ເຊັນສັນຍາປູກໝາກໂມຢູ່ເມືອງເງິນ

   ໂດຍປະຕິບັດຕາມກົດໝາຍວ່າດ້ວຍການສົ່ງເສີມການລົງທຶນສະບັບ ເລກທີ 14/ສພຊ ລົງວັນທີ 17 ພະຈິກ 2016 ພາກທີ 7 ໝວດທີ 1 ຄະນະກຳມະການສົ່ງ ເສີມ ແລະ ຄຸ້ມຄອງການລົງທຶນດັ່ງນັ້ນມາໃນວັນທີ 11 ມັງກອນ 2021 ທີ່ຫ້ອງປະຊຸມຫ້ອງວ່າການ ເມືອງເງິນ ແຂວງໄຊຍະບູລີ ໄດ້ຈັດພິທີເຊັນສັນຍາປູກໝາກໂມ ລະຫວ່າງຫ້ອງການແຜນການ ແລະການລົງທຶນ ແລະບໍລິສັດນໍ້າເຜີ້ງພັດທະນາກະສິກຳຂາເຂົ້າ-ຂາອອກ ຈຳກັດ, ພາຍໃຕ້ການເປັນປະທານຂອງທ່ານ ທະວິສັກ ໄຊຍະວົງ ຮອງເຈົ້າເມືອງຜູ້ຊີ້ນຳວຽກງານເສດຖະກິດ, ມີທ່ານ ຕົງເຊີນ ຫົວໜ້າບໍລິສັດນໍ້າເຜີ້ງພັດທະນາກະສິກຳ, ມີບັນດາຫົວໜ້າຫ້ອງການ,ກົມກອງ ແລະວິຊາການຈາກພາກສ່ວນທີ່ກ່ຽວຂ້ອງເຂົ້າຮ່ວມ.

   ທ່ານ ວົງເພັດ ແສງສີວົງ ຕາງໜ້າຫ້ອງການແຜນການ ແລະການລົງທືນເມືອງໄດ້ຜ່ານຮ່າງບົດບັນທືກສັນຍາການລົງທຶນປູກພືດເປັນສິນຄ້າ (ໝາກໂມ) ໃນລະດູແລ້ງທ້າຍປີ 2020 ຕົ້ນປີ 2021 ຢູ່ເມືອງເງິນໃນເນື້ອທີ່ປູກທັງໝົດ 101,15  ເຮັກຕາ ໄລຍະເວລາ 6ເດືອນ ເລີ່ມແຕ່ວັນທີ 16 ຕຸລາ 2020-16 ມີນາ 2021 ໂດຍແມ່ນບໍລິສັດນໍ້າເຜີ້ງພັດທະນາກະສິກຳເປັນຜູ້ລົງທຶນພ້ອມທັງຜ່ານກ່ຽວກັບການໄລ່ລ່ຽງການຈ່າຍເງິນເຊົ່າດິນນາ,ດິນສວນຂອງປະຊາຊົນ ແລະ ການສຳລະພັນທະອາກອນຕ່າງໆ ຕາມລະບຽບການພ້ອມທັງຄົ້ນຄວ້າ, ປຶກສາຫາລື, ແລກປ່ຽນບົດຮຽນເຊິ່ງກັນ ແລະກັນລະຫວ່າງພາກລັດ ແລະບໍລິສັດເພື່ອຄວາມເປັນເອກະພາບກັນທັງສອງຝ່າຍພາຍຫຼັງສຳເລັດການເຊົ່າທີ່ດິນນາປູກໜາກໂມທາງບໍລິສັດຈະໄດ້ອະນາໄມພື້ນທີ່ດັ່ງກ່າວເພື່ອແນໃສ່ເຮັດຊາວນາໄດ້ທຳການຜະລິດສະດວກສະບາຍໃນຊ່ວງລະດູຝົນທີ່ຈະມາເຖິງ.

  ຕອນທ້າຍກໍ່ໄດ້ເຊັນບົດບັນທືກສັນຍາຮ່ວມກັນລະຫວ່າງບໍລິສັດ ນໍ້າເຜີ້ງພັດ ທະນາກະສິກຳກັບຫ້ອງການແຜນການ ແລະການລົງທຶນເມືອງໂດຍຊ່ອງໜ້າພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.

------------

ຂ່າວ: ອິນແປງ ແຫວນຄຳ

แชร์