ປີແລ້ວພາສີເຊກອງເກັບລາຍຮັບລື່ນແຜນ 7,36%

  ໃນປີ 2020 ຜ່ານມາກອງກວດກາພາສີປະຈໍາແຂວງເຊກອງເຂັ້ມງວດຕໍ່ການຈັດຕັ້ງປະຕິບັດວຽກງານວິຊາສະເພາະຂອງຕົນເປັນຕົ້ນແມ່ນການຕ້ານ ແລະສະກັດກັ້ນການລັກລອບສິນຄ້າໜີພາສີ, ຕິດຕາມກວດກາການນໍາເຂົ້າ-ສົ່ງອອກສິນຄ້າ, ເຄື່ອງຂອງພາຍໃນດ່ານ-ນອກດ່ານ ແລະ ການແກ້ໄຂບັນຫາລົດນໍາເຂົ້າບໍ່ຖືກຕ້ອງ (ລົດເຖື່ອນ), ສ່ວນການເກັບລາຍຮັບເຂົ້າງົບປະມານແມ່ນປະຕິບັດໄດ້ລື່ນແຜນ.

  ທ່ານ ແກ້ວອໍາພອນ ແສງນວນຈັນ ຮັກສາການຫົວໜ້າກອງກວດກາພາສີປະຈໍາແຂວງເຊກອງໃຫ້ສໍາພາດຕໍ່ນັກຂ່າວເມື່ອບໍ່ດົນນີ້ວ່າ: ກອງກວດກາພາສີປະຈໍາແຂວງເຊກອງແມ່ນກົງຈັກການຈັດຕັ້ງໜຶ່ງທີ່ຂຶ້ນກັບກອງຄຸ້ມຄອງພາສີ VII, ກົມພາສີກະຊວງການເງິນ, ປະກອບມີ 1 ໜ່ວຍງານ, 1 ດ່ານທ້ອງຖິ່ນ ແລະ3 ດ່ານປະເພນີ, ມີພະນັກງານສົມບູນທັງໝົດ 14 ສະຫາຍ ແລະພະນັກງານຊ່ວຍວຽກຈໍານວນໜຶ່ງ.

  ການຈັດຕັ້ງປະຕິບັດແຜນລາຍຮັບໃນປີ 2020 ຜ່ານມາແມ່ນຢູ່ໃນທ່າມກາງສະພາບແວດລ້ອມທີ່ມີຄວາມຫຍຸ້ງຍາກ ແລະ ທ້າທາຍຫຼາຍດ້ານໂດຍສະເພາະແມ່ນສະ ພາບການແຜ່ລະບາດຂອງພະຍາດໂຄວິດ-19, ຕົວເລກຈັດເກັບລາຍຮັບທີ່ກົມມອບໃຫ້ກອງ

 ກວດກາພາສີປະຈໍາແຂວງເຊກອງໃນຕົ້ນປີ 2020 ເແມ່ນ 8 ຕື້ກີບ ແລະຕົວເລກດັດແກ້ໃໝ່ 1,2 ຕື້ກວ່າກີບ ຊຶ່ງເປັນຕົວທີ່ສູງພໍສົມຄວນຖ້າທຽບໃສ່ທ່າແຮງບົ່ມຊ້ອນຂອງແຂວງທີ່ບໍ່ທັນມີດ່ານສາກົນເພື່ອສົ່ງອອກ-ນໍາເຂົ້າສິນຄ້າ,ກໍາລັງການຊື້ຊົມໃຊ້ສິນຄ້າມີທ່າອ່ຽງຫຼຸດລົງ,ແຕ່ເຖິງຢ່າງໃດກໍຕາມຍ້ອນການນໍາພາ-ຊີ້ນໍາຈາກຄະນະພັກ-ຄະນະນໍາກອງຄຸ້ມຄອງພາສີ VII, ກົມພາສີກະຊວງການເງິນ, ອໍານາດການປົກຄອງທ້ອງຖິ່ນບວກກັບຄວາມເອົາໃຈໃສ່ຂອງຄະນະນໍາ ແລະພະນັກງານ-ສະມາຊິກພັກພາຍໃນກອງອັນໄດ້ເຮັດໃຫ້ການຈັດຕັ້ງປະຕິບັດວຽກງານປະສົບຜົນສໍາເລັດຫຼາຍດ້ານ.

