ໄຊສົມບູນ ສ້າງລາຍຮັບເພີ່ມ 117,10%

  ແຂວງໄຊສົມບູນ ເປັນເຂດຊົນະບົດພູດອຍ, ຫ່າງໄກ ແລະສອກຫຼີກ; ປະຊາຊົນບັນດາເຜົ່າຈຳນວນບໍ່ໜ້ອຍຍັງມີຄວາມທຸກຍາກ, ການດຳລົງຊີວິດຕິດພັນກັບທຳມະ ຊາດ, ໃນເມື່ອກ່ອນພວກອິດທິກຳລັງປໍລະປັກ ແລະກຸ່ມຄົນບໍ່ດີໄດ້ເຄື່ອນໄຫວກໍ່ຄວາມບໍ່ສະຫງົບໃນຫຼາຍດ້ານ, ພວກເຂົາໄດ້ນຳໃຊ້ກົນອຸບາຍຫັນປ່ຽນຫຼາຍຮູບແບບລວມທັງພະຍາຍາມປຸກລະດົມຂົນຂວາຍປະຊາຊົນຜູ້ທີ່ບໍ່ຮູ້ເທົ່າເຖິງການຄັວດເລິກບັນຫາທີ່ເປັນບ່ອນອ່ອນຂອງພວກເຮົາເພື່ອສ້າງກະແສແນວຄິດທີ່ຜິດເຂວກໍ່ໃຫ້ເກີດໜໍ່ແໜງຄວາມບໍ່ສະຫງົບຊຶ່ງສ້າງສິ່ງກີດຂວາງໃຫ້ແກ່ການພັດທະນາເສດຖະກິດ-ສັງຄົມຂອງທ້ອງຖິ່ນ.

 ສະຫາຍ ພົນຕີ ຄຳລຽງ ອຸທະໄກສອນ ເລຂາຄະນະພັກເຈົ້າແຂວງໄຊສົມບູນໄດ້ປະກອບຄຳເຫັນຕໍ່ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກໃນວັນທີ 13 ມັງກອນ 2021ມີບາງຕອນວ່າ: ອົງຄະນະພັກແຂວງໄຊສົມບູນໄດ້ຈັດຕັ້ງຜັນຂະຫຍາຍມະຕິ 055/ກມສພ ວ່າດ້ວຍການຮັບຮອງເອົາແນວຄິດຍຸດທະສາດໃນການປົກປັກຮັກສາ ແລະສ້າງສາພັດທະນາແຂວງໄຊສົມບູນ ແລະດຳລັດ ເລກທີ 414/ລບ ເປັນບ່ອນອີງຊຶ່ງໃນຜ່ານມາໄດ້ສຸມໃສ່ສຶກສາອົບຮົມການເມືອງແນວຄິດໃຫ້ປະຊາຊົນ ຢ່າງແຂງແຮງເຮັດໃຫ້ປະຊາຊົນບັນດາເຜົ່າມີຄວາມເຂົ້າໃຈແຈ້ງຕໍ່ແນວທາງ, ເພີ່ມຄວາມເຊື່ອໝັ້ນຕໍ່ການນຳພາຂອງພັກ, ຕີຖອຍໄດ້ແນວຄິດທີ່ເຂົ້າໃຈທີ່ບໍ່ຖືກຕ້ອງຕໍ່ລະ ບອບ,ຕໍ່ອຸດົມການຂອງພັກອັນໄດ້ເຮັດໃຫ້ປະຊາຊົນບັນດາເຜົ່າເຂົ້າຮ່ວມວຽກງານປກຊ-ປກສ ຫຼາຍຂຶ້ນ ແລະອຳນາດການປົກຄອງທຸກຂັ້ນ-ປະຊາຊົນທຸກຊັ້ນຄົນໄດ້ຍູ້ແຮງການພັດທະນາເສດຖະກິດ-ສັງຄົມໂດຍຖືເອົາການພັດທະນາພື້ນຖານໂຄງລ່າງທີ່ຈຳເປັນເພື່ອກະຕຸ້ນການພັດທະນາຂະແໜງການອື່ນ,ແກ້ໄຂຄວາມທຸກຍາກຂອງປະຊາ ຊົນເປັນໜ້າທີ່ຈຸດສຸມເຮັດໃຫ້ທົ່ວແຂວງມີຄວາມສະຫງົບປອດໄພດີຂຶ້ນເປັນກ້າວໆ.

  ອົງຄະນະພັກແຂວງໄດ້ແຕ່ງຕັ້ງຄະນະສະເພາະກິດຂັ້ນແຂວງສົມທົບຄະນະວິທະຍາສາດຂອງຄະນະຮັບຜິດຊອບພັດທະນາເຂດໃຈກາງລົງສູ່ປະຊາຊົນເພື່ອໃຫ້ຄວາມຮູ້ ແລະຊຸກຍູ້ສົ່ງເສີມການແລິດເປັນສິນຄ້າ (ການປູກ-ການລ້ຽງ) ຕິດພັນກັບການຈັດສັນພູມລຳເນົາ, ອາຊີບຄົງທີ່ໃຫ້ປະຊາຊົນທີ່ທຸກຍາກ ແລະສາມາດແກ້ໄຂຄວາມທຸກ ຍາກຂອງປະຊາຊົນໄດ້ຈຳນວນໜຶ່ງ,ສ້າງກົນໄກ ແລະນະໂຍບາຍເປັນເງື່ອນໄຂປຸກລະດົມ, ດຶງດູດການລົງທຶນທັງພາຍໃນ ແລະຕ່າງປະເທດເຂົ້າມາລົງທຶນນັບມື້ຫຼາຍຂຶ້ນໂດຍສະເພາະລົງທຶນໃສ່ 5 ຂະແໜງທີ່ເປັນທ່າແຮງຂອງແຂວງໃນນີ້ມີກະສິກຳ, ໄຟຟ້າ, ບໍ່ແຮ່, ທ່ອງທ່ຽວ ແລະການເຊື່ອມໂຍງ-ເຊື່ອມຈອດ.

 ມາຮອດປະຈຸບັນ, ມີການລົງທຶນ 44 ໂຄງການ ໃນນີ້ກະສິກຳ ແລະທ່ອງທ່ຽວຂະແໜງລະ 4 ໂຄງການ, ບໍ່ແຮ່ 8 ໂຄງການ ແລະພະລັງງານມີ 28 ໂຄງການ. ບັນ ຫາພົ້ນເດັ່ນ,ເສດຖະກິດຂອງແຂວງມີການຂະຫຍາຍຕົວສະເລ່ຍ 7% ຕໍ່ປີ, ໃນເມື່ອກ່ອນເກັບລາຍຮັບບໍ່ພຽງພໍກັບການໃຊ້ຈ່າຍ; ແຕ່ມາຮອດ 2019-2020ສາມາດເກັບລາຍຮັບເພີ່ມຂຶ້ນເປັນ 117,10% ຕາມການແບ່ງຂັ້ນຄຸ້ມຄອງຕາມທິດເປັນແຂວງທີ່ມີຄວາມສາມາດກຸ້ມຕົນເອງ.

-------------

ຂ່າວ: ຣັດສະໝີ ດວງສັດຈະ  

ຮູບພາບ: ໜັງສືພິມເສດຖະກິດ-ສັງຄົມ

แชร์