ສະຫະກອນຜູ້ຜະລິດກາເຟເຂດພູພຽງບໍລະເວນສົ່ງອອກກະເຟໄດ້ 1,3 ພັນຕື້ກີບ

  ໃນວັນທີ 7 ມັງກອນ 2021 ທ່ານ ມະໄລທອງ ກົມມະສິດ ຮອງເລຂາພັກແຂວງຜູ້ຊີ້ນໍາຂົງເຂດວຽກງານການເມືອງ-ແນວຄິດ, ວຽກງານພັກ-ພະນັກງານ, ພ້ອມດ້ວຍຄະນະການ ນຳພະແນກການ, ໄດ້ລົງເຄື່ອນໄຫວຢ້ຽມຢາມສະຫະກອນຜູ້ຜະລິດກາເຟເຂດພູພຽງບໍລະເວນ (CPC) ເມືອງປາກຊ່ອງ,ໂດຍມີທ່ານ ພິມພອນ ພັນດານຸວົງ ເລຂາພັກເມືອງ, ເຈົ້າເມືອງປາກຊ່ອງ, ຄະນະຜູ້ບໍລິຫານສະຫະກອນຜູ້ຜະລິດກາເຟເຂດພູພຽງບໍລະເວນ, ມີການຈັດຕັ້ງຄະນະບໍລິຫານງານກຸ່ມ, ພ້ອມດ້ວຍປະຊາຊົນບ້ານໃຫຍ່ໄຊສົມບູນເຂົ້າຮ່ວມໃຫ້ການຕ້ອນຮັບ.

  ທ່ານ ໄຊຍະກອນ ອ່ອນນາລີ ຜູ້ຈັດການສະຫະກອນຜູ້ຜະລິດກາເຟເຂດພູພຽງບໍລະເວນ (CPC) ຕາງໜ້າໃຫ້ສະຫະກອນໄດ້ລາຍງານໃຫ້ຮູ້ວ່າ: ສະຫະກອນຜູ້ຜະລິດກາເຟເຂດພູພຽງບໍລະເວນ (CPC) ເປັນອົງການຈັດຕັ້ງຂອງຊາວສວນ, ສ້າງຕັ້ງເພື່ອປັບປຸງຊີວິດການເປັນຢູ່ຂອງຜູ້ຜະລິດກາເຟຂະໜາດນ້ອຍ, ມີສະມາຊິກທັງໝົດ 968 ຄອບຄົວ ທີ່ເປັນຊາວສວນກາເຟຂະໜາດນ້ອຍ, ມີເນື້ອທີ່ການຜະລິດໂດຍສະເລ່ຍ 5 ເຮັກຕາຕໍ່ຄອບຄົວ, ຜະລິດກາເຟແບບກະສິກຳອິນຊີມີ 841 ຄອບ ຄົວມີ 45 ກຸ່ມຜູ້ຜະລິດທີ່ກະຈາຍຢູ່ໃນ 43 ບ້ານຂອງ 3 ເມືອງໃນເຂດພູພຽງບໍລິເວນຄື: ເມືອງປາກຊ່ອງແຂວງຈຳປາສັກ,ເມືອງເລົ່າງາມ ແຂວງສາລະວັນ ແລະເມືອງທ່າແຕງແຂວງເຊກອງ, ມີ 37 ກຸ່ມທີ່ຜະລິດກາເຟແບບກະສິກໍາອິນຊີ, ໃນລະດູການເກັບກ່ຽວສົກປີ 2019-2020 ສາມາດແປຮູບກາເຟໄດ້ຈຳນວນ 9.071 ໂຕນໝາກແດງ, ຈຳໜ່າຍຜະລິດຕະພັນກາເຟຂົ້ວ 6,3 ໂຕນ,ສົ່ງອອກກາເຟ 1.355 ໂຕນ, ປະຈຸບັນສະຫະກອນໄດ້ຮັບການຮັບຮອງດ້ານການຄ້າເປັນທຳ ແລະອໍການິກ, ຊຶ່ງເປັນການຄໍ້າປະກັນລາຄາຂັ້ນຕໍ່າ ແລະໄດ້ລາຍຮັບເພີ່ມຂຶ້ນໃຫ້ແກ່ສະມາຊິກຫຼາຍກວ່າລາຄາຕະຫຼາດທົ່ວໄປ, ໂດຍສະເສ່ຍ 5 ປີຜ່ານມາ ໄດ້ເພີ່ມຂຶ້ນ 49% ແລະສິ່ງທີ່ເຮັດໃຫ້ກາເຟລາວມີຊື່ສຽງໂດ່ງດັງນັ້ນແມ່ນມີບໍລິສັດກາເຟຊື່ດັງຂອງໂລກມາຮັບຊື້ກາເຟຈາກສະຫະກອນຂອງພວກເຮົາເຊັ່ນ: ບໍລິສັດກາເຟມາ (CAFEMA) ຂອງສະວິດເຊີແລນ, ບໍລິສັດຂົ້ວກາເຟມາລົງໂກ (MALO NGO) ຂອງຝລັ່ງ, ບໍລິສັດອາວິດນໍກິດ (ARVID NORDQUIST) ຂອງສະວີເດັນ,ບໍລິສັດລົມບຸດ (ROM BOUTS) ຂອງແບນຢ້ຽມ, ບໍລິສັດ ຈອນເບີຕັນ (JOHN BURTON) ຂອງນີວຊິແລນ ແລະບໍລິສັດເຄແອບທີເອ (KFTA) ຂອງ ສ.ເກົາຫຼີ.

