ຜົນສຳເລັດແກ້ທຸກຍາກປະຊາຊົນບ້ານຄຳປ່າແໜ ແລະບ້ານປ່າກ້ວຍ

  ໃນໂອກາດເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງ ພັກປະຊາຊົນປະຕິວັດລາວທ່ານ ເກຍ ອູ໊ສິດທິເດດ ເຈົ້າຂອງໂຮງງານຜະລິດນໍ້າດື່ມ ແລະນໍ້າກ້ອນໂລມາຄຳໄດ້ປະກອບຄຳເຫັນຕໍ່ກອງປະຊຸມດັ່ງກ່າວໃນຫົວຂໍ້ “ການມີສ່ວນຮ່ວມຂອງພາກທຸລະກິດເອກະຊົນໃນການແກ້ໄຂຄວາມທຸກຍາກຂອງປະຊາຊົນຢູ່ບ້ານຄຳປ່າແໜ ເມືອງຊົນນະບູລີ ແລະບ້ານປ່າກ້ວຍ ເມືອງຈຳພອນ ແຂວງສະຫວັນນະເຂດ”.

  ທ່ານ ເກຍ ອູ໊ສິດທິເດດ ກ່າວວ່າ: ບ້ານຄຳປ່າແໜ ແລະບ້ານປ່າກ້ວຍມີທັງໝົດ 261 ຄອບຄົວ, ມີ 1.528 ຄົນເປັນເຂດຊົນນະບົດ, ດິນປ່າໂຄກປົນຊາຍ, ຫີນແຮ່, ແຫ້ງແລ້ງ ແລະຂາດແຫຼ່ງນໍ້າ,ການດຳລົງຊີວິດຂອງປະຊາຊົນຈຳນວນໜຶ່ງເຮັດນາປູກເຂົ້າແຕ່ບໍ່ກຸ້ມກິນ ແລະອີກຈຳນວນໜຶ່ງອາໄສການຂໍທານລ້ຽງຊີບມາແຕ່ດົນ, ໂດຍປະຕິບັດຕາມມະຕິກອງປະຊຸມໃຫຍ່ຄັ້ງທີ X ຂອງພັກ, ມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກແຂວງສະຫວັນນະເຂດ ແລະ ອີງຕາມໜັງສືປຸກລະດົມຂໍການຊ່ວຍເຫຼືອນຳພາກສ່ວນທຸລະກິດຂອງທ່ານເຈົ້າເມືອງຈຳພອນໂດຍການເຫັນດີຂອງທ່ານເຈົ້າແຂວງ,ຕົນເອງຍິນດີໃຫ້ການຊ່ວຍເຫຼືອຊຶ່ງການຊ່ວຍເຫຼືອໃນໄລຍະທີ 1 ປີ 2016 ມີ 27 ຄອບຄົວ, ໄລຍະທີ 2 ປີ 2017-2018 ເພີ່ມອີກ 50 ຄອບຄົວ ໃນ 3 ປີ ລວມມີ 77 ຄອບຄົວ ມີ 482 ຄົນ.

 ໃນໄລຍະ 3 ປີຜ່ານມາສິ່ງທີ່ໄດ້ປະຕິບັດໃຫ້ກັບປະຊາຊົນທັງ 2 ບ້ານຄື: ເບື້ອງຕົ້ນສ້າງຕັ້ງກອງທຶນເຂົ້າກິນ, ໃຫ້ອາຫານການກິນ, ເຄື່ອງນຸ່ງຫົ່ມ, ເຄື່ອງໃຊ້ຄົວເຮືອນ, ເຄື່ອງມື ແລະກົນຈັກຮັບໃຊ້ການຜະລິດ, ພາຫະນະບໍລິຫານ, ຈັດສັນດິນໃຫ້ 36 ຄອບຄົວ ເປົ້າໝາຍທີ່ຢູ່ກະແຈກກະຈາຍໄດ້ເຂົ້າມາໂຮມຢູ່ບ້ານໃຫຍ່ພ້ອມທັງປຸກສ້າງເຮືອນເຄີ່ງຖາວອນໃຫ້, ສ້ອມແປງຕໍ່ເຕີມເຮືອນທັງ 2 ບ້ານ 82 ຫຼັງ, ເຈາະນໍ້າບາດານໄດ້ 141 ບໍ່, ເຮັດສວນປູກຜັກໄດ້ 108 ຕອນ, ແນວພັນຜັກ 28 ຊະນິດ, ເຮັດຝຸ່ນບົ່ມໄດ້ 995 ໂຕນ, ຈັດສັນດິນບຸກເບີກເຮັດນາໃໝ່ 200 ກວ່າເຮັກຕາ ໃຫ້111 ຄອບຄົວ, ປັບນາເກົ່າຄືນ 24,2 ເຮັກຕາ, ຈົກໜອງສະໃຫຍ່ 117 ໜອງ ໃຫ້ 85 ຄອບຄົວ, ໃຫ້ແນວພັນສັດລ້ຽງເປັນຕົ້ນແບ້, ໝູ, ເປັດ, ໄກ່, ຫອຍ, ປາ ແລະອື່ນໆຜົນຜະລິດຂອງປະຊາຊົນທັງສອງບ້ານທີ່ເກັບກູ້ໄດ້ ແລະຫາມາໄດ້ເຫຼືອກິນແລ້ວໂຄງການຮັບເກັບຊື້ທັງໝົດ, ນອກນັ້ນຍັງມີກິດຈະກຳອື່ນໆ ອີກຈຳນວນໜຶ່ງ.

