ທຫລ ເຜີຍແຜ່ເລືອກຕັ້ງ ສສຊ-ສສຂ

  ອົງຄະນະພັກທະນາຄານແຫ່ງ ສປປ ລາວ (ທຫລ)ໄດ້ຈັດຕັ້ງກອງປະຊຸມເຜີຍແຜ່-ເຊື່ອມຊຶມເອກະສານເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ IX,ສະ ມາຊິກສະພາປະຊາຊົນຂັ້ນແຂວງ (ສສຂ) ຊຸດທີ II, ຕິດພັນກັບການຄົ້ນຄວ້າແນວຄິດ ໄກສອນ ພົມວິຫານ ຢ່າງເປັນທາງການໃນວັນທີ 8 ມັງກອນ 2021 ທີ່ສະຖາ ບັນການທະນາຄານນະຄອນຫຼວງວຽງຈັນ ໂດຍການໃຫ້ກຽດເປັນປະທານຂອງສະຫາຍ ນາງ ວັດທະນາ ດາລາລອຍ ກຳມະການປະຈຳພັກ, ຮອງຜູ້ວ່າການ ທຫລ; ພ້ອມນີ້, ກໍ່ມີບັນດາສະຫາຍຄະນະປະຈໍາພັກ-ຄະນະພັກ ທຫລ, ຄະນະໜ່ວຍພັກ, ຄະນະພັກຮາກຖານ ແລະພະນັກງານຫຼັກແຫຼ່ງເຂົ້າຮ່ວມ.

  ການເຜີຍແຜ່ ແລະເຊື່ອມຊຶມໃນຄັ້ງນີ້ມີເອກະສານມະຕິຂອງກົມການເມືອງສູນກາງພັກເລກທີ 118 ວ່າດ້ວຍການເພີ່ມທະວີການຊີ້ນໍາ-ນໍາພາຂອງຄະນະພັກຕໍ່ການເລືອກຕັ້ງ ສສຊ ຊຸດທີ IX ແລະ ສສຂ ຊຸດທີ II ແລະເອກະສານແນວຄິດ ໄກສອນ ພົມວິຫານ ກ່ຽວກັບການປ່ຽນແປງໃໝ່ໃນຂົງເຂດເສດຖະກິດໂດຍລົງເລິກສະເພາະຫົວຂໍ້: “ແນວຄິດ ໄກສອນ ພົມວິຫານ ກັບການຈັດຕັ້ງປະຕິບັດວຽກງານການເງິນ-ເງິນຕາຢູ່ປະເທດເຮົາ” ຊຶ່ງຕິດພັນໂດຍກົງກັບໜ້າທີ່ການເມືອງຂອງຂະແໜງທະ ນາຄານ, ພ້ອມທັງລະດົມຄວາມເຫັນຕໍ່ຫົວຂໍ້ຂອງບົດດັ່ງກ່າວມີການແປຄວາມໝາຍໃຫ້ໄດ້ຢ່າງຖືກຕ້ອງ ແລະ ສ່ອງແສງໃຫ້ເຫັນສະພາບຄວາມເປັນຈິງຂອງຂະແໜງທະນາຄານເພື່ອກໍານົດທິດທາງໃນຕໍ່ໜ້າໃຫ້ມີຄວາມສອດຄ່ອງຍິ່ງຂຶ້ນທັງເຮັດໃຫ້ບັນດາສະຫາຍຂັ້ນນຳ-ຂັ້ນວິຊາການມີຄວາມຮັບຮູ້-ເຂົ້າໃຈຢ່າງເລິກເຊິ່ງຕໍ່ກັບເນື້ອໃນຈິດໃຈຂອງບັນດາເອກະສານດັ່ງກ່າວແລ້ວນໍາໄປຜັນຂະຫຍາຍ ແລະຈັດຕັ້ງປະຕິບັດເຂົ້າສູ່ສະພາບຕົວຈິງໂດຍສະເພາະການປຸກລະດົມສະມາຊິກພັກ-ພະນັກງານຂອງຕົນເຂົ້າຮ່ວມການເລືອກຕັ້ງ ສສຊ ຊຸດທີ IX ແລະສສຂ ຊຸດທີ II  ໃຫ້ເປັນຂະບວນຟົດຟື້ນ ແລະບັນລຸຕາມຈຸດປະສົງ-ລະດັບຄາດໝາຍທີ່ວາງໄວ້.

