ບໍລິສັດກຸ່ມຄຳໄພຊະນະ ມອບເງິນ 1 ຕື້ກີບ ຊຸກຍູ້ກອງປະຊຸມໃຫຍ່ ຄັ້ງທີ XI ຂອງພັກ

 ໃນວັນທີ 11 ມັງກອນ 2021 ບໍລິສັດກຸ່ມຄຳໄພຊະນະ ຈຳກັດຜູ້ດຽວ ໄດ້ມອບເງິນ ຈຳນວນ 1 ຕື້ກີບ ໃຫ້ລັດຖະບານເພື່ອປະກອບສ່ວນຊຸກຍູ້ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນ ປະຕິວັດລາວ ທີ່ຈະຈັດຂຶ້ນໃນລະຫວ່າງວັນທີ 13-15 ມັງກອນ 2020 ຊຶ່ງຕາງໜ້າກ່າວມອບໂດຍທ່ານ ຄຳໄພ ສົມຊະນະ ປະທານບໍລິສັດຄຳໄພຊະນະ ຈຳກັດຜູ້ດຽວ ແລະຕາງໜ້າໃຫ້ລັດຖະບານກ່າວຮັບໂດຍທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນພ້ອມດ້ວຍພາກສ່ວນທີ່ກ່ຽວຂ້ອງທັງ 2 ຝ່າຍເຂົ້າຮ່ວມ.

  ທ່ານ ຄຳໄພ ສົມຊະນະ ກ່າວວ່າ: ໃນເມື່ອເຮົາເຕີບໃຫຍ່ນຳພັກນຳລັດກໍເຖິງເວລາແລ້ວທີ່ຈະຕອບແທນບຸນຄຸນພັກ-ລັດ ໂດຍຕະຫຼອດໄລຍະ 20 ກວ່າ ປີຜ່ານມານັບແຕ່ບໍລິສັດໄດ້ຮັບການສ້າງຕັ້ງຂຶ້ນຈົນຮອດປະຈຸບັນມີ 10 ກວ່າກິດ ຈະການນອກຈາກດຳເນີນເພື່ອຜົນກຳໄລການເຕີບໃຫຍ່ທາງທຸລະກິດແລ້ວບໍລິສັດກໍຍັງໄດ້ຖືສຳຄັນໃນການປະກອບສ່ວນທາງດ້ານທຶນຮອນ ແລະກຳລັງແຮງກາຍໃຈຊ່ວຍພັກ ແລະລັດຖະບານແຕ່ສູນກາງລົງຮອດທ້ອງຖິ່ນໃນການພັດທະນາປະເທດຊາດເວົ້າສະເພາະແມ່ນການແກ້ໄຂຄວາມທຸກຍາກຂອງປະຊາຊົນໂດຍເວລານີ້ບໍລິສັດຂອງພວກເຮົາກຳລັງດຳເນີນປ່ອຍແມ່ພັນງົວພື້ນເມືອງຈຳນວນ 1 ພັນກວ່າໂຕ ໃຫ້ປະຊາຊົນທຸກຍາກສອກຫຼີກຢູ່ຫຼາຍເມືອງຂອງແຂວງໄຊສົມບູນລ້ຽງໂດຍຜົນປະໂຫຍດແມ່ນຜູ້ລ້ຽງຈະໄດ້ຫຼາຍກວ່າ.

   ສໍາລັບການມອບເງິນໃຫ້ລັດຖະບານໃນຄັ້ງນີ້ແມ່ນເພີ່ມຂຶ້ນຈາກກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງ ພັກປະຊາຊົນປະຕິວັດລາວຈຳນວນ 500 ລ້ານກີບ ທັງນີ້ກໍເພື່ອປະກອບສ່ວນເຮັດໃຫ້ການດຳເນີນກອງປະຊຸມໃຫຍ່ຄັ້ງທີ XI ຂອງພັກປະສົບຜົນສຳເລັດຕາມຈຸດປະສົງ ແລະຄາດໝາຍ.

แชร์