   ໃນປີ 2020 ກອງກວດກາພາສີປະຈໍາແຂວງເຊກອງໄດ້ຮັບຕົວເລກແຜນການເກັບລາຍຮັບ (ຕາມແຜນດັດແກ້) ທັງໝົດ 1,2 ຕື້ກີບ, ແຕ່ສາມາດຈັດເກັບໄດ້ 1,5 ຕື້ກີບເທົ່າກັບ 127,36% ຂອງແຜນການ, ໃນນັ້ນກອງກວດກາພາສີປະຈໍາແຂວງປະຕິບັດໄດ້ 1,3 ຕື້ກວ່າກີບ ເທົ່າກັບ 163,31% ແລະດ່ານພາສີທ້ອງຖິ່ນດາກ ຕະອອກ 185 ລ້ານກວ່າກີບເທົ່າກັບ 48,50% ຂອງແຜນການໂດຍລາຍຮັບສ່ວນໃຫຍ່ແມ່ນໄດ້ມາຈາກການແກ້ໄຂພາຫະນະນໍາເຂົ້າບໍ່ຖືກຕ້ອງ.

  ທ່ານ ແກ້ວອໍາພອນ ແສງນວນຈັນ ໃຫ້ຮູ້ຕື່ມວ່າ: ການແກ້ໄຂພາຫະນະນໍາເຂົ້າບໍ່ຖືກຕ້ອງໃນປີ 2020 ໄດ້ທັງໝົດ 52 ຄະດີຕໍ່ຄັນ, ໃນນັ້ນລົດໃຫຍ່ 42 ຄັນ ແລະລົດຈັກ 10 ຄັນ ແມ່ນໄດ້ແກ້ໄຂຕາມກົດໝາຍວ່າດ້ວຍພາສີ,ແຈ້ງການຂອງລັດຖະມົນຕີກະຊວງການເງິນ ແລະຂໍ້ຕົກລົງຂອງເຈົ້າແຂວງເຊກອງ,ຊຶ່ງການຈັດຕັ້ງປະຕິ ບັດຕົວຈິງແມ່ນໄດ້ເປັນເອກະພາບກັບຂະແໜງການໂຍທາທິການ ແລະຂົນສົ່ງເພື່ອອອກໃບຢັ້ງຢືນຄວາມຖືກຕ້ອງທາງດ້ານເຕັກນິກ ແລະຕໍາຫຼວດເພື່ອເອົາຄໍາໃຫ້ການຈາກເຈົ້າຂອງພາຫະນະແລ້ວຈຶ່ງໄດ້ຈັດຕັ້ງປະຕິບັດຕາມຂັ້ນຕອນກົດໝາຍ ແລະລະບຽບການທາງດ້ານພາສີ.

  ສ່ວນແຜນການໃນປີ 2021 ທ່ານ ແກ້ວອໍາພອນ ແສງນວນຈັນ ກ່າວວ່າ: ເພື່ອໃຫ້ການຈັດເກັບລາຍຮັບເປັນໄປຕາມຄາດໝາຍທີ່ກໍານົດໄວ້ໄດ້ວາງຫຼາຍມາດຕະການເປັນຕົ້ນ: ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ພະນັກງານ-ລັດຖະກອນ, ເຈົ້າໜ້າທີ່ພາສີເປັນປົກກະຕິຕໍ່ເນື່ອງ,ປະສານສົມທົບກັບອົງການປົກຄອງທ້ອງຖິ່ນແລະຂະແໜງການກ່ຽວຂ້ອງເພື່ອໃຫ້ການຮ່ວມມື ແລະ ອໍານວຍຄວາມສະດວກໃນການຈັດຕັ້ງປະຕິບັດວຽກງານວິຊາສະເພາະ, ເຂັ້ມງວດໃນການຕິດຕາມ, ກວດກາ ການນໍາເຂົ້າ-ສົ່ງອອກສິນຄ້າ, ເຄື່ອງຂອງໃນດ່ານ, ນອກດ່ານ,ການເຄື່ອນຍ້າຍສິນຄ້າ,ເຄື່ອງຂອງພາຍໃນ ແລະການເຄື່ອນຍ້າຍປະເພດນໍ້າມັນເຊື້ອໄຟພາຍໃນ (ບ88), ສືບຕໍ່ກວດກາ ແລະແກ້ໄຂພາຫະນະນໍາເຂົ້າບໍ່ຖືກຕ້ອງທີ່ພໍ່ຄ້າຊາວຂາຍ ແລະພໍ່ແມ່ປະຊາຊົນນໍາໃຊ້ພາຍໃນແຂວງໃຫ້ຫຼຸດນ້ອຍຖອຍລົງເທື່ອລະກ້າວ,ຄຸ້ມຄອງ, ຕິດຕາມ, ກວດກາບັນດາໂຄງການລົງທຶນທີ່ໄດ້ຮັບນະໂຍບາຍນໍາເຂົ້າ, ຍົກເວັ້ນ, ງົດເກັບພາສີວັດຖຸອຸປະກອນ, ພາຫະນະ ແລະນໍ້າມັນເຊື້ອໄຟມາໃຊ້ໃນໂຄງການໃຫ້ນໍາໃຊ້ຖືກຕາມເປົ້າໝາຍ.

-------------

ຂ່າວ: ສັນຍາ

ຮູບພາບ: ໜັງສືພິມເສດຖະກິດ-ສັງຄົມ

แชร์