ທາງດ່ວນຊ່ວຍຟື້ນຟູທ່ອງທ່ຽວລາວຄືນມາຄຶກຄັກສະເພາະວັງວຽງຕົວເລກເກືອບເທົ່າເດີມ

  ນັບແຕ່ພະຍາດໂຄວິດ-19 ລະບາດຢູ່ບັນດາປະເທດຈົນແຜ່ລາມເຂົ້າມາບ້ານເຮົາສົ່ງຜົນສະເທືອນຕໍ່ທຸກດ້ານໃນລາວໂດຍສະເພາະຂະແໜງການທ່ອງທ່ຽວກາຍເປັນອຳມະພາດແຕ່ພາຍ ຫຼັງລັດມີຜົນສຳເລັດໃນການຄວບຄຸມບັ້ນທຳອິດກໍໄດ້ສຸມສົ່ງເສີມກະຕຸ້ນເສດຖະກິດການທ່ອງທ່ຽວພາຍໃນດ້ວຍເງື່ອນໄຂໃໝ່ໃນໂຄງການລາວທ່ຽວລາວ ປະກອບກັບການເປີດໃຊ້ທາງດ່ວນເສັ້ນປະຫວັດສາດຂອງປະເທດວຽງຈັນ-ວັງວຽງຍິ່ງໄດ້ຊ່ວຍຟື້ນຟູບັນຍາກາດໃຫ້ກັບຄືນມາເໝືອນຄາວກ່ອນໂດຍສະເພາະແມ່ນເມືອງວັງວຽງ ແຂວງວຽງຈັນ ທີ່ມີບັນຍານັບມື້ນັບດີຂຶ້ນ.

  ໂອກາດມາເຂົ້າຮ່ວມກອງປະຊຸມລັດຖະບານ ຊຸດທີ VIII ເປີດກວ້າງທ້າຍສະໄໝທີ່ໄດ້ຈັດຂຶ້ນລະຫວ່າງວັນທີ 7-8 ມັງກອນ 2021 ທີ່ຫໍປະຊຸມແຫ່ງຊາດນະຄອນຫຼວງວຽງຈັນ, ທ່ານດາວເຮືອງ ນັນທະວົງ ຮອງເຈົ້າແຂວງໆວຽງຈັນໄດ້ໃຫ້ສໍາພາດຕໍ່ສື່ມວນຊົນໃນວັນທີ 7 ມັງກອນຜ່ານມາວ່າ: ການທ່ອງທ່ຽວຢູ່ແຂວງວຽງຈັນໃນໄລຍະຜ່ານມາແມ່ນມີນັກທ່ອງທ່ຽວຕ່າງປະເທດ ແລະນັກທ່ອງທ່ຽວຄົນລາວມາທ່ຽວຊົມຢ່າງຫຼວງຫຼາຍໃນແຕ່ລະປີ, ແຕ່ພໍມີພະຍາດໂຄວິດ-19 ລະບາດໃນໂລກເຮັດໃຫ້ບໍ່ມີນັກທ່ອງທ່ຽວຄົນຕ່າງປະເທດມາທ່ອງທ່ຽວລາວເວົ້າສະເພາະກໍແມ່ນການທ່ອງທ່ຽວຢູ່ ແຂວງວຽງຈັນເລີຍ.

ແນວໃດກໍດີພາຍຫຼັງລາວມີຜົນສຳເລັດໃນການປ້ອງກັນ, ຄວບຄຸມການລະບາດຂອງພະຍາດໂຄວິດ-19 ໃນບັ້ນທີໜຶ່ງເຮັດໃຫ້ສາມາດເປີດການໄປມາຫາສູ່ກັນໄດ້ພາຍໃນປະເທດ, ລັດຖະບານໄດ້ມີໂຄງການລາວທ່ຽວລາວເພື່ອເປັນການສົ່ງເສີມການທ່ອງທ່ຽວພາຍໃນທັງເປັນການກະຕຸ້ນເສດຖະກິດການທ່ອງທ່ຽວໃຫ້ຟື້ນຕົວຄືນແນໃສ່ເຮັດໃຫ້ທຸລະກິດໃນຂະແໜງການບໍລິການ-ການທ່ອງທ່ຽວເຄື່ອນໄຫວໄດ້.

