ສະຫາຍເລຂາທິການໃຫຍ່ເນັ້ນ 5 ບັນຫາ ການພັດທະນາ

ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກທີ່ໄຂຂຶ້ນໃນວັນທີ 13 ມັງກອນ 2021, ສະຫາຍ ບຸນຍັງ ວໍລະຈິດ ເລຂາທິການໃຫຍ່ໄດ້ຊີ້ນຳຕໍ່ກອງປະຊຸມວ່າ: ປະເທດຊາດພວມຢືນຢູ່ຕໍ່ໜ້າຄວາມຫຍຸ້ງຍາກ ແລະສິ່ງທ້າທາຍອັນໃຫຍ່ຫຼວງ, ພວກເຮົາຕ້ອງກໍາແໜ້ນ ແລະແກ້ 5 ບັນຫາຢ່າງຮີບດ່ວນແນໃສ່ເພື່ອຮັບປະກັນຕໍ່ການພັດທະນາປະເທດຊາດໃນຊຸມປີຕໍ່ໜ້າ.

 ກ່ອນອື່ນຕ້ອງຖືເອົາການແກ້ໄຂຄວາມທຸກຍາກຂອງປະຊາຊົນເປັນໜ້າທີ່ຈຸດສຸມອັນສໍາຄັນການແກ້ໄຂບັນຫາດັ່ງກ່າວຕ້ອງບົນພື້ນຖານການປຸກສະຕິຕື່ນຕົວເພິ່ງຕົນເອງ, ເປັນເຈົ້າຕົນເອງ ແລະບືນຕົວຂຶ້ນສ້າງຄວາມເຂັ້ມແຂງດ້ວຍຕົນເອງຂອງຄົນໃນຊາດ, ເດັດດ່ຽວຕີຖອຍແນວຄິດເອື່ອຍອີງຕໍ່ການຊ່ວຍເຫຼືອ ແລະຄວາມບໍ່ເປັນເຈົ້າການບືນຕົວ ກ້າວຂຶ້ນດ້ວຍເຫື່ອແຮງ, ສະຕິປັນຍາຂອງຕົນທີ່ຍັງມີຢູ່ບໍ່ໜ້ອຍໃນຖັນແຖວສະມາຊິກພັກ-ພະນັກງານ ແລະປະຊາຊົນເຮົາ, ຕ້ອງແກ້ໄຂຈຸດອ່ອນ ແລະຂໍ້ຄົງຄ້າງໃນການພັດທະນາເສດຖະກິດ-ສັງຄົມ ທີ່ມີລັກສະນະຊໍາເຮື້ອໃນຜ່ານມາໂດຍເລີ່ມແຕ່ບັນຫາຈິນຕະນາການດ້ານທິດສະດີ, ຍົກລະດັບຄວາມສາມາດໃນການຮັບຮູ້ສະພາບ ການພາຍໃນ ແລະສາກົນຈົນເຖິງການຕັດສິນໃຈແກ້ບັນຫາດ້ານໂຄງສ້າງເສດຖະກິດ, ການປັບປຸງກົນໄກຄຸ້ມຄອງລັດໃນແຕ່ລະດ້ານ, ແກ້ບັນຫາຫຍໍ້ທໍ້ໃນພັກ ແລະໃນສັງຄົມ.

  ຍຸດທະສາດການພັດທະນາໃນອະນາຄົດຂອງປະເທດເຮົາຕ້ອງຕັ້ງຢູ່ບົນພື້ນຖານການນໍາໃຊ້ຜົນສໍາເລັດດ້ານວິທະຍາສາດ,  ນະວັດຕະກໍາຢ່າງກວ້າງຂວາງໂດຍຕິດພັນກັບການພັດທະນາຊັບພະຍາກອນມະນຸດທີ່ມີຄຸນນະພາບສູງໂດຍສະເພາະໃນຂົງເຂດວິສະວະກໍາ, ດ້ວຍເຫດນັ້ນ, ມີຄວາມຈໍາເປັນຢ່າງຍິ່ງທີ່ຕ້ອງຫັນປ່ຽນຢ່າງແຂງແຮງຈາກສະພາວະທີ່ເປັນຢູ່ໃນປະຈຸບັນໂດຍຕິດພັນກັບການປັບປຸງບັນດາແຜນນະໂຍບາຍອັນເປັນພື້ນຖານກ່ຽວກັບການພັດທະນາຢ່າງເປັນລະບົບ, ຖືການຄົ້ນຄວ້າ, ເຜີຍແຜ່ ແລະນໍາໃຊ້ຜົນສໍາເລັດດ້ານວິທະຍາສາດ-ເຕັກໂນໂລຊີ ແລະນະວັດຕະກໍາອັນເໝາະສົມເປັນມາດຕະຖານ ແລະ ເງື່ອນໄຂທີ່ຂາດບໍ່ໄດ້ໃນການກໍານົດແຜນຍຸດທະສາດພັດ ທະນາໃນຊຸມປີຕໍ່ໜ້າ, ເຮັດໃຫ້ປັດໄຈແຫ່ງສະຕິປັນຍາຊຶ່ງປະກອບດ້ວຍຄວາມຮູ້ພື້ນຖານ, ຫົວຄິດປະດິດສ້າງ, ຄວາມຊໍານິຊໍານານງານ ແລະການອຸທິດຕົນເພື່ອສັງຄົມ ແລະປະເທດຊາດຂອງຄົນລາວ.

