ສອງນະຄອນ ແລກປ່ຽນບົດຮຽນການພັດທະນາຮ່ວມກັນ

  ວັນທີ 7 ມັງກອນ 2021 ການນຳນະຄອນໄກສອນ ພົມວິຫານ ແລະ ນະຄອນຫຼວງພະບາງ ໄດ້ພົບປະແລກປ່ຽນບົດຮຽນພ້ອມທັງສ້າງຄວາມສຳພັນທະໄມຕຣີລະ ຫວ່າງການນຳສອງນະຄອນ,ຊຶ່ງພິທີດັ່ງກ່າວໄດ້ຈັດຂຶ້ນທີ່ຫ້ອງປະຊຸມຊັ້ນ 3 ຫ້ອງວ່າການນະຄອນໄກສອນ ພົມວິຫານ ແຂວງສະຫວັນນະເຂດ ໂດຍການຕ້ອນຮັບຂອງທ່ານ ແສງທອງ ວັງແກ້ວມະນີ ເຈົ້ານະຄອນໄກສອນ ພົມວິຫານ ພ້ອມຄະນະ ແລະການນຳນະຄອນຫຼວງພະບາງຊຶ່ງນຳໂດຍ ທ່ານ ຈັນສຸກ ພັນໂດລັກ ເຈົ້ານະຄອນ ຫຼວງພະບາງພ້ອມຄະນະ.

  ໃນໂອກາດພົບປະແລກປ່ຽນບົດຮຽນຄັ້ງນີ້ທັງສອງຝ່າຍກໍ່ໄດ້ຜັດປ່ຽນກັນລາຍງານສະພາບເສດຖະກິດທັງສອງນະຄອນໂດຍສັງເຂບ: ຈາກນັ້ນທັງສອງນະຄອນໄດ້ສົນ ທະນາແລກປ່ຽນບົດຮຽນການຈັດຕັ້ງປະຕິບັດວຽກງານຂອງຕົນໃນນັ້ນປະກອບດ້ວຍ: ດ້ານວຽກງານການພັດທະນາ ແລະການຄຸ້ມຄອງພື້ນຖານໂຄງລ່າງຕົວນະຄອນເຊັ່ນ: ຕະໜ່າງເສັ້ນທາງ, ການສັນຈອນ, ສະຖານທີ່ຈອດລົດ, ການວາງຜັງເມືອງ-ຄຸ້ມຄອງການປຸກສ້າງ, ການຄຸ້ມຄອງ ແລະ ບໍລິຫານຕົວເມືອງເຊັ່ນພື້ນທີ່ສີຂຽວ-ສວນສາທາລະນະ, ການຈັດສັນຄວາມບໍ່ເປັນລະບຽບຮຽບຮ້ອຍໃນຕົວນະຄອນ ແລະບັນຫາອື່ນໆໃນນັ້ນກໍ່ໄດ້ຍົກໃຫ້ເຫັນການເຄື່ອນໄຫວຂອງວຽກງານໃນແຕ່ລະດ້ານ, ມີທັງດ້ານຕັ້ງໜ້າ ແລະດ້ານຫຍໍ້ທໍ້ທີ່ຈະຕ້ອງໄດ້ພ້ອມກັນແກ້ໄຂ, ຍົກໃຫ້ເຫັນບັນດາທີ່ ຕັ້ງ, ຈຸດພິເສດຂອງແຕ່ລະນະຄອນເພື່ອຈະໄດ້ນຳໄປຈັດຕັ້ງຜັນຂະຫຍາຍບັນດາໜ້າວຽກຕ່າງໆໃຫ້ຖືກຕ້ອງສອດຄ່ອງກັບຄວາມເປັນຈິງ.

 ໃນການພົບປະແລກປ່ຽນບົດຮຽນຄັ້ງນີ້, ນະຄອນຫຼວງພະບາງມີຄວາມສົນໃຈໃນຫຼາຍດ້ານເປັນຕົ້ນ: ດ້ານງົບປະມານ, ສະຖານທີ່ຈອດລົດ,ຄຸ້ມຄອງການປຸກສ້າງ, ທຶນລະດົມປະກອບສ່ວນປະຊາຊົນໃນການສ້າງເສັ້ນທາງຮ່ອມບ້ານ ແລະບັນຫາອື່ນໆນອກນັ້ນກໍ່ມີວຽກງານຄຸ້ມຄອງແຮງງານ ແລະຄົນເປັນບ້າເສຍຈິດຍ່າງເລາະຕາມທາງທີ່ໄດ້ມີການສົນທະນາ,ປຶກສາຫາລືຮ່ວມກັນເພື່ອຈະໄດ້ນຳເອົາບົດຮຽນຂອງແຕ່ລະນະຄອນນຳໄປຈັດຕັ້ງປະຕິບັດຢູ່ນະຄອນຕົນເອງໃຫ້ມີຄວາມເປັນເອກະພາບແລະເກີດປະສິດທິຜົນຕໍ່ໄປ.

  ໃນໂອກາດມາຢ້ຽມຢາມນະຄອນໄກສອນ ພົມວິຫານ ໃນຄັ້ງນີ້, ຄະນະຜູ້ແທນນະຄອນຫຼວງພະບາງຍັງໄດ້ໄປກາບໄຫວ້ພະທາດອີງຮັງ, ໄປຢ້ຽມຊົມກະເສດອິນຊີສູນໜອງເຕົ່າບ້ານໂພນສິມ,ສະໜາມຂີ້ເຫຍື້ອບ້ານຊອກ,ບໍ່ບຳບັດນໍ້າເສຍຫ້ວຍລົງກົງ,ເລາະທ່ຽວຊົມກັນເຈື່ອນແຄມຂອງ, ທ່ຽວຊົມຕົວເມືອງເກົ່າ ນະຄອນໄກສອນ ພົມວິ ຫານ ແລະທ່ຽວຊົມຕະຫຼາດສະຫວັນກາງຄືນຕື່ມອີກ.

แชร์