ເຊກອງ ສູ້ຊົນໃຫ້ເສດຖະກິດຂະຫຍາຍຕົວ 7%

  ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງໄດ້ໃຫ້ສຳພາດກັບນັກຂ່າວໃນໂອກາດທີ່ເຂົ້າຮ່ວມກອງປະຊຸມລັດຖະບານຊຸດທີ VIII ເປີດກວ້າງທ້າຍສະໄໝວັນທີ 7-8 ມັງ ກອນຜ່ານມາວ່າ: ແຂວງເຊກອງ ຈະສູ້ຊົນເຮັດໃຫ້ອັດຕາການຂະຫຍາຍຕົວໃຫ້ໄດ້ 7% ຕໍ່ປີ ແລະຮອດປີ 2025 ເຮັດໃຫ້ມູນຄ່າລວມຍອດຜະລິດຕະພັນພາຍໃນ (G DP) ບັນລຸໄດ້ 2.821 ຕື້ກີບ ແລະມີລາຍໄດ້ສະເລ່ຍບັນລຸໄດ້ 20,70 ລ້ານກີບຕໍ່ຫົວຄົນ.

  ທ່ານ ເຫຼັກໄຫຼ ສີວິໄລ ໃຫ້ຮູ້ວ່າ: ໃນໄລຍະ 5 ປີຜ່ານມາອັດຕາການຂະຫຍາຍຕົວຂອງ GDP ສະເລ່ຍ 7,7% ຕໍ່ປີຫຼຸດແຜນ 3,3% (ແຜນ11%) ໃນນັ້ນຂະ ແໜງກະສິກຳ-ໄມ້ສະເລ່ຍ6,77% (ແຜນ 8%),ຂະແໜງອຸດສາຫະກຳ 8,38%(ແຜນ 16,5%) ແລະຂະແໜງການບໍລິການ8,24% (ແຜນ 15,6%) ເນື່ອງຈາກການພັດທະນາເສດຖະກິດຂອງແຂວງເມື່ອທຽບໃສ່ທ່າແຮງບົ່ມຊ້ອນທີ່ເອື້ອອຳນວຍພາຍໃນແຂວງເຫັນວ່າມີການຂະຫຍາຍຕົວຊ້າ, ການຜະລິດເປັນສິນຄ້າຍັງບໍ່ເຂັ້ມແຂງ, ການຜະລິດກະສິກຳ, ອຸດສາຫະກຳປຸງແຕ່ງບໍ່ໄດ້ຄຸນນະພາບ ແລະ ບໍ່ຕິດພັນກັບຕະຫຼາດ. ນອກຈາກນີ້ການຍາດແຍ່ງດຶງດູດການລົງທຶນຂອງພາກເອກະ ຊົນພາຍໃນ ແລະຕ່າງປະເທດຍັງບໍ່ທັນໄດ້ດີ ເທົ່າທີ່ຄວນສ່ວນຫຼາຍໄດ້ແຕ່ນາຍໜ້າບໍ່ທັນແມ່ນຜູ້ລົງທຶນທີ່ແທ້ຈິງ, ການຄຸ້ມຄອງລາຄາສິນຄ້າໝວດສະບຽງອາຫານ ແລະ ສິນຄ້າບໍລິໂພກອື່ນໆຍັງບໍ່ທັນໄດ້ດີ, ການຜະລິດສິນຄ້າບາງປະເພດຍັງມີຂໍ້ຈຳກັດ, ການຊອກຕະຫຼາດຍັງບໍ່ທັນໄດ້ດີ ແລະການຜະລິດກະສິກຳຕິດພັນກັບອຸດສາຫະກຳປຸງແຕ່ງຍັງບໍ່ທັນເປັນຂະບວນເທົ່າທີ່ຄວນ, ພ້ອມກັນນີ້ການແຂ່ງຂັນຂອງຜູ້ຜະລິດພາຍໃນຍັງຕໍ່າ, ຂະໜາດການຜະລິດຍັງນ້ອຍ,ການສະໜອງປັດໄຈການຜະລິດຍັງບໍ່ທັນແຂງແຮງ.

