ເຈົ້າໜ້າທີ່ເຜີຍ 4 ສາເຫດຫຼັກພາເກີດອຸບັດເຫດຢູ່ທາງດ່ວນວຽງຈັນ-ວັງວຽງ

  ຫຼັງຈາກທາງດ່ວນເສັ້ນປະຫວັດສາດຂອງລາວນະຄອນຫຼວງວຽງຈັນ-ວັງວຽງ ເປີດໃຊ້ຢ່າງເປັນທາງການໃນວັນທີ20 ທັນວາ 2020 ເປັນຕົ້ນມາກໍສາມາດສ້າງບັນ ຍາກາດລາວທ່ຽວລາວໃຫ້ກັບມາຄຶກຄັກອີກຄັ້ງໂດຍສະເພາະແມ່ນວັງວຽງແຕ່ສິ່ງທີ່ໜ້າເປັນຫ່ວງຄຽງຄູ່ກັນຄືບັນຫາອຸບັດເຫດໂດຍເຖິງປະຈຸບັນເກີດຂຶ້ນແລ້ວທັງໝົດ 11 ຄັ້ງ (ບໍ່ລວມຈຳນວນທີ່ເຈົ້າໜ້າທີ່ບໍ່ໄດ້ຮັບແຈ້ງ); ໃນນີ້, ເກີດຢູ່ເຂດວັງວຽງ ແຂວງວຽງຈັນ 3 ຄັ້ງ ແລະເກີດຢູ່ເຂດສີເກີດ ເມືອງນາຊາຍທອງ ນະຄອນຫຼວງວຽງ ຈັນ 8 ຄັ້ງ, ຕໍ່ກັບອຸບັດເຫດທີ່ເກີດຂຶ້ນນັ້ນມີຜູ້ຂັບຂີ່ບາດເຈັບເລັກໜ້ອຍ ແລະສົມຄວນ 10 ກວ່າຄົນ ແຕ່ຍັງບໍ່ມີຜູ້ເສຍຊີວິດ.

   ຕາມການລາຍງານຂ່າວຂອງສື່ ປກສ ໂດຍອີງຂໍ້ມູນການເປີດເຜີຍຂອງທ່ານ ພັອ ຄໍາເຫຼັກ ໄຊຍະສິດ ຮອງຫົວໜ້າກົມຕໍາຫຼວດຈະລາຈອນກົມໃຫຍ່ຕຳຫຼວດກະຊວງ ປກສ ຮູ້ວ່າ: ພາຍຫຼັງເປີດນຳໃຊ້ເສັ້ນທາງດ່ວນນະຄອນຫຼວງວຽງຈັນ-ວັງວຽງ ມາເຖິງປະຈຸບັນ, ອຸບັດເຫດທີ່ເກີດຂຶ້ນຢູ່ເສັ້ນທາງດ່ວນນັ້ນ ມີ 11 ຄັ້ງ ແຕ່ບໍ່ມີຜູ້ເສຍຊີວິດ, ທັງນີ້ທ່ານໄດ້ເປີດເຜີຍຕື່ມວ່າ: ສາເຫດຫຼັກທີ່ພາໃຫ້ເກີດອຸບັດເຫດແມ່ນເກີດຈາກການໃຊ້ຄວາມໄວເກີນຂອບເຂດ,ຂັບຂີ່ລົດດ້ວຍຄວາມປະໝາດ,ຂາດສະຕິ ແລະບໍ່ຮັກສາໄລຍະຮ່າງໃນເວລາເຂົ້າຊ່ອງຈ່າຍເງິນ, ນອກນີ້ຍັງເກີດຈາກສັດ (ງົວ, ຄວາຍ, ແບ້) ທີ່ເຂົ້າໄປໃນເສັ້ນທາງດ່ວນ.

  ສຳລັບສັດທີ່ເຂົ້າມາເສັ້ນທາງດ່ວນໄດ້ນັ້ນແມ່ນຍ້ອນເກີດຈາກປະຊາຊົນລັກຕັດຮົ້ວເພື່ອນຳໃຊ້ເສັ້ນທາງດັ່ງກ່າວຂ້າມໄປສວນ-ໄປນາ, ຮົ້ວບາງຈຸດກໍ່ສ້າງບໍ່ໄດ້ມາດຖານຍ້ອນໄລຍະກໍ່ສ້າງຮົ້ວຢູ່ໃນຊ່ວງລະດູຝົນເຮັດໃຫ້ການກໍ່ສ້າງຮົ້ວລອຍໄປຕາມນໍ້າເມື່ອນໍ້າບົກແຫ້ງຈຶ່ງເຮັດໃຫ້ສັດລອດເຂົ້າມາຍ່າງຢູ່ຕາມທາງດ່ວນໄດ້.

  ໃນປະຈຸບັນ, ເຈົ້າໜ້າທີ່ຕໍາຫຼວດຈະລາຈອນທີ່ປະຈໍາຢູ່ເສັ້ນທາງດ່ວນໄດ້ສົມທົບກັບພະນັກງານເສັ້ນທາງດ່ວນອອກເຄື່ອນໄຫວໃນການກວດກາລາດຕະເວນຢູ່ຕາມທາງດ່ວນ ແລະເມື່ອພົບເຫັນຈຸດໃດທີ່ມີຄວາມສ່ຽງພາໃຫ້ເກີດອຸບັດເຫດຈະມອບໃຫ້ເຈົ້າຂອງທາງດ່ວນເລັ່ງປັບປຸງ ແລະແກ້ໄຂໃຫ້ວ່ອງໄວທັນການເພື່ອແນໃສ່ແກ້ໄຂບໍ່ໃຫ້ເກີດອຸບັດເຫດຢູ່ເສັ້ນທາງດ່ວນ.

แชร์