມສະຖານທີ່ຕ່າງໆເພີ່ມຂຶ້ນຜູ້ທີ່ມາບໍລິຈາກສ່ວນຫຼາຍແມ່ນກຳລັງໄວໜຸ່ມ, ນັກຮຽນ, ນັກສຶກສາ, ພະນັກງານ, ທະຫານ, ຕໍາຫຼວດ, ນັກທຸລະກິດ ແລະພໍ່ແມ່ປະຊາຊົນເວົ້າລວມ

ແລ້ວຜູ້ບໍລິຈາກມາເຖິງປະຈຸບັນນີ້ມີຄວາມຕື່ນຕົວສູງຖ້າທຽບໃສ່ເມື່ອກ່ອນມີການພັດທະນາ ແລະ ມີຄວາມເສຍສະຫຼະ ແລະ ຫຼາຍພາກສ່ວນຈັດການບໍລິຈາກນຳໃຊ້ທຶນຮອນຂອງຕົນໂດຍຮ່ວມກັບສູນເລືອດແຫ່ງຊາດຊຶ່ງສາມາດລະດົມໄດ້  251.564 ຖົງ, ເທົ່າກັບ 101% ແຜນການສູ້ຊົນ 249.700 ຖົງ,ລື່ນແຜນການ 1.864 ຖົງ, ເລືອດທຸກຖົງໄດ້ຮັບການກວດວິເຄາະຢ່າງເປັນລະບົບຕາມມາດຕະຖານ ແລະ ມີການແຍກເປັນສ່ວນປະກອບຂອງເລືອດເພື່ອຕອບສະໜອງໃຫ້ແກ່ຄົນເຈັບໃນໂຮງ ໝໍຕ່າງໆຈຳນວນ 258.753 ຖົງ ຊຶ່ງມີຫຼາຍຊີວິດໄດ້ຮັບການຊ່ວຍເຫຼືອ,ມີສູນບໍລີຈາກເລືອດ 17 ແຂວງ ແລະມີຕາໜ່າງການບໍລິການເລືອດຂັ້ນເມືອງໄດ້ 30ເມືອງ.

  ນອກຈາກນັ້ນຫົວໜ້າສູນເລືອດແຫ່ງຊາດຍັງໃຫ້ຮູ້ຕື່ມວ່າ: ເຖິງການຈັດຕັ້ງປະຕິບັດລະດົມບໍລິຈາກເລືອດໄດ້ລື່ນແຜນການກໍຕາມແຕ່ການຕອບສະໜອງເລືອດຍັງບໍ່ພຽງພໍເນື່ອງຈາກວ່າມີຄົນເຈັບທີ່ຕ້ອງການເລືອດເພີ່ມຂຶ້ນທີ່ມາຈາກຫຼາຍສາຍເຫດອຸປະຕິເຫດເພີ່ມຂຶ້ນ, ການເກີດລູກທີ່ເສຍເລືອດ, ການຜ່າຕັດ, ການຟອກໄຂຫຼັງ ແລະອື່ນໆ ດັ່ງນັ້ນຈຶ່ງຮຽກງຮ້ອງມາຍັງບັນດາທິ່ເຂົ້າຮ່ວມກອງປະຊຸມຈົ່ງສືບຕໍ່ເອົາໃຈໃສ່ປຸກລະດົມແນວຄິດຈິດໃຈໃຫ້ມວນຊົນໃນສັງຄົມໂດຍສະເພາະນັກຮຽນ-ນັກສຶກ ສາໃຫ້ມີຄວາມຮັບຮູ້ເຂົ້າໃຈກ່ຽວກັບການບໍລິຈາກເລືອດພ້ອມທັງມີສ່ວນຮ່ວມໃນການບໍລິຈາກເລືອດຢ່າງເປັນປະຈໍາ.

แชร์