ບໍ່ແກ້ວຈັດພິທີໄຫວ້ບູຊາຫໍຫຼັກເມືອງ ຄົບຮອບ 6 ປີ

   ພິທີກາບໄຫວ້ສັກກາລະບູຊາຫໍຫຼັກເມືອງແຂວງບໍ່ແກ້ວປະຈຳ ປີ 2020 ຄົບຮອບ 6 ປີ, ໄດ້ຈັດຂຶ້ນໃນຕອນແລງຂອງວັນທີ 6 ມັງ ກອນ 2021 ນີ້; ກົງກັບມື້ແຮມ 7 ຄໍ່າ ເດືອນຍີ່ ພສ 2563; ເຂົ້າຮ່ວມຝ່າຍພຣະພຸດທະສາສະໜາ “ມີພະຫຼັກຄຳຣັດຕະນະມະນີໂຊຕີກາຈານ (ອາຊຍາທັມຄຳເງິນຄຳວົງສ໌) ທັມມະປາລະມະຫາເຖຣະເຈົ້າ, ກາມະການສູນກາງແນວລາວສ້າງຊາດ, ເຈົ້າຄະນະ ອພສ ແຂວງບໍ່ແກ້ວ ຝ່າຍບ້ານເມືອງມີ ທ່ານ ຈອມສີ ລັດຕະນະປັນຮອງ ເລຂາພັກແຂວງ, ທ່ານນາງ ບຸນ ຖະໜອມນາມມະວົງຄອບຄົວຂອງທ່ານເຈົ້າແຂວງບໍ່ແກ້ວ, ບັນດາພະ ສົງສຳມະເນນ, ການນຳແຂວງ, ການນຳຂອງເມືອງ ແລະອອກຕົນສັດທາ ແລະຍາດໂຍມລາວບັນດາເຜົ່າຊາວເມືອງຫ້ວຍຊາຍແຂວງບໍ່ແກ້ວເຂົ້າຮ່ວມໂດຍຮັກສາໄດ້ໄລຍະຫ່າງມີແພດໝໍປະຈຳເພື່ອວັດແທກອຸ່ນຫະພູມຕ່າງຄົນຕ່າງມີຄວາມປ້ອງກັນຄວາມປອດໄພຈາກໂຄວິດ19.

  ທ່ານ ສົມຄິດ ວົງປັນຍາ ຫົວໜ້າພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວ ແຂວງບໍ່ແກ້ວ ກ່າວວ່າ: ການຈັດພິທີໄຫວ້ບູຊາຫໍຫຼັກເມືອງຄັ້ງນີ້, ເພື່ອເປັນການປົກປັກຮັກສາຮີດຄອງປະເພນີອັນດີງາມຂອງຊາວພຸດທະສາສະນິກະຊົນຊາວແຂວງບໍ່ແກ້ວ, ໃນການເຕົ້າໂຮມຄວາມສາມັກຄີຂອງປະຊາຊົນແຂວງບໍ່ແກ້ວໃຫ້ມີຄວາມແໜ້ນແຟ້ນຂຶ້ນເລື້ອຍໆຫໍຫຼັກເມືອງເປັນສູນລວມທາງດ້ານຈິດໃຈ ແລະເປັນບ່ອນກາບໄຫວ້ສັກກາລະບູຊາຂອງທົ່ວປວງຊົນລາວທັງພາຍໃນ ແລະຕ່າງປະເທດທີ່ເຄີຍຈັດ ຕັ້ງປະຕິບັດກັນມາແຕ່ດົນນານ, ຕາມຄວາມເຊື່ອຖືຂອງຫຼັກບ້ານ, ຫຼັກເມືອງເຮັດໃຫ້ມວນຊົນມີຈິດສຳນຶກ ແລະເປັນເຈົ້າຂອງກຳມະສິດເຂດນໍ້າແດນດິນໃນມະເຫສັກ ແລະເທພະລັກຕ່າງໆຊ່ວຍຄຸ້ມຄອງຮັກສາໃຫ້ຢູ່ເຢັນເປັນສຸກ ແລະ ມີຄວາມຮຸ່ງເຮືອງສີວິໄລສຳລັບປີນີ່ໄດ້ຮັບການບູລະນະສ້ອມແປງທາສີຫໍຫຼັກເມືອງຄືນໃໝ່, ມີມູນຄ່າ 20 ລ້ານກີບ ໂດຍແມ່ນ ຄອບຄົວຂອງທ່ານ ເຈົ້າແຂວງເປັນເຄົ້າ ແລະທຶນສົມທົບຂອງພະແນກ ຖວທ ຈຳນວນໜຶ່ງ.

