ຂຳນັບຊົມເຊີຍກອງປະຊຸມໃຫຍ່ ຄັ້ງ XI ຂອງພັກຢ່າງສຸດໃຈ
ມື້ນີ້ (13 ມັງກອນ 2021); ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກປະຊາຊົນ ປະຕິວັດລາວ ໄດ້ໄຂຂຶ້ນຢ່າງສະຫງ່າຜ່າເຜີຍທີ່ນະຄອນຫຼວງວຽງຈັນ ໝາກຫົວໃຈຂອງປວງຊົນລາວທັງຊາດຊຶ່ງຈະໄດ້ດຳເນີນເປັນເວລາ 3 ວັນຄື ນັບແຕ່ວັນທີ 13 ຫາ 15 ມັງກອນ 2021 ພາຍໃຕ້ການເປັນປະທານຂອງ ສະຫາຍ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນ ປະຕິວັດລາວ, ປະທານປະເທດແຫ່ງ ສປປ ລາວ; ຊຶ່ງກອງປະຊຸມໃຫຍ່ໃນຄັ້ງນີ້ຍັງໄດ້ຕ້ອນຮັບບັນດາສະຫາຍຄະນະບໍລິຫານງານສູນກາງພັກ, ຜູ້ແທນທີ່ມາຈາກບັນດາຂະແໜງການ, ທ້ອງຖິ່ນໃນທົ່ວປະເທດ (ແຕ່ຍອດອູຫາຫຼີ່ຜີ ), ບັນດາຜູ້ນັກຮົບວິລະຊົນ-ນັກ ຮົບແຂ່ງຂັນ, ກຳລັງປະກອບອາວຸດ, ອົງການຈັດຕັ້ງມະຫາຊົນ, ຜູ້ຊົງຄຸນວຸດທິ ແລະຕົວແບບດ້ານຕ່າງໆໄດ້ນຳເອົາອາລົມຈິດປະຕິວັດມາສູ່ກອງປະຊຸມໃຫຍ່ຄັ້ງນີ້ຊຶ່ງເປັນເຫດການການເມືອງອັນສຳຄັນຍິ່ງຂອງຊາດລາວວິລະຊົນ.
ກອງປະຊຸມໃຫຍ່ທີ່ເປັນປະຫວັດສາດອັນສຳຄັນຂອງຊາດແມ່ນຈະໄດ້ຮັບຟັງການກ່າວສູນທອນພົດໄຂກອງປະຊຸມໃຫຍ່ຂອງສະຫາຍ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ ແລະ ສືບຕໍ່ສະເໜີຮ່າງລາຍງານການເມືອງ; ຈາກນັ້ນ, ສະຫາຍນາຍົກລັດຖະມົນຕີຈະນຳສະເໜີຮ່າງແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ IX; ນອກນີ້, ກໍ່ມີບັນດາຜູ້ຕາງໜ້າຈາກກຳລັງປະກອບອາວຸດ, ອົງການຈັດຕັ້ງມະຫາຊົນ, ບັນດາກະຊວງ-ບັນ ດາແຂວງ, ລັດວິສາຫະກິດ-ບໍລິສັດ, ຜູ້ພັດທະນາສະຖານທີ່ທ່ອງທ່ຽວຈຳນວນໜຶ່ງມີການປະກອບຄຳເຫັນ.
ກອງປະຊຸມຍັງຈະໄດ້ຮັບຟັງການສະເໜີຮ່າງບົດສຳຫຼວດການນຳພາຂອງຄະນະບໍລິຫານງານສູນກາງພັກສະໄໝທີ X ແລະອະນຸກຳມະການກົດລະບຽບ ແລະບຸກຄະລາກອນທີ່ຈະສະເໜີມາດຖານ, ເງື່ອນໄຂ ແລະລາຍຊື່ຜູ້ສະໝັກເຂົ້າໃນຄະນະບໍລິຫານງານສູນກາງພັກສະໄໝທີ XI (ກຳມະການສົມບູນ ແລະສຳຮອງ).