  ທ່ານ ເກຍ ອູ໊ສິດທິເດດ ກ່າວຕື່ມວ່າ: ການຊ່ວຍເຫຼືອໃນໄລຍະ 3 ປີ ຂອງຂ້າພະເຈົ້າພ້ອມດ້ວຍໜ່ວຍງານຮ່ວມກັບອົງການຈັດຕັ້ງພັກ-ລັດ ພ້ອມກັນຈັດຕັ້ງປະຕິບັດເຮັດບັນລຸໜ້າວຽກທີ່ເຊັນໄວ້ໃນບົດບັນທຶກ, ສ້າງພື້ນຖານການຜະລິດຫຼາຍສິ່ງຫຼາຍຢ່າງ, ເກີດມີໜໍ່ແໜງຄວາມສົມດຸນທາງດ້ານນິເວດດີຂຶ້ນກໍ່ໃຫ້ເກີດວົງຈອນຂອງຊີວິດນາໆພັນພາຍໃນທ້ອງຖິ່ນດັ່ງກ່າວ,ເປັນເງື່ອນໄຂສະດວກໃນການທຳມາຫາກິນ,ປະຊາຊົນສ່ວນຫຼາຍໄດ້ຫັນປ່ຽນພຶດຕິກຳການດຳລົງຊີວິດແບບເກົ່າ,ຄອງເດີມ,ເລື່ອນລອຍໄດ້ຫັນມາເປັນເຈົ້າການອອກແຮງງານເຮັດກິນຢູ່ກັບທີ່, ດ້ວຍຄວາມຮູ້ສຶກເປັນເຈົ້າຂອງຊັບສິນຫຼາຍສິ່ງ, ຫຼາຍຢ່າງເປັນຂອງຕົນເອງທີ່ເມື່ອກ່ອນພວກເພີ່ນບໍ່ເຄີຍມີ.

  ທ່ານ ເກຍ ອູ໊ສິດທິເດດ ກ່າວຕື່ມອີກວ່າ: ໃນນາມສ່ວນຕົວ ແລະຕາງໜ້າໃຫ້ໜ່ວຍງານ, ຂ້າພະເຈົ້າມີຄວາມຮູ້ສຶກພາກພູມໃຈທີ່ໄດ້ມີສ່ວນຮ່ວມນຳອົງການຈັດຕັ້ງຂອງພັກ-ລັດ ໃນການແກ້ໄຂຄວາມທຸກຍາກຂອງປະຊາຊົນເຖິງວ່າຈະເປັນໂຄງການຂະໜາດນ້ອຍ, ມີມູນຄ່າໜ້ອຍແຕ່ກໍ່ແມ່ນນໍ້າໃຈ,ການປະກອບສ່ວນຕາມກຳລັງແຮງທາງດ້ານວັດຖຸແລະຈິດໃຈຂອງຕົນ,ຊຶ່ງປະຈຸບັນຕົນເອງກໍ່ຍັງສືບຕໍ່ປະກອບສ່ວນໃນການແກ້ໄຂຄວາມທຸກຍາກຂອງປະຊາຊົນຢູ່ 2 ບ້ານ ຢູ່ເມືອງນອງ ແຂວງສະຫວັນນະເຂດ ໂດຍມີຊື່ໂຄງການວ່າ: “ໂຄງການຮ່ວມໃຈສາຍໄຍໂລມາຄຳ” ເປັນໂຄງການຮ່ວມທຶນລະຫວ່າງຂ້າພະເຈົ້າກັບ ທ່ານ ສາຍສະໝອນ ກວານເມືອງຈັນ ເພື່ອປະກອບສ່ວນສ້າງເງື່ອນໄຂໃຫ້ເມືອງນອງໄດ້ພົ້ນທຸກໃນຕໍ່ໜ້າ.

แชร์