ຄຶກຄັກງານວາງສະແດງຜະລິດຕະພັນ ເຟີນີເຈີໄມ້ລາວ

 ງານວາງສະແດງຜະລິດຕະພັນເຟີນີເຈີໄມ້ລາວ ຄັ້ງທີ 7 ປະຈຳປີ 2021 ພາຍຫຼັງທີ່ໄດ້ດໍາເນີນມາແຕ່ວັນທີ 9 ມັງກອນ ເປັນຕົ້ນມາຖືໄດ້ວ່າຮັບຄວາມສົນໃຈເປັນຢ່າງຍິ່ງຈາກບັນດາພໍ່ແມ່ປະຊາຊົນລາວທີ່ມາເດີນທ່ຽວຊົມທັງນີ້ແມ່ນເນື່ອງຈາກບັນດາໂຮງງານໄດ້ນຳສິນຄ້າສວຍງາມຫຼາກຫຼາຍກວ່າ 1 ພັນລາຍການເຂົ້າຮ່ວມແໜ້ນລາວ-ໄອເຕັກຊຶ່ງໄດ້ສ້າງສີສັນກໍຄືບັນຍາກາດການຈຳໜ່າຍສິນຄ້າພາຍໃນໄລຍະຜ່າວິກິດໂຄວິດ-19 ໄດ້ເປັນຢ່າງດີ.

 ທ່ານ ກອງມາລາ ພົມມາໄລ ຮອງປະທານສະມາຄົມ ເຟີນີເຈີລາວ ທັງເປັນຜູ້ຊີ້ນຳວຽກງານຈັດວາງສະແດງເຈົ້າຂອງໂຮງງານເຄແອນບີເຟີນີເຈີກ່າວວ່າ: ການຈັດງານຄັ້ງນີ້ແມ່ນສືບຕໍ່ຈາກຄັ້ງຜ່ານມາໂດຍໃນປີ 2020 ໄດ້ມີການໂຈະຍ້ອນສະພາບການລະບາດຂອງພະຍາດໂຄວິດ-19 ແຕ່ພາຍຫຼັງລັດຖະບານໄດ້ມີຜົນສຳເລັດໄລຍະທຳ ອິດໃນການຄວບຄຸມກໍໄດ້ອະນຸຍາດໃຫ້ສືບຕໍ່ການຈັດວາງສະແດງແນວໃດກໍດີເຖິງເປັນຊ້ວງຜ່າວິກິດແຕ່ກໍບໍ່ເປັນອຸປະສັກຍິ່ງເຕັມໄປດ້ວຍໂອກາດຂອງຕະຫຼາດພາຍໃນເປັນການສົ່ງເສີມລາວເຮັດລາວໃຊ້ ແລະການຈັດງານແມ່ນຖືກໄລຍະເລີ່ມຕົ້ນຂອງປີ 2021 ທີ່ມີຫຼາຍເທສະການຂອງລາວໂດຍສະເພາະຂຶ້ນເຮືອນໃໝ່ຈຶ່ງເຮັດໃຫ້ບັນດາສິນຄ້າເຟີນີເຈີໄມ້ທີ່ບັນດາໂຮງງານນຳເຂົ້າມາວາງສະແດງຫຼາຍກວ່າທຸກຄັ້ງຜ່ານມາແມ່ນໄດ້ຮັບຄວາມສົນໃຈຫຼາຍສົມຄວນຈາກບັນດາຜູ້ຄົນທີ່ມາເດີນທ່ຽວຊົມມີທີ່ເພີ່ມຂຶ້ນໃນແຕ່ລະມື້.

  ຈາກໝາກຜົນຄວາມສົນໃຈດັ່ງກ່າວໄດ້ເຮັດໃຫ້ຍອດຈຳໜ່າຍສິນຄ້າຮອດເວລານີ້ແມ່ນທະລຸແລ້ວ 50% ຂອງມູນຄ່າທີ່ຕັ້ງໄວ້ໃນເບື້ອງຕົ້ນ 10 ຕື້ກີບ ເປັນຕົ້ນແມ່ນຕູ້, ໂຕະຕ້ອນຮັບແຂກ,ຕຽງ,ຕັ່ງນັ່ງ, ໂຕະຊຸດກິນເຂົ້າ,ເຄື່ອງແກະສະຫຼັກຫັດຖະກຳໃຊ້ສອຍ ແລະລວດລາຍຕ່າງໆຈາກເສດໄມ້ກາຍເປັນຜະລິດຕະພັນສວຍງາມແມ່ນສິນຄ້າທີ່ໄດ້ຂາຍດີຊຶ່ງເປັນໜຶ່ງຄວາມສຳເລັດຂອງສະມາຊິກສະມາຄົມເຟີນີເຈີໃນງານຄັ້ງນີ້.