  ຕ້ອງຍົກລະດັບຄວາມເປັນເຈົ້າການເຂົ້າຮ່ວມການຕໍ່ສູ້ເພື່ອສັນຕິພາບ, ຄວາມໝັ້ນຄົງ;ການຮັບມືກັບພະຍາດລະບາດ,ການປ່ຽນແປງດິນຟ້າອາກາດ ແລະການແກ້ໄຂບັນຫາອາດຊະຍາກໍາຂ້າມຊາດຄຽງຄູ່ກັບການຮັບປະກັນເອກະລາດ, ອໍານາດອະທິປະໄຕ, ລະບອບການເມືອງຂອງປະເທດຊາດ; ຕ້ອງຮັບປະກັນການສົມທົບລະຫວ່າງການເພີ່ມທະວີຮັດແໜ້ນມິດຕະພາບ ແລະການຮ່ວມມືກັບບັນດາປະເທດເພື່ອນມິດຍຸດທະສາດກັບການສືບຕໍ່ປະຕິບັດທິດການເຊື່ອມຈອດ ແລະເຊື່ອມໂຍງສາກົນ, ສ້າງເງື່ອນໄຂຍາດແຍ່ງດຶງດູດກໍາລັງແຮງດ້ານທຶນຮອນ, ເຕັກໂນໂລຊີ,ນະວັດຕະກໍາເພື່ອຂຸດຄົ້ນ ແລະເສີມຂະຫຍາຍຄວາມອາດສາມາດບົ່ມຊ້ອນ ແລະກໍາລັງແຮງຂອງຊາດ, ຕ້ອງເປັນເຈົ້າການຕື່ມອີກໃນການຍົກລະດັບຄວາມພ້ອມເພື່ອຮັບມືແກ້ໄຂຄວາມຫຍຸ້ງຍາກ ແລະຜ່ານຜ່າສິ່ງທ້າທາຍຕໍ່ ສະພາບການແຜ່ລະບາດຂອງພະຍາດໂຄວິດ-19 ອັນໄດ້ເຮັດໃຫ້ເກີດມີການປ່ຽນແປງຄັ້ງໃຫຍ່ຫຼວງ ແລະເລິກເຊິ່ງທາງດ້ານເສດຖະກິດ ແລະສັງຄົມທັງໃນລະດັບໂລກ ແລະລະດັບປະເທດ.

  ທັງໝົດທີ່ກ່າວມານັ້ນເປັນບັນຫາທີ່ຕັ້ງຂຶ້ນຈາກສະພາວະຄວາມເປັນຈິງຢູ່ພາຍໃນປະເທດ ແລະບັນດາປັດໄຈຂອງຍຸກສະໄໝທີ່ມີຜົນກະທົບໂດຍກົງຕໍ່ປະເທດເຮົາຊຶ່ງມີຄວາມຈໍາເປັນຕ້ອງສ້າງໃຫ້ມີການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານໃນການພັດທະນາເສດຖະກິດ-ສັງຄົມ ກໍ່ຄືໃນການປັບປຸງປົວແປງພາຍໃນພັກ ແລະລະບົບການເມືອງປະຊາທິປະໄຕປະຊາຊົນ, ຖ້າບໍ່ດັ່ງນັ້ນພວກເຮົາຈະບໍ່ສາມາດເສີມຂະຫຍາຍໄດ້ທ່າແຮງບົ່ມຊ້ອນດ້ານຊັບພະຍາກອນທໍາມະຊາດ,ຊັບພະຍາກອນບຸກຄົນ, ທຶນຮອນແລະສະຕິປັນຍາຂອງທົ່ວສັງຄົມກໍຄືກໍາລັງແຮງຂອງຍຸກສະໄໝ.

------------

ຂ່າວ: ຣັດສະໝີ ດວງສັດຈະ

ຮູບພາບ: ໜັງສືພິມເສດຖະກິດ-ສັງຄົມ

แชร์