ທ່ານ ຊົ່ງຊົວ ຊື່ນູ ເປັນຮັກສາການຫົວໜ້າອົງການໄອຍະການປະຊາຊົນແຂວງ

  ພິທີມອບ-ຮັບໜ້າທີ່ຫົວໜ້າອົງການໄອຍະການປະຊາຊົນແຂວງຫຼວງພະບາງລະຫວ່າງຜູ້ເກົ່າ ແລະຜູ້ໃໝ່ໄດ້ຈັດຂຶ້ນວັນທີ 8 ມັງກອນ 2021 ນີ້ຢູ່ຫ້ອງປະຊຸມຂອງພະແນກດັ່ງກ່າວໂດຍໃຫ້ກຽດເຂົ້າຮ່ວມຂອງທ່ານ ວົງສະຫວັນ ເທບພະຈັນ ຮອງເລຂາພັກແຂວງຫຼວງພະບາງ, ມີຫົວໜ້າໄອຍະການເຂດ, ໄອຍະການສານທະຫານ, ມີຕາງໜ້າພະແນກການກ່ຽວຂ້ອງພ້ອມດ້ວຍແຂກຖືກເຊີນເຂົ້າຮ່ວມ.

 ໃນພິທີທ່ານ ບຸນເລື່ອມ ມະນີວົງ ຫົວໜ້າອົງການໄອຍະການປະຊາຊົນແຂວງໄດ້ຂຶ້ນຜ່ານບົດສະຫຼຸບຕີລາຄາການຊີ້ນໍາໆພາການເຄື່ອນໄຫວວຽກງານອົງການໄອຍະການປະຊາຊົນ 5 ປີຜ່ານມາ ແລະວາງທິດທາງໃນຕໍ່ໜ້າຊຶ່ງໄດ້ຍົກໃຫ້ເຫັນຜົນງານອັນພົ້ນເດັ່ນຫຼາຍດ້ານພ້ອມແນະນໍາໃຫ້ຫົວໜ້າຜູ້ໃໝ່ສຶບຕໍ່ຊີ້ນໍາໆພາຈາກນັ້ນຕາງໜ້າຄະນະຈັດຕັ້ງແຂວງໄດ້ຂຶ້ນຜ່ານມະຕິຕົກລົງຂອງຄະນະປະຈໍາພັກແຂວງວ່າດ້ວຍການຍົກຍ້າຍໜ້າທີ່ ແລະ ບ່ອນປະຈຳການຂອງພະນັກງານການນຳແຂວງ, ໃນນີ້ໄດ້ເຫັນດີຕົກລົງໃຫ້ທ່ານ ບຸນເລື່ອມ ມະນີວົງ ຫົວໜ້າອົງການໄອຍະການປະຊາຊົນຍ້າຍໄປຮັບໜ້າທີ່ໃໝ່ຢູ່ຫ້ອງວ່າການແຂວງຫຼວງພະບາງ ແລະຕົກລົງອະນຸມັດແຕ່ງຕັ້ງທ່ານ ຊົ່ງຊົວ ຊື່ນູ ຮອງຫົວໜ້າອົງການໄອຍະການປະຊາຊົນແຂວງເປັນຜູ້ຮັກສາການຫົວໜ້າອົງການໄອຍະການປະຊາຊົນແຂວງຫຼວງພະບາງ.

ຈາກນັ້ນກໍໄດ້ເຊັນມອບ-ຮັບໜ້າທີ່ໃຫ້ກັນ ແລະກັນລະຫວ່າງທ່ານ ບຸນເລື່ອມ ມະນີວົງ ຫົວໜ້າອົງການໄອຍະການປະຊາຊົນ (ຜູ້ເກົ່າ) ແລະທ່ານ ຊົ່ງຊົວ ຊື່ນູ ຮອງຫົວ ໜ້າອົງການໄອຍະການປະຊາຊົນແຂວງເປັນຜູ້ຮັກສາການ (ຜູ້ໃໝ່) ໂດຍຊ່ອງໜ້າຜູ້ເຂົ້າຮ່ວມ ແລະຕອນທ້າຍພິທີທ່ານ ວົງສະຫວັນ ເທບພະຈັນ ຮອງເລຂາພັກແຂວງໄດ້ມີຄໍາເຫັນໂອ້ລົມຊຶ່ງທ່ານໄດ້ກ່າວຍ້ອງຍໍຊົມເຊີຍຜົນງານໃນການຊີ້ນໍາໆພາວຽກງານຂອງຜູ້ເກົ່າທີ່ຍາດຜົນງານເດັ່ນໄດ້ຫຼາຍດ້ານໃນຜ່ານມາ ແລະ ເນັ້ນໜັກໃຫ້ຫົວ ໜ້າຜູ້ໃໝ່ສືບຕໍ່ຊີ້ນຳໆພາຈັດຕັ້ງປະຕິບັດວຽກງານໃຫ້ມີປະສິດທິຜົນສູງ ແລະມີຜົນສຳເລັດຕາມເປົ້າໝາຍຂອງອົງການໄອຍະການປະຊາຊົນທີ່ວາງໄວ້.

-----------

ຂ່າວ: ສີສຸວັນ

ຮູບພາບ: ໜັງສືພິມເສດຖະກິດ-ສັງຄົມ

แชร์