ທ່ານ ບຸນຍັງ ວໍລະຈິດ ເປັນໜຶ່ງໃນຜູ້ນໍາທີ່ດີເດັ່ນຂອງການປະຕິວັດລາວ

ທ່ານ ບຸນຍັງ ວໍລະຈິດ ມີຖິ່ນກໍາເນີດຢູ່ແຂວງສະຫວັນນະເຂດຊຶ່ງເປັນອູ່ເຂົ້າ-ອູ່ປາທີ່ກ້ວາງໃຫຍ່ຂອງປະເທດ, ຊາວແຂວງສະຫວັນນະເຂດເຄີຍມີມູນເຊື້ອດຸໝັ້ນຂະຫຍັນພຽນ, ທໍາການຜະລິດແກ້ໄຂຊີວິດການເປັນຢູ່ດ້ວຍຫົວຄິດປັນຍາທີ່ກ້າວໜ້າ ແລະ ກໍ່ມີຈິດໃຈອົງອາດກ້າແກ່ນເດັດຂາດບໍ່ຍອມຈໍານົນຕໍ່ຜູ້ຮຸກຮານຊຶ່ງໃນຕະຫຼອດໄລຍະຜ່ານມາໄດ້ເກີດມີນັກຮັກຊາດຫຼາຍທ່ານທີ່ໄດ້ມອບກາຍຖະຫວາຍຊີວິດເພື່ອເອກະລາດ,ສັນຕິພາບ ແລະຄວາມຢູ່ດີກິນດີຂອງປະຊາຊົນບັນດາເຜົ່າຊຶ່ງວິລະກໍາເຫຼົ່ານັ້ນໄດ້ກາຍເປັນແວ່ນແຍງອັນໃສແຈ້ງໃຫ້ຄົນຮຸ່ນຫຼັງດັ່ງ: ພໍ່ກະດວດຜູ້ລືນາມ ແລະ ປະທານໄກສອນ ພົມວິຫານ ລູກຜູ້ປະເສີດຂອງປະຊາຊົນ, ຜູ້ສ້າງຕັ້ງພັກປະຊາຊົນລາວ (ພັກປະຊາຊົນປະຕິວັດລາວ), ສ້າງຕັ້ງກອງທັບປະຊາຊົນລາວ, ເປັນຜູ້ສ້າງຕັ້ງລັດຂອງຊົນຊັ້ນກໍາມະກອນຢູ່ດິນແດນລາວ.

  ປະທານ ບຸນຍັງ ວໍລະຈິດ ກໍາເນີດໃນຄອບຄົວຊາວນາທີ່ທຸກຍາກ, ເພິ່ນໄດ້ເອົາຕົນເຂົ້າການປະຕິວັດຕັ້ງແຕ່ເຍົາໄວ;ຍ້ອນເຫັນແຈ້ງຕໍ່ພາລະກິດປະຕິວັດໂດຍໄດ້ຮັບການຊີ້ນໍາ-ນໍາພາ, ສຶກສາອົບຮົມຈາກພັກ, ຈາກການນໍາໂດຍສະເພາະແມ່ນຈາກລຸງ ປະທານ ໄກສອນ ພົມວິຫານ ຈຶ່ງເຮັດໃຫ້ເພິ່ນມີຄວາມຄຽດແຄ້ນສູງຕໍ່ຈັກກະພັດຜູ້ຮຸກ ຮານທັງແບບເກົ່າ-ແບບໃໝ່ ແລະພວກລູກມືຂາຍຊາດດັ່ງນັ້ນເພິ່ນໄດ້ຕັດສິນໃຈກ້າວເດີນສູ່ເຂດປົດປ່ອຍພາຍໃຕ້ການປົກຄອງຂອງສູນກາງແນວລາວອິດສະຫຼະ ແລະສູນ ກາງແນວລາວຮັກຊາດ (ເນື້ອແທ້ພາຍໃນແມ່ນພັກປະຊາຊົນລາວນໍາພາ) ຮ່ວມກັບບັນດາສະຫາຍພະນັກງານ-ນັກຮົບຢູ່ ບັນດາກົມກອງທີ່ເພິ່ນສັງກັດຢູ່ຈັບປືນຕໍ່ສູ້ກັບສັດຕູຢ່າງເດັດດ່ຽວ ແລະສາມາດຍາດໄດ້ໄຊຊະນະເປັນຂັ້ນໆມາປະກອບເຂົ້າໃນພາລະກິດປົດປ່ອຍຊາດ ແລະສະຖາປະນາ ສປປ ລາວ ໃນວັນທີ 2 ທັນວາ 1975.

