ເຊັນບົດບັນທຶກເພື່ອສືກສາສຳຫຼວດແຮ່ທາດຢູ່ໄຊສົມບູນ

 ໃນຕອນເຊົ້າຂອງວັນທີ 8 ມັງກອນ 2021 ນີ້ທີ່ສະໂມສອນພະແນກສຶກສາທິການ ແລະກີລາແຂວງໄຊສົມບູນໄດ້ມີພິທີເຊັນບົດບັນທຶກຄວາມເຂົ້າໃຈ MOU ເພື່ອຊອກຄົ້ນ, ສໍາຫຼວດ ແລະສຶກສາຄວາມເປັນໄປໄດ້ທາງດ້ານເສດຖະກິດ-ເຕັກນິກແຮ່ຄໍາ ແລະແຮ່ຕິດພັນຢູ່ເຂດບ້ານນໍ້າຍອນ, ເມືອງອະນຸວົງ ແລະເຂດບ້ານນາຕີ, ເມືອງລ້ອງແຈ້ງ ແລະໂຄງການຊອກຄົ້ນ, ສໍາຫຼວດ ແລະສຶກສາຄວາມເປັນໄປໄດ້ທາງດ້ານເສດຖະກິດ-ເຕັກນິກແຮ່ຄໍາ ແລະແຮ່ຕິດພັນຢູ່ເຂດບ້ານອອມ, ເມືອງອະນຸວົງ ແລະ ຢູ່ເຂດບ້ານຫຼວງພັນໄຊ, ເມືອງລ້ອງແຈ້ງ ລະຫວ່າງອົງການປົກຄອງແຂວງໄຊສົມບູນ ກັບບໍລິສັດ ວຽງວອນ ຈໍາກັດຜູ້ດຽວ ແລະບໍລິສັດ ຄໍາຮຸ່ງລາວ ມີເນີ ໂລ່ ຈໍາກັດຜູ້ດຽວ, ໂດຍການເປັນກຽດເຂົ້າຮ່ວມຂອງທ່ານ ພອຍຄໍາ ຮຸ່ງບຸນຍວງ, ຮອງເລຂາພັກແຂວງ, ຮອງເຈົ້າ ແຂວງໄຊສົມບູນ,

    ມີທ່ານ ຄໍາບຸນນັດ ໄຊຍະນົນ ຮອງລັດຖະມົນຕີກະຊວງກະສິກໍາ ແລະປ່າໄມ້, ທ່ານ ບຸນມີ ພຸດທະວົງ ຮອງລັດຖະມົນຕີກະຊວງຊັບພະຍາກອນທໍາມະຊາດ ແລະສິ່ງ ແວດລ້ອມ, ທ່ານ ພູວອນ ຈັນມາລາ, ອໍານວຍການບໍລິສັດ ວຽງວອນ ຈໍາກັດຜູ້ດຽວ, ມີບັນດາຮອງເຈົ້າແຂວງ-ເຈົ້າເມືອງ, ພະແນກການທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.

