ບາຈຽງເຂັ້ມງວດຫ້າມນຳເຂົ້າ ແລະຈຳໜ່າຍອາຫານທະເລ

  ຖືເປັນການຈັດຕັ້ງປະຕິບັດໜ້າທີ່ຢ່າງມີຄວາມຮັບຜິດຊອບສູງ ແລະເປັນການຮັບໃຊ້ສັງຄົມສົມກັບພາລະບົດບາດໜ້າທີ່ຄວາມຮັບຜິດຊອບຂອງຕົນສໍາລັບຫ້ອງການອຸດສາຫະກໍາ ແລະການຄ້າເມືອງບາຈຽງຈະເລີນສຸກແຂວງຈໍາປາສັກຕໍ່ກັບແຈ້ງການຂອງພະແນກອຸດສາຫະກໍາ ແລະການຄ້າກ່ຽວກັບການຫ້າມນໍາເຂົ້າ ແລະຈໍາໜ່າຍຊົ່ວຄາວອາຫານທະເລສົດ (ສົດແຊ່ແຂງ) ທີ່ໄດ້ແຈ້ງການເມື່ອທ້າຍເດືອນທັນວາ 2020.

   ທ່ານ ທອງຄໍາ ໂພທິສານ ຮອງຫົວໜ້າຫ້ອງການອຸດສາຫະກໍາ ແລະ ການຄ້າເມືອງບາຈຽງຈະເລີນສຸກໄດ້ລາຍງານໃຫ້ຮູ້ວ່າ: ໂດຍປະຕິບັດຕາມແຈ້ງການຂອງພະ ແນກອຸດສາຫະກໍາ ແລະການຄ້າແຂວງຈໍາປາສັກລົງວັນທີ 25 ທັນວາ 2020 ກ່ຽວກັບການຫ້າມນໍາເຂົ້າ ແລະຈໍາໜ່າຍຊົ່ວຄາວອາຫານທະເລ( ສົດ, ແຊ່ແຂງ) ທຸກປະເພດຈາກປະເທດທີ່ມີການແຜ່ລະບາດຂອງພະຍາດໂຄວິດ-19 ດັ່ງນັ້ນເຈົ້າໜ້າທີ່ເມືອງບາຈຽງຈະເລີນສຸກປະກອບມີພະນັກງານຫ້ອງການອຸດ ສາຫະກໍາ ແລະການຄ້າເມືອງ, ຂະແໜງ ອຢ ພະແນກສາທາລະນະສຸກ ແຂວງຈໍາປາສັກ ແລະ ເມືອງໄດ້ຮ່ວມກັນລົງເຄື່ອນໄຫວກວດກາຫົວໜ່ວຍບໍລິການຈໍາໜ່າຍອາຫານທະເລປະເພດແຊ່ແຂງຕາມຈຸດຕະຫຼາດເມືອງບາຈຽງ, ຕະຫຼາດຫຼັກ 8 ໃຕ້ ແລະຕະຫຼາດຫຼັກ 14 ລວມມີທັງໝົດ 6 ຫົວໜ່ວຍ ແລະປະກອບອາຫານ 1 ຫົວໜ່ວຍ, ຊຶ່ງໃນການລົງກວດໃນເທື່ອນີ້ແມ່ນໄດ້ນໍາໃຊ້ເຄື່ອງມືກວດສອບສານປົນເປື້ອນ, ໂດຍສະເພາະແມ່ນສານຟໍມາລິນ.

  ຜ່ານການລົງຈັດຕັ້ງປະຕິບັດໜ້າທີ່ລົງກວດກາດັ່ງກ່າວປາກົດວ່າຜົນອອກມາທັງໝົດແມ່ນເປັນລົບ (ບໍ່ມີສານປົນເປື້ອນ) ພ້ອມນັ້ນເຈົ້າໜ້າທີ່ກ່ຽວຂ້ອງຍັງໄດ້ສ້າງບົດບັນທຶກຈໍາໜ່າຍຕໍ່ເທົ່າທີ່ມີພາຍໃນຮ້ານ ແລະຫຼັງຈາກນັ້ນແມ່ນຫ້າມຈໍາໜ່າຍເດັດຂາດ.

แชร์