ກອງປະຊຸມຍັງຈະໄດ້ດຳເນີນການປ່ອນບັດເລືອກຕັ້ງເອົາກຳມະການສູນກາງພັກທັງສົມບູນ ແລະສຳຮອງ; ຈາກນັ້ນ, ຄະນະບໍລິຫານງານສູນກາງພັກສະໄໝທີ XI ຈະໄດ້ດຳເນີນກອງປະຊຸມຄັ້ງປະຖົມມະລຶກ ແລະ ແຈ້ງຜົນກອງປະຊຸມຄັ້ງປະຖົມມະລຶກຂອງຄະນະບໍລິ ຫານງານສູນກາງພັກສະໄໝທີ XI; ແຈ້ງຜົນການເລືອກຕັ້ງຄະນະກົມການເມືອງສູນກາງພັກ; ຄະນະເລຂາທິການສູນກາງພັກ ແລະ ກອງປະຊຸມຍັງຈະໄດ້ເລືອກເອົາເລຂາທິການໃຫຍ່ຄະນະບໍລິຫານງານສູນກາງພັກ; ປະທານ ແລະຄະນະກວດກາສູນກາງພັກ.
ເຖິງຢ່າງໃດກໍ່ດີ; ເພື່ອຮັບປະກັນຜົນສຳເລັດຂອງກອງປະຊຸມໃຫຍ່ທີ່ເປັນເຫດການການເມືອງອັນສຳຄັນ ແລະ ສູງສົ່ງຂອງຊາດຈຶ່ງຂໍຮຽກຮ້ອງໃຫ້ທຸກອົງການຈັດຕັ້ງຂອງພັກ,ຂອງລັດ, ກຳລັງປະກອບອາວຸດ, ອົງການມະຫາຊົນຕະຫຼອດເຖິງປະຊາຊົນລາວບັນດາເຜົ່າໃນທົ່ວປະເທດຈົ່ງສາມັກກັນເຂົ້າເປັນຈິດໜຶ່ງໃຈດຽວຮັກສາຄວາມສະຫງົບ, ຄວາມເປັນລະ ບຽບຮຽບຮ້ອຍ, ປອດໄພໃນລະດັບສູງໂດຍສະເພາະຕ້ອງເພີ່ມທະວີມາດຕະການຕິດຕາມກວດກາ ແລະຮັກສາບໍ່ໃຫ້ເກີດການແຜ່ລະບາດຂອງພະຍາດໂຄວິດ-19 ຢ່າງເດັດຂາດ.
ພ້ອມນັ້ນກໍ່ຕ້ອງເອົາໃຈໃສ່ເພີ່ມພູນຜະລິດຜົນໂດຍຖືເອົາ 4 ລ້ຽງ-4 ປູກເປັນວຽກຕົ້ນຕໍເພື່ອຫຼຸດຜ່ອນການນຳເຂົ້າສະບຽງອາຫານຈາກຕ່າງປະເທດ ແລະຂໍໃຫ້ທຸກທ່ານຈົ່ງເອົາໃຈໃສ່ຕິດຕາມກອງປະຊຸມໃຫຍ່ຢ່າງໃຈຈົດໃຈຈໍ່ ແລະຕ້ານທຸກປາກົດການຫຍໍ້ທໍ້ໃນສັງຄົມໂດຍສະເພາະສື່ອອນລາຍທີ່ຈະບິດເບືອນ ແລະປັ່ນປ່ວນຄວາມສະ ຫງົບສຸກຂອງພວກເຮົາ; ພ້ອມນັ້ນກໍ່ຕ້ອງສືບຕໍ່ປະຕິບັດ 2 ໜ້າທີ່ຍຸດທະສາດຂອງພັກຄື: ປົກປັກຮັກສາ ແລະສ້າງສາພັດທະນາປະເທດຊາດກໍ່ຄືພາລະກິດປ່ຽນແປງໃໝ່ຮອບດ້ານທີ່ມີຫຼັກການຂອງພັກໂດຍມີຄະນະບໍລິຫານງານສູນກາງພັກເປັນໃຈກາງ ແລະສາມາດເຮັດສຳເລັດໜ້າທີ່ການເມືອງອັນມີກຽດສະຫງ່າທີ່ພັກ ແລະ ປະ ເທດຊາດມອບໝາຍໃຫ້ເປັນຢ່າງດີ.
ຮູບພາບ: ໜັງສືພິມເສດຖະກິດ-ສັງຄົມ