  ຈຸດປະສົງຂອງພິທີແມ່ນຈະໄດ້ພ້ອມກັນລົງນາມໃນບົດບັນທຶກຄວາມເຂົ້າໃຈ MOU ເພື່ອຊອກຄົ້ນ, ສໍາຫຼວດ ແລະສຶກສາຄວາມເປັນໄປໄດ້ທາງດ້ານເສດຖະກິດ-ເຕັກ ນິກແຮ່ຄໍາ ແລະແຮ່ຕິດພັນ ໃນເນື້ອທີ່ 34 ກິໂລຕາແມັດ ຢູ່ເຂດບ້ານນໍ້າຍອນ ເມືອງອະນຸວົງ ແລະຢູ່ເຂດບ້ານນາຕີ ເມືອງລ້ອງແຈ້ງ ຂອງບໍລິສັດ ວຽງວອນ ຈໍາກັດຜູ່ດຽວ ແລະໂຄງການຊອກຄົ້ນ, ສໍາຫຼວດ ແລະສຶກສາຄວາມເປັນໄປໄດ້ທາງດ້ານເສດຖະກິດ-ເຕັກນິກແຮ່ຄໍາ ແລະແຮ່ຕິດພັນໃນເນື້ອທີ່ 183,92 ກິໂລຕາແມັດ,ຢູ່ເຂດບ້ານອອມ, ເມືອງອະນຸວົງ ແລະຢູ່ເຂດບ້ານຫຼວງພັນໄຊ, ເມືອງລ້ອງແຈ້ງ ຂອງບໍລິສັດ ຄໍາຮຸ່ງ ມີເນີໂລ່ ຈໍາກັດຜູ້ດຽວຊຶ່ງໄລຍະເວລາຂອງການຈັດຕັ້ງປະຕິບັດບົດບັນທຶກຄວາມເຂົ້າໃຈສະບັບນີ້ແມ່ນ 24 ເດືອນ ທັງສອງໂຄງການໃນນັ້ນບັນດາໜ້າວຽກທີ່ບໍລິສັດຈະຕ້ອງໄດ້ຈັດຕັ້ງປະຕິບັດຄື: ຊອກຄົ້ນ, ສໍາຫຼວດ,ສຶກສາຄວາມເປັນໄປໄດ້ທາງ ດ້ານເສດຖະກິດ-ເຕັກນິກ ແລະສຶກສາຜົນກະທົບຕໍ່ສິ່ງແວດລ້ອມ-ສັງຄົມ ແລະທໍາມະຊາດ, ໂອກາດດັ່ງກ່າວທ່ານ ພອຍຄໍາ ຮຸ່ງບຸນຍວງ ຮອງເລຂາພັກ ແຂວງ, ຮອງເຈົ້າແຂວງໄຊສົມບູນ ໄດ້ ມີຄໍາເຫັນໂອລົມຕໍ່ພິທີ ຊຶ່ງທ່ານໄດ້ຍົກ ໃຫ້ເຫັນເຖິງຄວາມໝາຍ-ຄວາມສໍາຄັນໃນການສ້າງສາພັດທະນາແຂວງໄຊສົມບູນ ພ້ອມນີ້ທ່ານຍັງໄດ້ສະແດງຄວາມຍ້ອງຍໍຊົມເຊີຍຕໍ່ບໍລິສັດທີ່ໄດ້ປະກອບສ່ວນທຶນຮອນໃນການພັດທະນາແຂວງກໍຄືໂຄງການຊອກຄົ້ນ, ສໍາຫຼວດຄວາມ ເປັນໄປໄດ້ທາງດ້ານເສດຖະກິດ-ເຕັກນິກແຮ່ຄໍາ ແລະແຮ່ຕິດພັນໃນຄັ້ງນີ້ຊຶ່ງຈະເປັນການປະກອບສ່ວນທີ່ສໍາຄັນເຂົ້າໃນການພັດທະນາເສດຖະກິດ-ສັງຄົມ ຂອງແຂວງໄຊສົມບູນກໍຄືການສ້າງວຽກເຮັດງານທໍາໃຫ້ແກ່ປະຊາຊົນ, ຈາກນັ້ນທັງສອງຝ່າຍກໍໄດ້ລົງນາມເຊັນບົດບັນທຶກຮ່ວມກັນລະຫວ່າງອົງການປົກຄອງ ແຂວງໄຊສົມບູນ ຊຶ່ງຕາງໜ້າໂດຍ ທ່ານ ໄຊຍະເດດ ວົງສາຣະ ວັນ,ຫົວໜ້າພະແນກແຜນການ ແລະການລົງທຶນ,ທ່ານ ບຸນທຽມ ໄຊສົງຄາມ, ຫົວໜ້າພະແນກພະລັງງານ ແລະບໍ່ແຮ່, ທ່ານ ຄໍາພູທອນ ວົງພະຈັນ, ເຈົ້າເມືອງອະ ນຸວົງ, ທ່ານ ອິນຕອງ ໂຄດປັນຍາ, ເຈົ້າເມືອງ-ເມືອງລ້ອງແຈ້ງ, ກັບທ່ານ ພູວອນ ຈັນມາລາ, ອໍານວຍການບໍລິສັດ ວຽງວອນ ຈໍາກັດຜູ່ດຽວ ແລະຜູ່ຕາງໜ້າບໍລິສັດຄໍາຮຸ່ງ ມີເນີໂລ່ ຈໍາກັດຜູ່ດຽວ ໂດຍຊ້ອງໜ້າການນໍາແຂວງ ແລະພະຍານທັງສອງຝ່າຍເປັນສັກຂີພິຍານ..

แชร์