  ທ່ານປະທານປະເທດ ບຸນຍັງ ວໍລະຈິດ ອະດີດເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດໃນປະຈຸບັນແມ່ນໜຶ່ງໃນບັນດາການນໍາສູງສຸດຂອງພັກ-ລັດ, ແມ່ນນັກຮົບປະຕິວັດທີ່ອາດຫານກ້າແກ່ນໃນຂະບວນການຕໍ່ສູ້ກູ້ຊາດຂອງປະຊາຊົນເຮົາ; ເພິ່ນເປັນນັກຮັກຊາດທີ່ສູງສົ່ງຍາມໃດກໍມີຄວາມຈົ່ງຮັກພັກດີ,ບໍລິສຸດຜຸດພ່ອງຕໍ່ພັກ, ຕໍ່ປະເທດຊາດແລະຕໍ່ປະຊາຊົນ. ໃນມື້ສຸດທ້າຍຂອງກອງປະຊຸມໃຫຍ່ຄະນະບໍລິຫານງານສູນກາງພັກສະໄໝທີXI (ວັນທີ 15 ມັງກອນ 2021), ສະ ຫາຍເລຂາທິການໃຫຍ່ ທອງລຸນ ສີສຸລິດ ນາຍົກລັດຖະມົນຕີ ໄດ້ກ່າວສະແດງຄວາມຮູ້ບຸນຄຸນ ແລະຕີລາຄາສູງຕໍ່ສະຫາຍບຸນຍັງ ວໍລະຈິດ ແມ່ນການນຳຜູ້ໜຶ່ງທີ່ມີແບບ ແຜນ ແລະ ພິບໄຫວໃນການນຳພາ-ຊີ້ນຳ, ມີແບບແຜນການດຳລົງຊີວິດທີ່ປອດໃສຂາວສະອາດ, ເປັນແບບຢ່າງທີ່ດີ ແລະເປັນໃຈກາງແຫ່ງການເຕົ້າໂຮມຄວາມສາມັກຄີໃນທົ່ວພັກ, ທົ່ວກອງທັບ ແລະປວງຊົນລາວບັນດາເຜົ່າ.

  ພາຍຫຼັງປະເທດຊາດໄດ້ຮັບການປົດປ່ອຍ, ສະຫາຍ ບຸນຍັງ ວໍລະຈິດ ໄດ້ຮັບການເລືອກຕັ້ງເປັນກຳມະການສົມບູນຂອງຄະນະບໍລິຫານງານສູນກາງພັກສະໄໝທີ III ໃນປີ 1982, ຕະຫຼອດໄລຍະ 8 ສະໄໝກອງປະຊຸມໃຫຍ່ຂອງພັກ, ສະຫາຍລ້ວນແຕ່ໄດ້ຮັບຕໍາແໜ່ງທີ່ສຳຄັນຂອງພັກເຊັ່ນ: ເປັນກຳມະການສູນກາງພັກ 8 ສະໄໝ, ກໍາມະການກົມການເມືອງສູນກາງພັກ 5 ສະໄໝ, ເປັນຄະນະເລຂາທິການສູນກາງພັກ 2 ສະໄໝ ແລະເປັນຜູ້ປະຈໍາການຄະນະເລຂາທິການສູນກາງພັກ 1 ສະໄໝ, ເປັນເລຂາທິການໃຫຍ່ຄະນະບໍລິຫານງານສູນກາງພັກ 1 ສະໄໝ;ນອກຈາກຕໍາແໜ່ງເບື້ອງພັກແລ້ວ,ສະຫາຍຍັງໄດ້ຮັບຕໍາແໜ່ງເບື້ອງລັດທີ່ສຳຄັນຢູ່ຂັ້ນທ້ອງຖິ່ນ ແລະຢູ່ສູນກາງລະອຽດຄື:ເປັນເຈົ້າແຂວງສະຫວັນນະເຂດ,ເປັນເຈົ້າຄອງນະຄອນຫຼວງວຽງຈັນ,ປະທານຄະນະກຳມາທິການຮ່ວມມື ແລະລົງທຶນຕ່າງປະເທດ, ປະທານຄະ ນະກຳມາທິການສູນກາງຈັດສັນທີ່ດິນ-ປ່າໄມ້,ເປັນປະທານຄະນະກຳມາທິການສູນກາງພັດທະນາຊົນນະບົດ,ຮອງນາຍົກລັດຖະມົນຕີ ແລະລັດຖະມົນຕີກະຊວງການເງິນ, ເປັນນາຍົກລັດຖະມົນຕີ, ເປັນຮອງປະທານປະເທດ ແລະເປັນປະທານປະເທດ ແຫ່ງ ສປປ ລາວ.

