ເຖິງແມ່ນວ່າຈະບໍ່ມີການເປີດເຜີຍຕົວເລກຢ່າງເປັນທາງການແຕ່ລັດຖະບານຍອມຮັບໄດ້ເສຍຜົນປະໂຫຍດຈໍານວນບໍ່ໜ້ອຍຈາກການຫັນຊັບສິນຂອງລັດເປັນທຶນເປັນຜົນມາຈາກເປັນວຽກໃໝ່ບໍ່ທັນມີບົດຮຽນຂອດຈັດຕັ້ງຍ້ອນປະຕິບັດຍັງຂາດຄວາມເປັນເອກະພາບຂະນະທີ່ໃນຕໍ່ໜ້າລັດຖະບານໄດ້ມອບໃຫ້ຄະນະຮັບຜິດຊອບຄົ້ນຄວ້າລະ ອຽດກ່ຽວກັບຮູບແບບ, ວິທີການແລະກົນໄກປະຕິບັດໂດຍສ້າງເປັນນິຕິກຳເພື່ອແນໃສ່ການຫັນໃຫ້ມີປະສິດທິຜົນ ແລະຊ່ວຍແກ້ບັນຫາໜີ້ສິນບັນດາລັດວິສາຫະກິດຂອງລັດໃຫ້ຫຼຸດລົງເທື່ອລະກ້າວ.

ກອງປະຊຸມລັດຖະບານ ຊຸດທີ VIII ເປີດກວ້າງທ້າຍສະໄໝທີ່ໄດ້ເປີດຂຶ້ນໃນວັນທີ 7 ແລະປິດລົງດ້ວຍຜົນສຳເລັດໃນວັນທີ 8 ມັງກອນ 2021 ທີ່ຫໍປະຊຸມແຫ່ງຊາດ, ນະຄອນຫຼວງວຽງຈັນພາຍໃຕ້ການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີໂດຍມີບັນດາທ່ານຮອງນາຍົກລັດຖະມົນຕີ, ສະມາຊິກລັດຖະບານ, ເຈົ້າຄອງນະຄອນຫຼວງວຽງຈັນ, ເຈົ້າແຂວງທົ່ວປະເທດ, ຜູ້ຕາງໜ້າອົງການຈັດຕັ້ງພັກ, ສະພາແຫ່ງຊາດ,ສານປະຊາຊົນສູງສຸດ,ອົງການໄອຍະການປະຊາຊົນສູງສຸດ, ສູນກາງແນວລາວສ້າງຊາດ, ສະຫະພັນນັກຮົບເກົ່າແຫ່ງຊາດ, ອົງການຈັດຕັ້ງມະຫາຊົນຂັ້ນສູນກາງພ້ອມດ້ວຍແຂກຖືກເຊີນເຂົ້າຮ່ວມຢ່າງພ້ອມພຽງ.

  ກອງປະຊຸມຄັ້ງນີ້ໄດ້ພ້ອມກັນຄົ້ນຄວ້າ, ປຶກສາຫາລື ແລະພິຈາລະນາ 10 ເອກະສານສໍາຄັນໜຶ່ງໃນນັ້ນກອງປະຊຸມໄດ້ຮັບຟັງການລາຍງານກ່ຽວກັບການຄົ້ນຄ້ວາການຫັນຊັບສິນຂອງລັດເປັນທຶນຊຶ່ງກອງປະຊຸມໄດ້ຕີລາຄາວ່າ: ວຽກງານການຫັນຊັບສິນເປັນທຶນເປັນວຽກໃໝ່ທີ່ພວກເຮົາຍັງບໍ່ທັນມີບົດຮຽນ, ເຖິງວ່າຕົວຈິງຜ່ານມາໄດ້ມີ ການຫັນຊັບສິນເປັນທຶນແຕ່ເຫັນວ່າການປະຕິບັດຍັງບໍ່ທັນເປັນເອກະພາບກັນເຮັດໃຫ້ລັດເສຍຜົນປະໂຫຍດຈຳນວນບໍ່ໜ້ອຍ.

 ສະນັ້ນກອງປະຊຸມຈຶ່ງມອບໃຫ້ຄະນະຮັບຜິດຊອບຊີ້ນຳການຫັນຊັບສິນຂອງລັດເປັນທຶນຕາມຂໍ້ຕົກລົງສະບັບເລກທີ 98/ນຍ ສືບຕໍ່ຄົ້ນຄວ້າໃຫ້ລະອຽດຮູບແບບການຫັນຊັບສິນເປັນທຶນ,ບັນດາຫົວໜ່ວຍວິສາຫະກິດຂອງລັດທີ່ຈະຫັນເປັນທຶນ ຫຼືຫັນເປັນຮຸ້ນສ່ວນ,ວິທີການຫັນເປັນທຶນ ແລະກົນໄກໃນການຈັດຕັ້ງປະຕິບັດຕົວຈິງໃຫ້ລະອຽດ ໂດຍສ້າງເປັນນິຕິກຳ.

  ສໍາລັບໃນສະເພາະໜ້າ, ເຫັນດີໃຫ້ຄະນະຮັບຜິດຊອບຈັດຕັ້ງປະຕິບັດຕາມທິດທາງທີ່ຄະນະໄດ້ສະເໜີມານັ້ນ, ໃນນັ້ນເຫັນດີໃຫ້ມີການຄົ້ນຄວ້າ ແລະພິຈາລະນາການຫັນເປັນທຶນ ຫຼືຫັນເປັນຮຸ້ນສ່ວນບັນດາລັດວິສາຫະກິດຈຳນວນໜຶ່ງທີ່ເຄື່ອນໄຫວບໍ່ມີປະສິດທິຜົນໂດຍພິຈາລະນາເປັນແຕ່ລະກໍລະນີຢ່າງຮັດກຸມເພື່ອແນໃສ່ແກ້ໄຂບັນຫາໜີ້ສິນຂອງບັນດາລັດວິສາຫະກິດດັ່ງກ່າວໃຫ້ຫຼຸດລົງເທື່ອລະກ້າວ.

แชร์