  ເຖິງແນວໃດກໍຕາມເພື່ອຮັບປະກັນເຮັດໃຫ້ອັດຕາການຂະຫຍາຍຕົວຂອງລວມຍອດຜະລິດຕະພັນພາຍໃນເພີ່ມຂຶ້ນໃນ 5 ປີຕໍ່ໜ້ານັ້ນແຂວງຂອງພວກເຮົາມີຄວາມຕ້ອງ ການທຶນເພື່ອການພັດທະນາລວມທັງໝົດ 4.630 ຕື້ກີບ ກວມເອົາ 40% ຂອງ GDP ຕໍ່ປີ (ສະເລ່ຍປະມານ 926 ຕື້ກີບ/ປີ). ພ້ອມກັນນີ້,ສູ້ຊົນຜະລິດເຂົ້າເປືອກໃຫ້ໄດ້ 260.025 ໂຕນ, ຮອດປີ 2025 ເຮັດໃຫ້ເນື້ອທີ່ນາເພີ່ມຂຶ້ນ 1.302 ເຮັກຕາ ລວມທັງໝົດເປັນ 10.490 ເຮັກຕາ, ນາແຊງໃຫ້ໄດ້ 1.180 ເຮັກ ຕາ (ຂະຫຍາຍ 618 ເຮັກຕາ) ແລະຈໍາກັດເນື້ອທີ່ປູກເຂົ້າເນີນສູງ (ເຂົ້າໄຮ່) ໃຫ້ຢູ່ໃນລະດັບ 1.130 ເຮັກຕາ (ຫຼຸດເນື້ອທີ່ໄຮ່ໃຫ້ໄດ້ 590 ເຮັກຕາ), ຫັນການລ້ຽງສັດແບບ ທໍາມະຊາດກ້າວສູ່ການລ້ຽງສັດແບບເປັນຟາມໃຫ້ໄດ້ 54 ຟາມ ເປັນຕົ້ນ: ຟາມງົວ 4 ຟາມ, ຟາມໝູ 15 ຟາມ, ຟາມແບ້ 10 ຟາມ, ຟາມສັດປີກ 5 ຟາມ, ຟາມປາ 20 ຟາມ ແລະເຮັດໃຫ້ການສະໜອງ ຜົນຜະລິດຈາກຟາມໃຫ້ໄດ້ 60% ຂອງຜົນຜະລິດສັດທັງໝົດ; ສົ່ງ ເສີມການລ້ຽງສັດໃຫ້ເພີ່ມຂຶ້ນໃນແຕ່ລະປີສູ້ຊົນເຮັດໃຫ້ເກີດແຫຼ່ງຜະລິດພະລັງງານໄຟຟ້າຫຼາຍຮູບແບບ (ພະລັງງານນໍ້າ,ຄວາມຮ້ອນຖ່ານຫີນ,ພະລັງງານລົມແລະແສງອາທິດໃຫ້ໄດ້2.217ເມກາວັດ(MW); ສູ້ຊົນເຮັດໃຫ້ມີແຫຼ່ງສະຖານີກະຈາຍໄຟຟ້າໃນທົ່ວແຂວງໃຫ້ໄດ້ 4 ແຫ່ງ.

  ທ່ານເຈົ້າແຂວງເຊກອງກ່າວຕື່ມວ່າ: ສິ່ງສຳຄັນຈະສຸມໃສ່ພັດທະນາກະສິກຳສະອາດປອດສານພິດເປັນມິດກັບສິ່ງແວດລ້ອມໃຫ້ເກີດເປັນຮູບປະທຳຢູ່ບັນດາເມືອງທີ່ມີທ່າແຮງຕິດພັນກັບການພັດທະນາສິນຄ້າໂອດັອບໃຫ້ມີຈໍານວນເພີ່ມຂຶ້ນທາງດ້ານປະລິມານ ແລະຄຸນນະພາບ;ຄຸ້ມຄອງ ແລະຟື້ນຟູປ່າໄມ້ເຂດຍອດນໍ້າຫົວເລນ,ປ່າປ້ອງກັນ, ປ່າສະຫງວນ, ບັນດາປ່າຍອດນໍ້າໂຄງການກໍ່ສ້າງເຂື່ອນໄຟຟ້ານໍ້າຕົກໃຫ້ຄືນສູ່ສະພາບເດີມເພື່ອຕອບສະໜອງນໍ້າໃຫ້ແກ່ການຊົມໃຊ້ຂອງປະຊາຊົນ,ການຜະລິດກະສິກຳ, ພະລັງງານໄຟຟ້າ ແລະການທ່ອງທ່ຽວແຂວງເຊກອງ.

แชร์