ທນບ ຝືກອົບຮົມໃຫ້ພະນັກງານໃໝ່

  ໃນວັນທີ 11 ມັງກອນ 2021 ທີ່ສະຖາບັນການທະນາຄານ (ສທຄ); ທະນາຄານນະໂຍບາຍ (ທນບ) ໄດ້ຈັດໃຫ້ມີການຝຶກອົບຮົມໃຫ້ແກ່ພະນັກງານໃໝ່ຈຳນວນ 57 ຄົນ ທີ່ໄດ້ຜ່ານການສອບເສັງໃນທຸກຂັ້ນຕອນຕາມລະບຽບການທັງນີ້ກໍ່ເພື່ອຮັບປະກັນຄຸນທາດການເມືອງ,ຄວາມຮູ້-ຄວາມສາມາດເພື່ອປະຕິບັດໜ້າທີ່ຢູ່ເຂດຫ່າງໄກສອກຫຼີກ,ເຂດຊົນນະບົດ-ພູດອຍໂດຍນຳເອົາແຫຼ່ງທຶນກໍ່ຄືການຕິດຕາມການນຳໃຊ້ແຫຼ່ງທຶນໃຫ້ເກີດປະໂຫຍດສູງສຸດແກ່ຄອບຄົວຂອງປະຊາຊົນບັນດາເມືອງເປົ້າໝາຍ, ຈຸດສຸມພັດທະນາ ແລະບ້ານ 3 ສ້າງຕາມແນວທາງ ແລະແຜນນະໂຍບາຍຂອງພັກ ແລະລັດຖະບານຊຶ່ງການຝຶກອົບຮົມໃນຊຸດນີ້ຈະດຳເນີນໄປເປັນເວລາ 1 ເດືອນ ໂດຍການໃຫ້ກຽດກ່າວເປີດຂອງທ່ານ ຄຳອົ້ນ ຈັນສຸ ລິມາດຮອງຜູ້ອຳນວຍການ ທນບ; ທ່ານ ປອ. ສັນຕິພົນເມືອງລາວຫົວໜ້າ ສທຄ ພ້ອມດ້ວຍນັກວິທະຍາກອນ.

  ການຈັດຝຶກອົບຮົມໃນຄັ້ງນີ້ແມ່ນປະຕິບັດຕາມເນື້ອໃນຈິດໃຈທິດຊີ້ນໍາຂອງສະພາບໍລິຫານທນບແນໃສ່ສ້າງຄວາມຮັບຮູ້, ເຂົ້າໃຈຕໍ່ກັບບົດບາດ, ໜ້າທີ່ການເມືອງ ແລະວຽກງານວິຊາສະເພາະຂອງທນບທັງນີ້ເປັນການສຶກສາອົບຮົມດ້ານການເມືອງ-ແນວຄິດໃຫ້ພະນັກງານໃໝ່ເພື່ອຮັບປະກັນໃນເວລາໄປປະຕິບັດວຽກງານຕົວຈິງໃຫ້ສາ ມາດປະຕິບັດວຽກງານໄດ້ຢ່າງຖືກຕ້ອງ, ຫຼີກລ່ຽງບັນຫາຫຍໍ້ທໍ້ຕ່າງໆບໍ່ໃຫ້ເກີດຂຶ້ນ;ເນື້ອໃນການຈັດຝຶກອົບຮົມລ້ວນແຕ່ຕິດພັນກັບຄວາມຮັບຜິດຊອບ,ໜ້າທີ່ການເມືອງຂອງ ທນບ ໂດຍປະສານສົບທົບກັບ ສທຄ ຊ່ວຍເຫຼືອໃນດ້ານຫົວຂໍ້ວິຊາສະເພາະທີ່ຈະຝຶກອົບຮົມໂດຍມີນັກວິທະຍາກອນຜູ້ທີ່ມີຄຸນນະວຸດທິ ແລະປະສົບການ; ນອກຈາກນັ້ນ, ໃນອາທິດສຸດທ້າຍຂອງການຝຶກອົບຮົມບັນດາພະແນກການຂອງທນບຈະຂື້ນແນະນໍາໃຫ້ຮັບຮູ້ຕື່ມກ່ຽວກັບລະບຽບການ, ຄູ່ມື,ຂັ້ນຕອນຂອງການປະຕິບັດວຽກງານວິຊາສະເພາະມີວຽກງານສິນເຊື່ອ;ວຽກງານບັນຊີທະນາຄານ; ວຽກງານການບໍລິການທະນາຄານ; ຄວາມຮູ້ພື້ນຖານວຽກງານກວດກາທີ່ສະເໜີໂດຍຄູ-ອາຈານ ສທຄ; ຈາກນັ້ນ, ກໍ່ແມ່ນວຽກງານວິຊາສະເພາະພາຍ ທນບ ທີ່ສະເໜີໂດຍບັນດາພະແນກກ່ຽວຂ້ອງຂອງ ທນບ.

  ທນບ ໄດ້ຮັບການສ້າງຕັ້ງຂຶ້ນເພື່ອປະຕິບັດແນວທາງນະໂຍບາຍຂອງພັກ, ປະຕິບັດໜ້າທີ່ການເມືອງໃນການສະໜອງສິນເຊື່ອປະກອບສ່ວນແກ້ໄຂຄວາມທຸກຍາກຂອງປະຊາຊົນບັນດາເຜົ່າໃນຂອບເຂດທົ່ວປະເທດໂດຍສະເພາະແມ່ນການຊຸກຍູ້ສົ່ງເສີມການຜະລິດເປັນສິນຄ້າແນໃສ່ສ້າງຊີວິດການເປັນຢູ່ຂອງປະຊາຊົນໃຫ້ນັບມື້ນັບດີຂື້ນເພື່ອປະກອບສ່ວນເຂົ້າໃນການພັດທະນາປະເທດຊາດສູ່ຄວາມສີວິໄລຕາມແນວທາງຂອງພັກແລະລັດຖະບານ.

-------------

ຂ່າວ: ຣັດສະໝີ ດວງສັດຈະ

ຮູບພາບ: ໜັງສືພິມເສດຖະກິດ-ສັງຄົມ

แชร์