ເປີດນິທັດສະການດອກຄາຍປ່າ ແລະຊາກຸຣະຫົວພັນ

  ເຊົ້າວັນທີ 11 ມັງກອນ 2021 ນີ້, ແຂວງຫົວພັນໄດ້ຈັດພິທີເປີດງານນິທັດສະການດອກຄາຍປ່າ ແລະຊາກຸຣະຫົວພັນຂຶ້ນຢູ່ທີ່ສວນມິດຕະພາບຫົວພັນ-ແທັງຮວ່າເປັນກຽດເຂົ້າຮ່ວມມີທ່ານ ເພິດ ມາປັນຍາ ຮອງເລຂາພັກແຂວງ, ທ່ານ ພຸດພັນ ແກ້ວວົງໄຊ ກຳມະການປະຈຳພັກແຂວງຮອງເຈົ້າແຂວງ, ມີບັນດາທ່ານການນຳແຂວງ, ການນຳເມືອງ, ຫົວໜ້າພະແນກການ, ກອງບັນການທະຫານ, ກອງບັນການຕຳຫຼວດ, ພະນັກງານລັດຖະກອນ, ນ້ອງນັກຮຽນພ້ອມດ້ວຍພໍ່ແມ່ປະຊາຊົນບ້ານອ້ອມຂ້າງເທ ສະບານເມືອງຊໍາເໜືອເຂົ້າຮ່ວມນຳ.

  ທ່ານ ນາງ ໝັ້ນ ເພັງຄະຕິຍະ ກຳມະ ພັກແຂວງຫົວໜ້າພະແນກ ຖວທ ແຂວງໄດ້ຜ່ານປະຫວັດຄວາມເປັນມາ ອງດອກຄາຍປ່າແລະດອກຊາກຸຣະຫົວພັນຊຶ່ງໄດ້ຍົກໃຫ້ເຫັນແຂວງຫົວພັນເປັນແຂວງທີ່ມີທີ່ຕັ້ງພູມສັນຖານຖືເປັນແຂວງພູດອຍທີ່ມີອາກາດໜາວເຢັນ, ມີຄວາມອຸດົມສົມບູນທາງດ້ານທຳມະຊາດ, ມີພູຜາປ່າໄມ້ຂຽວສົດງົດງາມຕະຫຼອດປີ ແລະຄວາມສວຍງາມຂອງທຳມະຊາດນັ້ນປະກອບມີດອກໄມ້ໃຫ້ດອກຕາມລະດູການຫຼາຍຊະນິດເຊັ່ນ: ດອກບານ, ດອກປີບ, ດອກແຄ, ດອກຝາງແດງ, ດອກລ້ານ ແລະດອກໄມ້ຊະນິດຕ່າງໆ ເດັ່ນກວ່າໝູ່ແມ່ນດອກຄາຍປ່າທີ່ມີຄວາມເປັນເອກະລັກ ແລະ ງົດງາມພິເສດເປັນສີບົວຈ່າງ ແລະ ສີບົວເຂັ້ມມີລັກສະນະຄ້າຍຄືດອກຊາກຸຣະດອກໄມ້ປະຈຳຊາດຂອງປະເທດຍີ່ປຸ່ນສະນັ້ນ, ໃນປີ 2008 ທ່ານ ພັນຄຳ ວິພາວັນ ອາດີດເຈົ້າແຂວງໆຫົວພັນໄດ້ມີແຜນເລືອກດອກຄາຍປ່າ ຫຼື ເພິ່ນເອີ້ນວ່າ: “ດອກພັນພະນາ” ເອົາມາປູກເປັນຕົ້ນໄມ້ປະດັບໃຫ້ດອກພາຍໃນເທສະບານຕົວເມືອງຊໍາເໜືອຈຳນວນ 400 ຕົ້ນ, ຕໍ່ມາໃນປີ 2010 ກໍ່ໄດ້ມີການປູກເພີ່ມຕາມເສັ້ນທາງເລກທີ 6 ພູເລົ້າ-ເທສະບານຕົວເມືອງຊໍາເໜືອ-ວຽງໄຊ, ທາງໄປສະໜາມບິນໜອງຄ້າງ ແລະບ່ອນອື່ນໆຊຶ່ງພົບເຫັນດອກຄາຍປ່າບານຫຼາຍກວ່າໝູ່ແມ່ນຢູ່ເມືອງຊໍາເໜືອ ແລະເມືອງຫົວ ເມືອງ, ໃນປີ 2015 ສະມາຄົມຄົນພິ ການອາຊີປະເທດຍີ່ປຸ່ນເປັນອົງການທີ່ບໍ່ສັງກັດລັດຖະບານຕາງໜ້າໃຫ້ລັດຖະບານຍີ່ປຸ່ນໄດ້ມາສ້າງສວນດອກຊາກຸຣະມິດຕະພາບລາວ-ຍີ່ປຸ່ນຢູ່ທີ່ເມືອງວຽງໄຊຕື່ມອີກຊຶ່ງມາຮອດລະດູໜາວປີນີ້ຕົ້ນຊາກຸຣະ ແລະດອກຄາຍປ່າຈຳນວນໜຶ່ງກໍ່ໄດ້ອອກດອກເບັ່ງບານສວຍງາມເປັນທີ່ປະທັບໃຈ ແລະດຶງດູດແຂກຄົນໃຫ້ເຂົ້າມາຢ້ຽມຢາມ ແລະທ່ຽວຊົມແຂວງຫົວພັນດ້ວຍບັນຍາກາດຟົດຟື້ນ.

  ໃນພິທີພາຍຫຼັງຄະນະປະທານຈັດງານໄດ້ຂຶ້ນຕັດແຖບຜ້າ, ລັ່ນຄ້ອງ ແລະປ່ອຍປ້າຍເປີດງານເປັນທາງການແລ້ວການນໍາແຂວງພ້ອມດ້ວຍນ້ອງນາງສາວດອກຄາຍປ່າກໍ່ໄດ້ເຂົ້າຮ່ວມປູກຕົ້ນໄມ້, ເຂົ້າຮ່ວມຊີມອາຫານເຜົ່າມົ້ງ, ເຜົ່າກືມມຸ ແລະທ່ຽວຊົມດອກຄາຍປ່າຢູ່ລຽບຕາມສາຍທາງເຂດເມືອງຊໍາເໜືອ.

  ໂອກາດນີ້ທ່ານຫົວໜ້າພະແນກ ຖວທ ຍັງຮຽກຮ້ອງມາຍັງທຸກພາກສ່ວນທົ່ວແຂວງຫົວພັນໃຫ້ພ້ອມກັນເປັນເຈົ້າການປົກປັກຮັກສາ ແລະປູກຕົ້ນດອກຄາຍປ່າເພີ່ມຂື້ນເພື່ອໃຫ້ແຂວງຫົວພັນກາຍເປັນແຂວງທີ່ມີຄວາມງົດງາມດ້ານທຳມະຊາດກາຍເປັນຕົ້ນດອກໄມ້ເອກະລັກປະຈຳແຂວງຫົວພັນ.

__________

ຂ່າວ: ນິດຖະໜອມ

ຮູບພາບ: ໜັງສືພິມເສດຖະກິດສັງຄົມ

แชร์