ຍີ່ປຸ່ນ ຊ່ວຍປັບປຸງບໍລິການສາທາລະນະສຸກ ແລະໂຮງຮຽນລາວ

 ລັດຖະບານຍີ່ປຸ່ນໄດ້ໃຫ້ການຊ່ວຍເຫຼືອລ້າຈຳນວນ 522.221 ໂດລາສະຫະລັດ ໃຫ້ໂຄງການດ້ານສາທາລະນະສຸກ 2 ໂຄງການໃນແຂວງຊຽງຂວາງ ແລະແຂວງວຽງ ຈັນ, ແລະ 3 ໂຄງການດ້ານການສຶກສາຢູ່ແຂວງຫຼວງນໍ້າທາ, ແຂວງອຸດົມໄຊ ແລະແຂວງໄຊຍະບູລີ ສປປ ລາວ ໂດຍຜ່ານໂຄງການເສີມສ້າງຄວາມໝັ້ນຄົງຂອງມະນຸດຂັ້ນຮາກຖານ (GGPs) ໂດຍພິທີເຊັນສັນຍາໂຄງການຊ່ວຍເຫຼືອດັ່ງກ່າວໄດ້ຈັດຂຶ້ນທີ່ສະຖານທູດຍີ່ປຸ່ນປະຈຳລາວ, ໃນວັນທີ 20 ມັງ ກອນ 2021, ລະຫວ່າງທ່ານ ທາເກວາ ກະເຄໂຊ, ເອກອັກຄະລາຊະທູດຍີ່ປຸ່ນປະຈໍາລາວ ແລະບັນດາໂຕແທນຈາກການນຳຂັ້ນເມືອງ ແລະແຂວງທີ່ໄດ້ຮັບໂຄງການດັ່ງກ່າວ.

  ໜຶ່ງໃນໂຄງການດ້ານສາທາລະນະສຸກແມ່ນການສ້າງສູນສຸຂະພາບຫຼັງໃໝ່ຢູ່ບ້ານພຽງດ່ານແຂວງຊຽງຂວາງເນື່ອງຈາກອາຄານຫຼັງເກົ່າເປ່ເພຍ້ອນຖືກໄພນໍ້າຖ້ວມໃນປີ 2018 ແລະອີກໜຶ່ງໂຄງການແມ່ນການສ້າງສູນສຸຂະພາບແມ່ ແລະ ເດັກຢູ່ເມືອງຫີນເຫີບ ແຂວງວຽງຈັນ ໂຄງການດັ່ງກ່າວມີຈຸດປະສົງເພື່ອຍົກລະດັບຄວາມສາມາດ ແລະປັບປຸງສະພາບແວດລ້ອມໃນການເບິ່ງແຍງແມ່ໃນລະຫວ່າງທີ່ຖືພາ.

ໂຄງການດ້ານການສຶກສາແມ່ນການກໍ່ສ້າງອາຄານໃຫ້ແກ່ໂຮງຮຽນມັດທະຍົມຕອນຕົ້ນນໍ້າບໍ່ໃນແຂວງຫຼວງນໍ້າທາ, ມັດທະຍົມຕອນຕົ້ນພູວຽງໄຊໃນແຂວງອຸດົມໄຊ ແລະໂຮງຮຽນອະນຸບານບ້ານທາດຢູ່ແຂວງໄຊຍະບູລີ ເພື່ອປັບປຸງສິ່ງແວດລ້ອມໃນການສຶກສາໂດຍການສ້າງອາຄານຮຽນຫຼັງໃໝ່ພ້ອມສິ່ງອຳນວຍຄວາມສະດວກຕ່າງໆ.

 ໃນກອງປະຊຸມລັດຖະມົນຕີການຕ່າງປະເທດແມ່ນໍ້າຂອງ-ຍີ່ປຸ່ນ ຄັ້ງທີ 13 ທີ່ ໄດ້ຈັດຂຶ້ນໃນເດືອນກໍລະກົດປີ 2020 ທີ່ຜ່ານມາ, ລັດຖະບານຍີ່ປຸ່ນໄດ້ເນັ້ນໜັກວ່າຈະຈັດຕັ້ງປະຕິບັດໂຄງການເສີມສ້າງຄວາມໝັ້ນຄົງຂອງມະນຸດຂັ້ນຮາກຖານເປັນມູນຄ່າ 1 ຕື້ເຢນ ພາຍໃນຊ່ວງທ້າຍເດືອນມີນາ 2021, ໃນຮູບແບບຂອງແຜນລິເລີ່ມ KUNASONE (ຮາກຫຍ້າ) ເພື່ອສົ່ງເສີມເປົ້າໝາຍການພັດທະນາທີ່ຍືນຍົງໃຫ້ແກ່ພາກພື້ນແມ່ນໍ້າຂອງ, ຈຸດປະສົງແມ່ນເພື່ອສົ່ງເສີມການພັດທະນາເສດຖະກິດ-ສັງຄົມຂອງແຕ່ລະທ້ອງຖິ່ນຂອງທຸກປະເທດໃນພາກພື້ນແມ່ນໍ້າຂອງຊຶ່ງລວມທັງ ສປປ ລາວ. ເພື່ອຮັບປະກັນ “ບໍ່ໃຫ້ມີໃຜຖືກຖິ້ມໄວ້ທາງຫຼັງ” ຜ່ານການແກ້ໄຂຄວາມແຕກໂຕນໃນພາກພື້ນ, ລັດຖະບານຍີ່ປຸ່ນຈະສືບຕໍ່ໃຫ້ການຊ່ວຍເຫຼືອລັດຖະບານລາວປັບປຸງພື້ນຖານຊີວິດການເປັນຢູ່ຂັ້ນຮາກຖານຕໍ່ໄປ.

แชร์