ທຸກເມືອງໃນລາວມີທາງເຖີງທຽວໄດ້ຕະຫຼອດປີ

  ໃນໄລຍະຜ່ານມາລັດຖະບານໄດ້ມີຄວາມເອົາໃຈໃສ່ຕໍ່ການຍົກລະດັບ ແລະຂະຫຍາຍພື້ນຖານໂຄງລ່າງຢ່າງມີຈຸດສຸມຕອບສະໜອງໄດ້ຕາມຄວາມຮຽກຮ້ອງຕ້ອງການໃນການພັດທະນາຕະຫຼອດຮອດການເຊື່ອມຈອດກັບບັນດາປະເທດໃນພາກພື້ນເພື່ອຍົກກຳລັງແຂ່ງຂັນຂົນສົ່ງພາຍໃນໃຫ້ສູງຂຶ້ນໂດຍມາຮອດເວລານີ້ທຸກເມືອງໃນທົ່ວປະ ເທດແມ່ນມີເສັ້ນທາງທຽວເຂົ້າໄດ້ຕະຫຼອດປີ.

  ສະຫາຍ ວຽງສະຫວັດ ສີພັນດອນ ເລຂາຄະນະບໍລິຫານພັກກະຊວງໂຍທາທິການ ແລະຂົນສົ່ງລາຍງານໝາກຜົນຄວາມສຳເລັດການຈັດຕັ້ງປະຕິບັດວຽກງານໃນຕະ ຫຼອດ 5 ປີຜ່ານມາຕໍ່ກອງປະຊຸມໃຫຍ່ຄັ້ງທີ XI ຂອງພັກທີ່ຈັດຂຶ້ນເມື່ອບໍ່ດົນມານີ້ວ່າ: ສປປ ລາວ ເປັນປະເທດທີ່ຕັ້ງຢູ່ໃຈກາງບັນດາປະເທດອາຊຽນ ແລະ ສປ ຈີນ ມີບັນດາເສັ້ນທາງເຊື່ອມຈອດກັບປະເທດໃກ້ຄຽງ ແລະພາກພື້ນ 12 ເສັ້ນທາງຕົ້ນຕໍໃນນັ້ນໄດ້ຖືກກຳນົດເປັນເສັ້ນທາງຫຼວງອາຊຽນ 8 ເສັ້ນ ແລະມີເສັ້ນທາງຜ່ານເຊື່ອມຕໍ່ບັນດາເມືອງໃຫຍ່ໃນອະນຸພາກພື້ນຫຼາຍເສັ້ນທາງ, ຊຶ່ງໄດ້ກາຍເປັນເງື່ອນໄຂອັນດີຕໍ່ການພັດທະນາການບໍລິການຂົນສົ່ງສິນຄ້າ ແລະໂດຍສານທາງຜ່ານໃນອະນຸພາກພື້ນ.

  ໄປຄຽງຄູ່ກັນນັ້ນໃນຜ່ານມາລັດຖະບານຍັງໄດ້ເອົາໃຈໃສ່ຕໍ່ການຍົກລະດັບ ແລະພັດທະນາໂຄງລ່າງພື້ນຖານຄົມມະນາຄົມ-ຂົນສົ່ງ ຊຶ່ງໄດ້ສຳເລັດການກໍ່ສ້າງເສັ້ນທາງ 13 ເໜືອ (ອຸດົມໄຊ), ການກໍ່ສ້າງທາງເລກ 9 (ສະຫວັນນະເຂດ-ຊາຍແດນຫວຽດນາມ), ກໍ່ສ້າງທາງ 1A, (ບຸເໜືອ-ລານຕຸຍ); ກຳລັງຈັດຕັ້ງປະຕະບັດໂຄງການກໍ່ສ້າງທາງດ່ວນວຽງຈັນ-ບໍ່ເຕັນປະຈຸບັນສຳເລັດຊ້ວງທີ 1 (ນວ-ວັງວຽງ) .

  ນອກຈາກນີ້ຍັງໄດ້ພັດທະນາທາງຫຼວງແຂວງ, ທາງຊົນນະບົດ, ທາງເຂົ້າເຂດເສດຖະກິດ ແລະຈຸດສຸມການຜະລິດດ້ວຍການຮ່ວມມືກັບຄູ່ຮ່ວມພັດທະນາຕ່າງໆ ຈາກສີ່ງດັ່ງກ່າວໄດ້ສົ່ງຜົນເຮັດໃຫ້ລະບົບຕາໜ່າງເສັ້ນທາງ 58,2 ພັນກີໂລແມັດ, ທຽບໃສ່ປີ 2015 ເພີ່ມຂຶ້ນ 1,9 ພັນກີໂລແມັດ ມີເສັ້ນທາງທຽວໄດ້ຕະຫຼອດປີໄປເຖິງທຸກເມືອງໃນທົ່ວປະເທດ.

  ພ້ອມດຽວກັນນີ້ກໍໄດ້ເອົາໃຈໃສ່ບູລະນະຮັກສາ ແລະສ້ອມແປງເສັ້ນທາງຕ່າງໆ ຊຶ່ງໄດ້ນຳໃຊ້ 80% ຂອງງົບປະມານລົງທຶນຂອງກະຊວງ ແລະຍາດແຍ່ງເອົາການຊ່ວຍ ເຫຼືອຈາກຕ່າງປະເທດນອກຈາກນີ້ກໍໄດ້ຄົ້ນຄວ້າອອກນິຕິກຳຄຸ້ມຄອງມາດຕະຖານຂອງບໍລິສັດກໍ່ສ້າງ-ສ້ອມແປງຂົວທາງ ແລະບໍລິສັດທີ່ປຶກສາ.

แชร์