   ຕະຫຼອດໄລຍະເວລາຫຼາຍສິບປີທີ່ໄດ້ຮັບມອບໝາຍໜ້າທີ່ສຳຄັນຂອງພັກ-ລັດ, ສະຫາຍມີຄວາມເຂັ້ມງວດໃນດ້ານຫຼັກການ, ເຄັ່ງຄັດຕໍ່ລະບຽບວິໄນ,ເອົາໃຈໃສ່ສົ່ງເສີມປະຊາທິປະໄຕໃນໝູ່ຄະນະ, ຈິງໃຈຕໍ່ ເພື່ອນສະຫາຍ, ໃກ້ຊິດຕິດແທດມະຫາຊົນ. ເຖິງແມ່ນວ່າຈະຢູ່ໃນຖານະ ຕຳແໜ່ງໃດ, ຢູ່ບ່ອນໃດ ແລະໃນສະພາບການ-ເງື່ອນໄຂໃດ ສະຫາຍ ບຸນຍັງ ວໍລະຈິດ ກໍ່ລ້ວນແຕ່ເຊີດຊູຄັນທຸງນໍາໜ້າຂອງພັກ, ປະຕິບັດໜ້າທີ່ດ້ວຍຄວາມຈົງຮັກພັກດີ, ຍຶດໝັ້ນຢ່າງບໍ່ຄອນແຄນໃນແນວທາງ ແລະ ທັດສະ ນະຫຼັກໝັ້ນຂອງພັກ. ພິເສດແມ່ນໄລຍະທີ່ສະຫາຍໄດ້ດຳລົງຕຳແໜ່ງເລຂາທິການໃຫຍ່ຄະນະບໍລິຫານງານສູນກາງພັກ ສະໄໝທີ X ແລະ ເປັນປະທານປະເທດແຫ່ງ ສປປ ລາວ, ສະຫາຍໄດ້ເປັນເຈົ້າການປະກອບສ່ວນຄົ້ນຄວ້າກຳນົດ,ຊີ້ນຳຜັນຂະຫຍາຍແນວທາງປ່ຽນແປງໃໝ່ຮອບດ້ານມີຫຼັກການຂອງພັກ,ສືບຕໍ່ນຳພາສ້າງ ແລະບູລະ ນະລະບອບປະຊາທິປະໄຕປະຊາຊົນຕາມທິດສັງຄົມນິຍົມ, ເຮັດໃຫ້ປະເທດຊາດມີສະຖຽນລະພາບ, ເສດຖະກິດ-ສັງຄົມມີການຂະຫຍາຍຕົວດ້ວຍຄວາມໝັ້ນທ່ຽງ, ລະ ບອບການເມືອງມີຄວາມໝັ້ນຄົງ, ປະເທດຊາດໄດ້ຮັບການ ພັດທະນາຢ່າງບໍ່ຢຸດຢັ້ງ, ຊີວິດການເປັນຢູ່ຂອງປະຊາຊົນນັບມື້ນັບໄດ້ຮັບການປົວແປງດີຂຶ້ນ,ບົດບາດອິດທິພົນຂອງພັກ ແລະ ຂອງປະເທດເຮົານັບມື້ສູງເດັ່ນຂຶ້ນໃນເວທີສາກົນ. ໃນຕະຫຼອດໄລຍະຜ່ານມາ, ສະຫາຍ ບຸນຍັງ ວໍລະຈິດ ພ້ອມດ້ວຍໝູ່ຄະນະໄດ້ປະກອບສ່ວນຢ່າງຕັ້ງໜ້າເຂົ້າໃນການເພີ່ມພູນຄູນສ້າງຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງລາວ-ຫວຽດນາມ,ສາມັກຄີແໜ້ນແຟ້ນ ແລະ ການຮ່ວມມືຮອບດ້ານລະ ຫວ່າງລາວ-ຈີນ ກໍຄືເພີ່ມທະວີຄວາມສາມັກຄີກັບບັນດາປະເທດເພື່ອນມິດຍຸດທະສາດ ແລະສາມັກຄີກັບບັນດາປະເທດທີ່ຮັກຫອມສັນຕິພາບໃນໂລກ.