   ທ່ານ ກອງມາລາ ພົມມະໄລ ກ່າວຕື່ມວ່າ: ສະເພາະໂຮງງານເຄແອນບີເຟີນີເຈີຂອງຂ້າພະເຈົ້າເອງແມ່ນໄດ້ຖືສຳຄັນຫຼາຍກັບງານຄັ້ງນີ້ ແລະກໍມີຄວາມພູມໃຈທີ່ໄດ້ນຳ ເອົາຜະລິດຕະພັນຕ່າງໆພ້ອມໃໝ່ອ່ຽມມາວາງສະແດງຫຼາຍສີບລາຍການຊຶ່ງເຕັມໄປດ້ວຍຄຸນນະພາບ ແລະຄວາມສວຍງາມແຕກຕ່າງຈາກປີກ່ອນໆ.

  ທ່ານ ສຸບິນ ເຈົ້າຂອງສຸບິນ ເຟີນີເຈີ ໜຶ່ງໃນສະມາຊິກສະມາຄົມທີ່ເປັນໂຮງງານຈາກເມືອງລະຄອນເພັງ ແຂວງສາລະວັນ ກ່າວວ່າ: ໂຮງງານຂອງຕົນສ້າງຕັ້ງຂຶ້ນໃນປີ 2015 ຈາກການເຫັນຄຸນຄ່າຂອງເສດໄມ້ປະດິດໃຫ້ກາຍມາເປັນສິນຄ້າເຟີນີເຈີທີ່ສວຍງາມ ແລະການເຂົ້າຮ່ວມງານນີ້ແມ່ນເປັນຄັ້ງທີ 2 ແລ້ວ ຊຶ່ງໄດ້ມີການຫຼຸດລາຄາ ຊຶ່ງເຫັນວ່າໄດ້ຮັບຄວາມສົນໃຈຈາກລູກຄ້າເໝືອຄັ້ງຜ່ານມາ.

   ທ່ານ ອາຈານ ນິດ ຈອມມະນີວົງ ຮອງພະແນກຝຶກອົບຮົມວິຊາຊີບສະຖາບັນພັດທະນາກຳມະບານລາວ ກ່າວວ່າ: ສະຖາບັນຂອງພວກເຮົາແມ່ນຂຶ້ນກັບສູນກາງສະ ຫະພັນກຳມະບານລາວທີ່ມີໜ້າທີ່ພາລະບົດບາດພັດທະນາສີມືແຮງງານໃຫ້ແກ່ຊາວໜຸ່ມ, ກຳມະກອນ ແລະຊາວຜູ້ອອກແຮງງານທີ່ດ້ອຍໂອກາດປະຈຸບັນນີ້ແມ່ນໄດ້ມີການຮ່ວມມືກັບສະມາຄົມເຟີນີເຈີລາວຊຶ່ງການມາຮ່ວມງານນີ້ແມ່ນເປັນຄັ້ງທີ 2 ໂດຍການນຳຜົນງານສືມືຂອງນັກຮຽນທີ່ເຮົາຝຶກມີໂຕະ, ຕັ່ງ, ເຄື່ອງວາງໜັງສືພິມ ຊຶ່ງເປັນການຝຶກແອບຂັ້ນພື້ນຖານຂອງນັກຮຽນໃນການຜະລິດ.

  ທ່ານ ສຸລິກອນ ສີປະເສີດ ເຈົ້າຂອງໂຮງຊ່າງຫັດຖະກຳຄອບຄົວຕົວແບບສຸລິກອນສີປະເສີດຈາກແຂວງອັດຕາປືກ່າວວ່າ: ທຸລະກິດດ້ານນີ້ແມ່ນເກີດຂຶ້ນຈາກຄວາມຮັກມັກຂອຕົນເອງໃນ 4-5 ປີຫຼັງໄດ້ມີໂຄງການຊຸກຍູ້ສົ່ງເສີມ ແລະ ຈັດຝຶກອົບຮົບແລະຕົນກໍເຄີຍເປັນກຳມະກອນມາກ່ອນປະຈຸບັນມີກຳມະກອນ 5 ຄົນ ສິນຄ້າທີ່ຜະລິດ ສ່ວນໃຫຍ່ເປັນບານປະຕູ, ວົງຂົບ, ຕູ້, ຕຽງ ແລະເຄື່ອງແກະສະຫຼັກຕ່າງໆໂດຍຕະຫຼາດແມ່ນເນັ້ນຢູ່ພາຍໃນແຂວງ ແລະງານຄັ້ງນີ້ໄດ້ນຳເອົາສິນຄ້າມາຮ່ວມງານມູນຄ່າ ປະມານ 60 ລ້ານກີບ ແລະຕັງເປົ້າໝາຍການຈຳໜ່າຍໄວ້ 50% ຊຶ່ງຜ່ານການວາງຈຳໜ່າຍແຕ່ມື້ເປີດຮອດເວລານີ້ແມ່ນຮັບຄວາມສົນໃຈສົມຄວນຈາກລູກຄ້າ.