   ສະຫາຍ ນາງ ວັດທະນາ ດາລາລອຍ ກຳມະການປະຈຳພັກ, ຮອງຜູ້ວ່າການ ທຫລ ໄດ້ເນັ້ນແລະມອບໃຫ້ແຕ່ລະຮາກຖານພັກ/ກົມກອງເປັນເຈົ້າການສືບຕໍ່ຈັດຕັ້ງເຜີຍແຜ່-ເຊື່ອມຊຶມ ເອກະສານດັ່ງກ່າວໃຫ້ສະມາຊິກພັກ-ພະນັກງານທີ່ຢູ່ໃນຄວາມຮັບຜິດຊອບຂອງຕົນໄດ້ຮັບຮູ້ຢ່າງທົ່ວເຖິງຕື່ມຕາມເງື່ອນໄຂຂອງແຕ່ລະບ່ອນ; ໃຫ້ຖືເອົາການເລືອກຕັ້ງ ສສຊ ຊຸດທີ IX ແລະ ສສຂ ຊຸດທີ II ໃນຕໍ່ໜ້າເປັນໜ້າທີ່ການເມືອງ, ເປັນຄວາມຮັບຜິດຊອບຂອງຄະນະພັກທຸກຂັ້ນໃນການຊີ້ນໍາ-ນໍາພາອົງ   ການປົກຄອງ ແລະທຸກພາກສ່ວນທີ່ກ່ຽວຂ້ອງເພື່ອກະກຽມ ແລະດໍາເນີນການເລືອກຕັ້ງໃຫ້ດີ, ພ້ອມທັງປຸກລະດົມສະມາຊິກພັກ-ພະນັກງານຂອງຕົນເຂົ້າຮ່ວມການເລືອກຕັ້ງໃຫ້ເປັນຂະບວນຟົດຟື້ນເຮັດໃຫ້ການເລືອກຕັ້ງບັນລຸຜົນສໍາເລັດຕາມຈຸດປະສົງ, ລະດັບຄາດໝາຍທີ່ວາງໄວ້ແນໃສ່ສ້າງການຫັນປ່ຽນທີ່ແຂງແຮງ, ເລິກເຊິ່ງ, ຮອບດ້ານໃນການເຄື່ອນໄຫວປະຕິບັດພາລະບົດບາດຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງໃນຊຸມປີຕໍ່ໜ້າ. ພ້ອມທັງມອບຄວາມຮັບຜິດຊອບໃຫ້ແຕ່ລະຮາກຖານພັກເປັນເຈົ້າການສືບຕໍ່ນໍາພາການຄົ້ນຄວ້າແນວຄິດໄກສອນພົມວິຫານກ່ຽວກັບການປ່ຽນແປງໃໝ່ໃນຂົງເຂດເສດຖະກິດໂດຍສະເພາະຫົວຂໍ້ກ່ຽວກັບການຈັດ ຕັ້ງປະຕິບັດວຽກງານການເງິນ-ເງິນຕາທີ່ຕິດພັນກັບໜ້າທີ່ການເມືອງຂອງຂະແໜງທະນາຄານໃຫ້ມີຄວາມຊັດເຈນ, ຮັບປະກັນລັກສະນະວິທະຍາສາດ ແລະຖືກຕ້ອງຕາມຄວາມເປັນຈິງເພື່ອພ້ອມກັນຜັນຂະຫຍາຍເຂົ້າສູ່ການຈັດຕັ້ງປະຕິບັດໜ້າທີ່ວຽກງານຂອງຕົນຢ່າງປະດິດສ້າງ ແລະມີປະສິດທິຜົນສູງ.

--------------

ຂ່າວ: ຣັດສະໝີ ດວງສັດຈະ

ຮູບພາບ: ໜັງສືພິມເສດຖະກິດ-ສັງຄົມ

แชร์