ໃຊ້ເກືອບ 90 ລ້ານກີບ ສ້າງເສັ້ນທາງເຂົ້າ ມຕ ບ້ານໂພນສະອາດ

  ຍ້ອນເຫັນໄດ້ຄວາມສໍາຄັນໃນການພັດທະນາໂຮງຮຽນກໍຄືເສັ້ນທາງເຂົ້າຫາໂຮງຮຽນມັດທະຍົມຕົ້ນບ້ານໂພນສະອາດນະຄອນຫຼວງພະບາງຍັງພົບຄວາມລໍາບາກທາງໂຮງຮຽນ ແລະອໍານາດການປົກຄອງບ້ານຈຶ່ງໄດ້ສູ້ຊົນໃນການຊອກຫາແຫຼ່ງທຶນເພື່ອມາພັດທະນາສ້າງເປັນທາງເບຕົງເຂົ້າຫາໂຮງຮຽນໃນມູນຄ່າ 87 ລ້ານກວ່າກີບ ເພື່ອໃຫ້ມີຄວາມສະດວກສະບາຍຂອງນັກຮຽນ ແລະຊາວບ້ານຫຼາຍຂຶ້ນ. 

 ທ່ານ ນາງ ສົມຈັນ ມະນີວົງ ອຳນວຍການໂຮງຮຽນດັ່ງກ່າວໃຫ້ສຳພາດຕໍ່ທີມຂ່າວພວກເຮົາວ່າ: ເພື່ອສືບຕໍ່ຈັດຕັ້ງປະຕິບັດແຜນພັດທະນາໂຮງຮຽນປະຈຳສົກປີ 2021 ໃຫ້ບັນລຸຄາດໝາຍທີ່ວາງໄວ້ທາງຄະນະອໍານວຍການໄດ້ສົມທົບກັບອົງການຈັດຕັ້ງບ້ານ ແລະພາກສ່ວນທີ່ກ່ຽວຂ້ອງໄດ້ສູ້ຊົນໃນການ ຊອກຫາແຫຼ່ງທຶນເພື່ອມາພັດທະນາໂຮງຮຽນ ແລະທາງເຂົ້າໂຮງຮຽນເພື່ອໃຫ້ນ້ອງນັກຮຽນໄດ້ມີຄວາມສະດວກສະບາຍເວລາໄປໂຮງຮຽນ.

  ໃນທີ່ສຸດທາງໂຮງຮຽນກໍໄດ້ທຶນຈາກຫ້ອງການສຶກສາທິການ ແລະກີລານະ ຄອນຫຼວງພະບາງ ສົມທົບໃສ່ທຶນຂອງ ປະຊາຊົນບ້ານ ແລະສະມາຄົມພໍ່ແມ່ນັກຮຽນເພື່ອປັບປຸງທາງເຂົ້າໃຫ້ເປັນທາງເບຕົ່ງເສີມເຫຼັກຊຶ່ງລວມມູນຄ່າທັງໝົດ 87 ລ້ານກວ່າກີບໃນນີ້, ທຶນລັດມອບໃຫ້ 50% ແລະທຶນສົມທົບ 50%. ໂດຍແມ່ນບໍລິສັດ ເບຕົງເຫຼວ ບຸນລັດ ເປັນຜູ້ຮັບເໝົາກໍ່ສ້າງຊຶ່ງໄດ້ເລີ່ມລົງມືກໍ່ສ້າງມາແຕ່ວັນທີ 5 ມັງກອນ 2021ເປັນຕົ້ນມາ, ເສັ້ນທາງມີຄວາມຍາວປະ ມານ 100 ແມັດ, ກວ້າງ 6 ແມັດ ແລະເທເບຕົງໜາ 15 ຫາ 20 ຊັງຕີ, ມາຮອດປະຈຸບັນແມ່ນສໍາເລັດແລ້ວ 60% ຄາດວ່າຈະໃຫ້ສຳເລັດ ແລະມີການມອບ-ຮັບໃນທ້າຍເດືອນມັງກອນນີ້.

 ທ່ານອຳນວຍການໂຮງຮຽນມັດທະຍົມຕອນຕົ້ນບ້ານໂພນສະອາດກ່າວຕື່ມອີກວ່າພາຍຫຼັງສຳເລັດທາງໂຮງຮຽນຈະໄດ້ສົມທົບກັບພາກສ່ວນທີ່ກ່ຽວຂ້ອງເພື່ອສືບຕໍ່ຕິດປ້າຍຊີ້ບອກ, ປ້າຍຫ້າມ ແລະ ສິ່ງຈໍາເປັນອື່ນໆ ເພື່ອຮັບປະກັນບໍ່ໃຫ້ເກີດອຸບັດເຫດ ແລະ ເຮັດໃຫ້ການນຳໃຊ້ເສັ້ນທາງດັ່ງກ່າວນໍາໃຊ້ໄດ້ຢ່າງຍາວນານໃນການອຳນວຍຄວາມສະດວກໃຫ້ກັບນ້ອງນັກຮຽນ ແລະປະຊາຊົນເຂດບ້ານດັ່ງກ່າວ.

-------------

ຂ່າວ: ສີສຸວັນ, ຮູບພາບ: ໜັງສືພິມເສດຖະກິດ-ສັງຄົມ

แชร์