ອາເມລິກາ ຊ່ວຍທີມເກັບກູ້ລະເບີດເຄື່ອນທີ່ 5 ແຂວງ

 ລັດຖະບານສະຫະລັດອາເມລິກາໄດ້ປະກອບສ່ວນພາຫະນະໃໝ່ (4x4 vehicles) ຈຳນວນ 16 ຄັນ ແລະເຄື່ອງກວດລະເບີດຈຳນວນ 134 ເຄື່ອງໃຫ້ແກ່ ສປປ ລາວ ລວມມູນຄ່າກວ່າ 1 ລ້ານໂດລາ ຫຼືປະມານ 9,2 ຕື້ໂດລາ ເພື່ອນຳໃຊ້ເຂົ້າໃນໂຄງການເກັບກູ້ລະເບີດແຫ່ງຊາດໂດຍສະເພາະທີມເກັບກູ້ລະເບີດເຄື່ອນທີ່ໆປະຈຳຢູ່ແຂວງຄຳມ່ວນ, ສະຫວັນນະເຂດ, ສາລະວັນ, ອັດຕະປື ແລະຫົວພັນ.

  ໃນພິທີມອບ-ຮັບດັ່ງກ່າວ ທີ່ໄດ້ຈັດຂຶ້ນໃນວັນທີ 19 ມັງກອນ ທີ່ສູນຝຶກອົບຮົມຂອງໂຄງການເກັບກູ້ລະເບີດແຫ່ງຊາດ (ຄກລ) ທີ່ນະຄອນຫຼວງວຽງຈັນ, ໂດຍການເຂົ້າຮ່ວມຂອງທ່ານ ປະເດີມພອນ ສົນທະນີ, ຮອງລັດຖະມົນຕີກະຊວງແຮງງານ ແລະສະຫວັດດີການສັງຄົມ, ທ່ານ ໂຈມແຍງ ແພງທອງສະຫວັດ,ຫົວໜ້າຫ້ອງການຄະນະກໍາມະການຄຸ້ມຄອງແຫ່ງຊາດເພື່ອການແກ້ໄຂບັນຫາລະເບີດຕົກຄ້າງຢູ່ ສປປ ລາວ (NRA), ທ່ານ ບຸນພະມິດ ໂສມວິຈິດ ອຳນວຍການໂຄງການເກັບກູ້ລະເບີດແຫ່ງຊາດ (UXO Lao) ແລະທ່ານ ດຣ. ປີເຕີ ເຮມ໋ອນ ເອກອັກຄະລັດຖະທູດສະຫະລັດອາເມລິກາປະຈໍາ ສປປ ລາວ.

 ທ່ານ ເອກອັກຄະລັດຖະທູດເຮມ໋ອນ ກ່າວວ່າ:“ພວກເຮົາມີຄວາມຍິນດີຫຼາຍທີ່ສະມາຊິກທີມງານຂອງ ຄກລ ມີຄວາມຫ້າວຫັນຈະໄດ້ມີອຸປະກອນທີ່ມີຄວາມພ້ອມໃນການປະຕິບັດວຽກງານທີ່ສໍາຄັນຂອງບັນດາເຈົ້າໜ້າທີ່ຢູ່ເຂດຫ່າງໄກສອກຫຼີກໃຫ້ມີປະສິດທິພາບ  ແລະປະສິດທິຜົນສູງສຸດ.”

  ປີ 2021 ແມ່ນປີຄົບຮອບ 5 ປີ ຂອງການເປັນຄູ່ຮ່ວມມືແບບກວມລວມຂອງສະຫະລັດອາເມລິກາ ແລະ ສປປ ລາວ, ການຊ່ວຍເຫຼືອນີ້ແມ່ນສ່ວນໜຶ່ງຂອງການຮ່ວມ ມືຂອງສອງປະເທດໃນການເຮັດວຽກເພື່ອບັນລຸເປົ້າໝາຍຂອງການພັດທະນາແບບຍືນຍົງທີ 18 (SDG 18) ການລົບລ້າງລະເບີດບໍ່ທັນແຕກທີ່ເປັນສິ່ງກີດຂວາງຕໍ່ການພັດທະນາພາຍໃນປີ 2030, ສະຫະລັດອາເມລິກາ ແມ່ນເປັນຜູ້ໃຫ້ທຶນທີ່ໃຫ່ຍທີ່ສຸດທີ່ໃຫ້ການປະກອບສ່ວນຫຼາຍກວ່າ 230 ລ້ານໂດລາ ນັບຕັ້ງແຕ່ປີ 1995.

แชร์