  ພິທີ ທ່ານ ຈອມສີ ລັດຕະນະປັນຮອງເລຂາພັກແຂວງ, ພ້ອມຄະນະການນຳຂອງແຂວງ-ເມືອງ ໄດ້ຫົດສົງນໍ້າຫໍຫຼັກເມືອງ, ໃຕ້ທຽນໄຊໄຫວ້ພະ, ຮັບສິນ, ຮັບພອນເພື່ອໃຫ້ບ້ານເມືອງຢູ່ເຢັນເປັນສຸກ ແລະຮຸ່ງເຮືອງສີວິໄລຂື້ນເລື້ອຍໆພ້ອມທັງລັ່ນຄ້ອງ 9 ບາດ ເພື່ອເປັນສີຣິມຸງຄຸນໃນພິທີໄຫວ້ບູຊາຫໍຫຼັກເມືອງຈາກນັ້ນໄດ້ຮັບຟັງສູດມຸງ ຄຸນ, ສູດຖອນ, ສູດສືບສະຕາຫຼວງ, ສູດປະຣິດຕະມຸງຄຸນ, ສູດຄອງທໍາ ແລະຮັບຟັງພະທຳເທດສາສະໜາ 3 ຜູກເປັນຕົ້ນແມ່ນທຳປັນຍາປາຣະມີ,ຍັນທຸນ ແລະທິບພະນົມພອນແມ່ນຍອດທຳ ຄຳສອນຂອງອົງສົມເດັດ ສຳມາສຳພຸດທະເຈົ້າ, ການບຳເພັນມະທາບູນກຸສົນອັນຍິ່ງໃຫຍ່, ທຳສາຣາກະວິຊາສູດເພື່ອສືບຊາຕາບ້ານ,ຊາຕາເມືອງໃຫ້ຢູ່ເຢັນເປັນສຸກຂອງຊາວ ພຸດທະບໍລິສັດທັງຫຼາຍ, ທຳມຸງຄຸນພະຄາຖາທີ່ນຳໃຊ້ເຂົ້າໃນຫຼັກການ ດຳເນີນຊີວິດ-ການງານລະເວັ້ນຈາກອະກຸສົນ, ມຸ້ງໜ້າສູ່ຄວາມພຽນຫຼຸດພົ້ນແຫ່ງວັດຕະສົງສານເປັນຕົ້ນ, ທຳສະຫຼອງຫໍແຈກເພື່ອອຸທິດສ່ວນບູນກຸສົນໄປຫາຍັງບັນພະບູຣຸດ,ຜູ້ມີອຸປະຄຸນທີ່ໄດ້ລະໂລກໄປແລ້ວໃຫ້ຂຶ້ນສະຫວັນຊັ້ນຟ້າ ແລະການນຳຂອງແຂວງ, ຂອງເມືອງໄດ້ຖະຫວາຍເຄື່ອງສັງກະທານໃຫ້ພະສົງ 9 ອົງເປັນອັນສຳເລັດພິທີ.

  ຕໍ່ມາຕອນເຊົ້ນ ວັນທີ 7 ມັງກອນ 2021 ການນຳຂອງແຂວງ, ການນຳຂອງເມືອງ, ເຖົ້າແກ່ແນວໂຮມ ແລະມວນຊົນຊາວເມືອງຫ້ວຍຊາຍແຂວງບໍ່ແກ້ວໄດ້ມາໄຫວ້ພະ, ຮັບສິນ, ຟັງທຳ ແລະທຳບຸນໃສ່ບາດ ຢາດນໍ້າ, ຖວາມພາເຂົ້າທິບ ຊຶ່ງມີ ພະສົງສໍາມະແນນຈຳນວນ 21 ອົງ, ຈາກ 12 ຫົວວັດຂອງເມືອງຫ້ວຍຊາຍ,ເມືອງຕົ້ນເຜິ້ງເພື່ອອຸທິດສ່ວນບຸນກຸສົນໄປໃຫ້ເບັນພະບູຫຼຸດ,ຍາດຕິພີ່ນ້ອງທີ່ໄດ້ລວງລັບໄປແລ້ວຊ່ວຍປົກປັກຮັກສາ ແລະ ເບິ່ງແຍງລູກຫຼານໃຫ້ຢູ່ເຢັນເປັນສຸກປອດໄພຈາກອັນຕະ ລາຍທັງປວງ, ຫໍຫຼັກເມືອງ ແມ່ນມີຄວາມໝາຍ, ຄວາມສຳຄັນຊຶ່ງເປັນນິມິດໝາຍໃນການສ້າງສາພັດທະນາປະເທດຊາດກໍ່ຄືແຂວງບໍ່ແກ້ວໃຫ້ມີຄວາມຈະເລີນສີວິໄລມີຄວາມໝັ້ນຄົງຖາວອນ ແລະຢູ່ເຢັນເປັນສຸກຕາມແນວທາງນະໂຍບາຍຂອງພັກ-ລັດ ເປັນການຢັ້ງຢືນເຖິງຄວາມສາມັກຄີເປັນອັນໜຶ່ງອັນດຽວຂອງປະຊາຊົນລາວບັນດາເຜົ່າເປັນສັນຍາລັກຂອງແຂວງບໍ່ແກ້ວໃນຍຸກໃໝ່, ເມື່ອຮອດເດືອນທັນວາຂອງທຸກໆ ປີອໍານາດການປົກຄອງແຂວງບໍ່ແກ້ວຈະໄດ້ພ້ອມກັນຈັດພິທີໄຫວ້ບູຊາຫໍຫຼັກເມືອງເພື່ອເປັນການສືບທອດຮີດຄອງປະເພນີອັນດີງາມຂອງລາວໄວ້ໃຫ້ຕະຫຼອດໄປ.

-------

ຂ່າວ: ເມືອງຊົນນະບູລີ

ຮູບພາບ: ໜັງສືພິມເສດຖະກິດ-ສັງຄົມ

แชร์