  ສະຫາຍເລຂາທິການໃຫຍ່ ທອງລຸນ ສີສຸລິດ ຍັງໄດ້ສະແດງຄວາມເຄົາລົບນັບຖືຢ່າງສູງມາຍັງ ສະຫາຍ ບຸນຍັງ ແມ່ນຜູ້ນຳອາວຸໂສທີ່ໄດ້ມີຜົນງານປະກອບສ່ວນຢ່າງສຳ ຄັນເຂົ້າໃນການປັບປຸງກໍ່ສ້າງພັກປະຊາຊົນປະຕິວັດລາວ, ລັດປະຊາທິປະໄຕປະຊາຊົນລາວ, ກອງທັບປະຊາຊົນ ແລະແນວໂຮມແຫ່ງຊາດຂອງພວກເຮົາ; ພັກ, ລັດ ແລະປະ ຊາຊົນເຮົາມີຄວາມເອກອ້າງທະນົງໃຈເປັນຢ່າງຍິ່ງທີ່ໄດ້ມີຜູ້ນຳທີ່ສະຫຼາດສ່ອງໃສ, ປີຊາສາມາດ; ພວກເຮົາຮຸ່ນສືບທອດຂໍສະແດງຄວາມຮູ້ບຸນຄຸນຢ່າງລົ້ນເຫຼືອ ແລະຈົດຈຳລໍ້າລຶກຜົນງານ, ຄຸນງາມຄວາມດີອັນໃຫຍ່ຫຼວງຂອງສະຫາຍ ບຸນຍັງ ວໍລະຈິດ ຈົນເທົ່າໃດໆ; ພ້ອມກັນນັ້ນພວກເຮົາຈະສືບຕໍ່ຮໍ່າຮຽນ, ເສີມຂະຫຍາຍມູນເຊື້ອປະ ຕິວັດອັນເດັດດ່ຽວ ແລະ ແບບຢ່າງອັນໃສແຈ້ງຂອງສະຫາຍ,ພ້ອມກັນສາມັກຄີພາຍໃນໃຫ້ແໜ້ນແຟ້ນ,ນໍາເອົາພາລະກິດປ່ຽນແປງໃໝ່ກ້າວຂຶ້ນຢ່າງໜັກແໜ້ນຕາມຈຸດ ໝາຍສັງຄົມນິຍົມ. ຕາງໜ້າບັນດາສະຫາຍຜູ້ແທນກອງປະຊຸມໃຫຍ່ ແລະ ຄະນະບໍລິຫານງານສູນກາງພັກສະໄໝທີ XI ຂໍອວຍພອນໃຫ້ສະຫາຍຈົ່ງມີສຸຂະພາບເຂັ້ມແຂງ, ອາຍຸໝັ້ນຍືນ, ສືບຕໍ່ຕິດຕາມໃຫ້ຄວາມຕັກເຕືອນສັ່ງສອນພະນັກງານຮຸ່ນສືບທອດ, ພະນັກງານສະມາຊິກພັກ ແລະປະຊາຊົນບັນດາເຜົ່າເພື່ອນຳພາປະເທດຊາດກ້າວຂຶ້ນສູ່ຈຸດໝາຍສັງຄົມນິຍົມເທື່ອລະກ້າວຕາມພັກເຮົາກຳນົດໄວ້.

----------

ໂດຍ: ຣັດສະໝີ ດວງສັດຈະ

ຮູບພາບ: ໜັງສືພິມເສດຖະກິດ-ສັງຄົມ

แชร์