   ສະເພາະແຂວງວຽງຈັນກໍຄືເມືອງວັງວຽງ ທ່ານ ດາວເຮືອງ ນັນທະວົງ ກ່າວວ່າ: ໄດ້ມີນັກທ່ອງທ່ຽວລາວໄປທ່ຽວຫຼາຍຂຶ້ນພໍສົມຄວນຊຶ່ງການທ່ອງທ່ຽວແມ່ນຕາມເງື່ອນໄຂໃໝ່ສະພາບການໃໝ່ທ່ອງທ່ຽວໃນແບບເນັ້ນທ່ຽວຊົມທຳມະຊາດຕິດພັນກັບການປະຕິບັດມາດຕະການປ້ອງກັນພະຍາດໂຄວິດ-19 ຊຶ່ງທາງອຳນາດການປົກ ຄອງແຂວງ ແລະເມືອງກໍໄດ້ແຈ້ງໄປຫາຫົວໜ່ວຍການບໍລິການ-ການທ່ອງທ່ຽວຕ່າງໆ ໃຫ້ລະວັງຢ່າງຈິງຈັງໂດຍມອບໃຫ້ຄະນະສະເພາະກິດຂັ້ນແຂວງ ແລະຂັ້ນເມືອງໃນການປ້ອງກັນ, ຄວບຄຸມການລະບາດຂອງພະຍາດໂຄວິດ-19 ບໍ່ໃຫ້ມີການຊຸມແຊວເກີນຂອບເຂດ, ໄດ້ຈັດສັນເຮືອນພັກ ແລະຮ້ານອາຫານໃຫ້ບໍລິການຕາມເງື່ອນໄຂໃນການເປີດບໍລິການພ້ອມທັງປ້ອງກັນພະຍາດໂຄວິດ-19 ສ່ວນຮ້ານບັນເທີງຕ່າງໆແມ່ນໄດ້ສັ່ງປິດການບໍລິການຊົ່ວຄາວ.

  ໃນປີ 2020 ຜ່ານມາການທ່ອງທ່ຽວຢູ່ແຂວງວຽງຈັນສາມາດສະຫຼຸບໄດ້ໂດຍມີນັກທ່ອງທ່ຽວຄົນລາວມາທ່ຽວແມ່ນ 3,9 ແສນເທື່ອຄົນ, ເທົ່າກັບ 51% ຂອງແຜນ ການທີ່ກໍານົດໄວ້ໃນຈໍານວນ 7,6 ແສນເທື່ອຄົນ.

  ຂະນະທີ່ຮອດປະຈຸບັນ, ການເປີດນໍາໃຊ້ທາງດ່ວນນະຄອນຫຼວງວຽງຈັນ-ວັງວຽງ ແຂວງວຽງຈັນ ໄດ້ເຮັດໃຫ້ນັກທ່ອງທ່ຽວຄົນລາວໄປທ່ອງທ່ຽວຢູ່ແຂວງໂດຍສະເພາະໄປທ່ຽວເມືອງວັງວຽງຫຼາຍພໍສົມຄວນສຳຄັນແມ່ນໃນວັນເສົາ-ວັນອາທິດເຮັດໃຫ້ການທ່ອງທ່ຽວພາບລວມຢູ່ພາຍໃນແຂວງກໍຄືເມືອງວັງວຽງນັບມື້ດີຂຶ້ນ ຫຼືກັບຄືນມາຄຶກຄັກອີກຄັ້ງໃໝ່ໃນສະພາບການໃໝ່ພາຍໃຕ້ການທ່ອງທ່ຽວລາວທ່ຽວທີ່ຕິດພັນກັບການປ້ອງກັນປະຍາດໂຄວິດ-19 ຕາມແນວທາງນະໂຍບາຍຂອງພັກ ແລະລັດອັນໄດ້ປະກອບສ່ວນສໍາຄັນໃນການຟື້ນຟູເສດຖະກິດການທ່ອງທ່ຽວຊ່ວຍໃຫ້ປະຊາຊົນ ແລະ ຫົວໜ່ວຍການບໍລິການ-ການທ່ອງທ່ຽວໄດ້ມີລາຍຮັບດີຂຶ້ນເກືອບເທົ່າກັບກ່ອນມີ ການລະບາດຂອງພະຍາດໂຄວິດ-19.

แชร์