  ໂອກາດນີ້, ທ່ານ ມະໄລທອງ ກົມມະສິດ ໄດ້ຍ້ອງຍໍຊົມເຊີຍການຈັດຕັ້ງຄະນະບໍລິຫານງານສະຫະກອນຜູ້ຜະລິດກາເຟເຂດພູພຽງບໍລະເວນ (CPC) ກໍຄືສະມາຊິກຂອງ ສຜກ ທັ້ງໝົດທີ່ສ້າງຊື່ສຽງໃຫ້ກາເຟລາວບໍ່ພຽງແຕ່ສົ່ງກາເຟອອກຕ່າງປະເທດ, ສຜກຍັງໄດ້ຜະລິດ ແລະປຸງແຕ່ງກາເຟຂົ້ວສົ່ງຂາຍພາຍໃນ ແລະຕ່າງແຂວງສ້າງຄວາມເຂັ້ມແຂງ, ປັບປຸງຊີວິດການເປັນຢູ່ຂອງຜູ້ຜະລິດກາເຟຂະໜາດນ້ອຍຢູ່ແຂວງຈຳປາສັກ, ພ້ອມກັນສູ້ຊົນຕໍ່ສິ່ງທ້າທາຍໃນຊຸມປີຕໍ່ໜ້າສ້າງທຸກເງື່ອນໄຂໃຫ້ສະຫະ ກອນມີຜົນກໍາໄລ, ຍົງສູງຄຸນນະພາບຊີວິດຂອງສະມາຊິກໃຫ້ດີຂຶ້ນ, ຄຽງຄູ່ກັບການຊຸກຍູ້ສົ່ງເສີມການປູກຝັງ, ລ້ຽງສັດ ແລະການດໍາເນີນກິດຈະການດ້ານອື່ນໆ, ເຮັດໃຫ້ຊາວສວນຜູ້ຜະລິດກາເຟຂະໜາດນ້ອຍໄດ້ພົ້ນຈາກຄວາມທຸກຍາກ ແລະ ກ້າວສູ່ຄວາມຮັ່ງມີຜາສຸກເປັນຕົວແບບທີ່ດີໃຫ້ແກ່ຊາວສວນໃນເຂດພູພຽງບໍລະເວນເພື່ອປະ ກອບສ່ວນລົບລ້າງຄວາມທຸກຍາກ ແລະສ້າງຄວາມຮັ່ງມີເຂັ້ມແຂງໃຫ້ແກ່ປະຊາຊົນຕື່ມອີກ.

ສະໜັບສະໜູນໂດຍ: HONDA

   ໃນໂອກາດລົງຢ້ຽມຢາມປະຊາຊົນ, ສະຫະກອນຜູ້ຜະລິດກາເຟເຂດພູພຽງບໍລະເວນ (CPC) ໃນຄັ້ງນີ້, ທ່ານ ມະໄລທອງ ກົມມະສິດ ພ້ອມດ້ວຍຄະນະໄດ້ລົງເບິ່ງໂຮງຮຽນ, ຢ້ຽມຢາມສຸກສາລາກຸ່ມ 4 ບ້ານໄໝ່ ໄຊສົມບູນເມືອງປາກຊ່ອງ, ພ້ອມພົບປະໂອ້ລົມແພດ-ໜໍ, ຄູສອນ ແລະພໍ່ແມ່ປະຊາຊົນເຂດດັ່ງກ່າວ.

ຂ່າວ: ທັດຊະນະ, ຮູບພາບ: ໜັງສືພິມເສດຖະກິດ-ສັງຄົມ

แชร์