 ແນວໃດກໍດີ ທ່ານ ກອງມາລາ ພົມມາໄລ ຢໍ້າຕື່ມວ່າ: ງານຄັ້ງນີ້ແມ່ນຈັດຂຶ້ນແຕ່ວັນທີ 9-17 ມັງກອນ 2021 ນີ້ທີ່ສູນການຄ້າລາວ-ໄອເຕັກ (ຕຶກເກົ່າ) ໂດຍມີຫ້ອງວາງສະແດງທັງໝົດ 180 ຫ້ອງ ຈາກ 84 ບໍລິສັດທີ່ມາຈາກຕ່າງແຂວງ ແລະນະຄອນຫຼວງວຽງຈັນທີ່ລ້ວນແຕ່ໄດ້ນຳເຄື່ອງເຟີນີເຈີທີ່ຊົງຄຸນຄ່າເຮັດດ້ວຍໄມ້, ຫວາຍ, ໄມ້ປ່ອງ ແລະຈາກວັດສະດຸເສດເຫຼືອຕ່າງໆ, ຜະລິດຕະພັນຫັດຖະກຳ ແລະເຄື່ອງແກະສະຫຼັກ,ເຄື່ອງປະດັບຕົກແຕ່ງ ແລະເອ້ຢ້ອງພາຍໃນເຮືອນ ແລະອື່ນໆຄາດຄະເນຕະຫຼອດງານຈະມີການຈໍລະຈອນຊື້-ຂາຍສິນຄ້າປະມານ 10 ຕື້ກີບ ແລະຈະມີຜູ້ເຂົ້າທ່ຽວຊົມປະມານ 1 ແສນຄົນ.

  ໂດຍຈຸດປະສົງຂອງງານກໍເພື່ອເປັນການຈັດຕັ້ງປະຕິບັດ ແລະ ຜັນຂະຫຍາຍຕາມເນື້ອໃນຈິດໃຈຂອງຂັ້ນເທິງວາງອອກໃຫ້ປາກົດຜົນເປັນຈິງໄປເທື່ອລະກ້າວ, ຜັນຂະ ຫຍາຍຕາມເນື້ອໃນຂອງແຈ້ງການເລກທີ 15/ນຍ, ເພື່ອເປັນການອະນຸລັກຮັກສາປ່າໄມ້, ການນຳໃຊ້ໄມ້ໃຫ້ເກີດຜົນປະໂຫຍດສູງສຸດ ແລະ ມີໄມ້ໄວ້ໃຊ້ຢ່າງຍືນຍົງໂດຍການປຸງແຕ່ງໃຫ້ເປັນຜະລິດຕະພັນສຳເລັດຮູບມາຈາກໄມ້, ຫວາຍ ແລະໄມ້ປ່ອງໃຫ້ມີຫຼາກຫຼາຍຜະລິດຕະພັນຕາມທີ່ສັງຄົມປະຈຸບັນຕ້ອງການ ແລະເປັນທີ່ນິຍົມກັນຢູ່ດ້ວຍການນຳໃຊ້ເຕັກໂນໂລຊີທີ່ທັນສະໄໝແລະທັງເປັນການສ້າງມູນຄ່າເພີ່ມໃຫ້ກັບຜະລິດຕະພັນເຟີນີເຈີລາວໃຫ້ກາຍເປັນສິນຄ້າທີ່ມີຄຸນນະພາບ ແລະ ລາຄາສູງຕາມຄວາມຕ້ອງການຂອງລູກຄ້າ ແລະຍັງເປັນການສ້າງວຽກເຮັດງານທຳໃຫ້ກັບປະຊາຊົນບັນດາເຜົ່າ, ຕ້ານໄພວ່າງງານເພື່ອຜ່ານຜ່າວິດກິດໂຄວິດ-19 ທີ່ກຳລັງລະບາດໃນເວລານີ້ຢູ່ປະເທດໃກ້ຄຽງ ແລະຊ່ວຍໃຫ້ປະຊາຊົນຫຼຸດພົ້ນຈາກຄວາມທຸກຍາກໄດ້ໃນອະນາຄົດ.

 

แชร์