ຖວທ ໄຊຍະ ເຊື່ອມຊຶມເອກະສານເລືອກຕັ້ງສະມາຊິກສະພາ

  ພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວແຂວງໄຊຍະບູລີໄດ້ຈັດຕັ້ງການເຊື່ອມຊຶມເອກະສານທີ່ສໍາຄັນຕ່າງໆກ່ຽວກັບການເລືອກຕັ້ງສະມາຊິກສະພາໃຫ້ແກ່ສະມາຊິກພັກພະນັກງານ-ລັດຖະກອນຂຶ້ນໃນວັນທີ 14 ມັງກອນ 2021 ທີ່ຫ້ອງປະຊຸມພະແນກ ຖວທ ແຂວງ, ເຂົ້າຮ່ວມໃນການເຊື່ອມຊຶມເອກະສານສໍາຄັນຄັ້ງນີ້ມີ ທ່ານນາງ ບົວຈັນ ພັນທະວົງ ຫົວ ໜ້າພະແນກ ຖວທ ແຂວງ, ມີຄະ ນະພະແນກ, ຫົວໜ້າ, ຮອງຫົວໜ້າຂະແໜງການ, ກອງວິຊາການ, ສະມາຊິກພັກພະນັກງານ-ລັດຖະ ກອນເຂົ້າຮ່ວມ.
  ໃນພິທີ ທ່ານນາງ ບົວຈັນ ພັນທະວົງຫົວໜ້າພະແນກ ຖວທ ແຂວງ ໄຊຍະບູລີ ແລະທ່ານ ບຸນທະວີ ບຸນຊູຮັກຮອງຫົວໜ້າພະແນກໄດ້ຂຶ້ນເຜີຍແຜ່ 4 ເອກະສານທີ່ສໍາຄັນເຊັ່ນ: ເອກະສານການເລືອກຕັ້ງສະມາຊິກສະພາແຫ່ງຊາດຊຸດທີ IX ແລະສະພາປະຊາຊົນແຂວງ ຊຸດທີ II, ເອກະສານເສີມຂະຫຍາຍ ສິດເປັນເຈົ້າຂອງປະຊາຊົນເຂົ້າໃນການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະສະພາປະຊາຊົນແຂວງ ຊຸດທີ II, ເຜີຍແຜ່ຄໍາສັ່ງແນະນໍາວ່າດ້ວຍການເພີ່ມທະວີການນໍາພາຊີ້ນໍາການກະກຽມ ແລະການສ້າງຂະບວນການຮອບດ້ານຂໍ່ານັບຮັບຕ້ອນກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກ, ເຜີຍແຜ່ມະຕິຂອງຄະນະປະຈໍາພັກແຂວງວ່າດ້ວຍການເພີ່ມທະວີການຊີ້ນໍາ-ນໍາພາ ຂອງຄະນະພັກຕໍ່ການເລືອກຕັ້ງສະມາຊິກສະພາແຫ່ງຊາດຊຸດທີ IX ແລະ ສະພາປະຊາຊົນແຂວງຊຸດທີ II.
  ຈຸດປະສົງກໍເພື່ອເປັນການສຶກສາອົບຮົມໃຫ້ສະມາຊິກພັກພະນັກງານໃຫ້ຮັບຮູ້ເຂົ້າໃຈກ່ຽວກັບສິດເປັນເຈົ້າໃຫ້ສູງຂຶ້ນ, ມີຄວາມຕື່ນຕົວ ແລະເປັນເຈົ້າການນໍາໃຊ້ສິດເປັນເຈົ້າຂອງຕົນເຂົ້າໃນການເລືອກຕັ້ງສະມາຊິກສະພາແຫ່ງຊາດຊຸດທີ IX ແລະສະພາປະຊາຊົນແຂວງຊຸດທີ II ໃຫ້ໄດ້ຕາມລະດັບຄາດໝາຍ 100% ການເລືອກຕັ້ງໃນຄັ້ງນີ້ແມ່ນການສືບຕໍ່ສ້າງ ແລະບູລະນະລະບອບປະຊາທິປະໄຕປະຊາຊົນ ໂດຍສະເພາະແມ່ນການປັບປຸງບູລະນະສະພາແຫ່ງຊາດ ແລະສະພາປະຊາຊົນແຂວງ ໃນຖານະເປັນອົງການອໍານາດລັດ ໜຶ່ງໃນລະບົບການເມືອງຂອງ ສປປ ລາວ ໃຫ້ນັບມື້ນັບເຂັ້ມແຂງ ສະນັ້ນການຄັດເລືອກເອົາຕົວແທນແຫ່ງສິດ ແລະຜົນປະໂຫຍດຂອງປະຊາຊົນລາວບັນດາເຜົ່າເຂົ້າໃນສະພາແຫ່ງຊາດ ແລະສະພາປະຊາຊົນແຂວງແມ່ນໜ້າທີ່ ແລະຄວາມຮັບຜິດຊອບຂອງທົ່ວພັກ, ທົ່ວລັດ, ທົ່ວກອງທັບ ແລະທົ່ວປວງຊົນລາວທັງຊາດ.

----

ຂ່າວ: ບຸນທີ

แชร์