ປິດໂຄງການສົ່ງເສີມອະນຸລັກປ່າໄມ້ ແລະບຶງທໍາມະຊາດບ້ານກ້າງປາ

  ໃນທ້າຍເດືອນທັນວາ 2020 ຜ່ານມານີ້ ເມືອງໄຊບູລີ ແຂວງສະຫວັນນະເຂດ ໄດ້ຈັດພິທີປິດໂຄງການສົ່ງເສີມການອະນຸລັກປ່າໄມ້ແລະບຶງທໍາມະຊາດບຶງຂາເປຍແບບມີສ່ວນຮ່ວມຂອງປະ ຊາຊົນຊາວບ້ານກ້າງປາ ໂດຍ ການໃຫ້ກຽດເຂົ້າຮ່ວມເປັນປະທານຂອງທ່ານ ອ່ອນລໍາພັນ ບົວສີແກ້ວ ເຈົ້າເມືອງໄຊບູລີ, ທ່ານ ນາງ ສົມເດັດ ແພງວົງສັກ ປະທານສະຫະພັນແມ່ຍິງເມືອງ, ທ່ານ ຄໍາໝັ້ນ ສຸພິຫາລາດ ຫົວໜ້າຫ້ອງວ່າການປົກຄອງເມືອງ, ມີພະນັກງານ, ວິຊາການກ່ຽວຂ້ອງ, ຜູ້ຊີ້ນຳໂຄງການ, ອໍານາດການປົກຄອງບ້ານຕະຫຼອດຮອດພໍ່ແມ່ປະຊາຊົນຊາວບ້ານກ້າງປາເຂົ້າຮ່ວມ.

  ໃນພິທີໄດ້ຮັບຟັງການລາຍງານການຈັດຕັ້ງປະຕິບັດວຽກງານຂອງໂຄງການສົ່ງເສີມອະນຸລັກປ່າໄມ້ ແລະບຶງທໍາມະຊາດບຶງຂາເປຍແບບມີສ່ວນຮ່ວມຂອງປະຊາຊົນບ້ານກ້າງປາຊຶ່ງຜູ້ໃຫ້ທຶນແມ່ນກອງທຶນສິ່ງແວດລ້ອມໂລກ (GEF) ແຜນງານໂຄງການຂະໜາດນ້ອຍ (SGP) ໂດຍ ຜ່ານອົງການສະຫະປະຊາຊາດເພື່ອການພັດທະນາ (UNDP)ໂດຍຜູ້ຮັບທຶນແມ່ນສະຫະພັນແມ່ຍິງລວມມູນຄ່າຂອງໂຄງການທັງໝົດ 25.950 ໂດລາສະຫະລັດ ຊຶ່ງໂຄງການໄດ້ເຊັນສັນຍາຊ່ວງເດືອນມີນາ 2019 ແລະໄດ້ເປີດໂຄງການຊ່ວງເດືອນມິຖຸນາ 2019 ຈົນມາເຖິງທ້າຍປີ 2020, ໂຄງການດັ່ງກ່າວນີ້ເປັນໂຄງການສົ່ງເສີມດ້ານການອະນຸລັກທໍາມະຊາດຂອງຊຸມຊົນມີຈຸດ ປະສົງເພື່ອສະໜອງຄວາມຮູ້ຄວາມເຂົ້າໃຈຕໍ່ການອະນຸລັກທໍາມະຊາດແກ່ປະຊາຊົນ ແລະ ຫາແນວທາງໃນການອະນຸລັກຮ່ວມກັບປະຊາຊົນ ແລະ ອໍານາດການປົກຄອງທ້ອງຖິ່ນ, ຜ່ານມາກໍ່ໄດ້ມີຫຼາຍໆກິດຈະກໍາທີ່ໄດ້ຈັດຕັ້ງປະຕິບັດຄື: ປູກຕົ້ນໄມ້ໃນຂອບເຂດປ່າໄມ້ຂອງບ້ານເພື່ອຊ່ວຍຟື້ນຟູປ່າໄມ້ທີ່ຊຸດໂຊມ, ມີການສໍາຫຼວດ,ເກັບກໍາຂໍ້ມູນພາກສະໜາມເພື່ອເປັນຖານຂໍ້ມູນພື້ນຖານລວມທັງຄວາມເຂົ້າໃຈຂອງຊຸມຊົນຕໍ່ການອະນຸລັກທໍາມະຊາດ ແລະອື່ນໆ,ໄດ້ກໍານົດທີ່ຕັ້ງຂອບເຂດວັງສະຫງວນ, ມີການສ້າງ ກົດລະບຽບຄຸ້ມຄອງ ແລະບວດວັງສະຫງວນໃນ 5 ເຮັກຕາ ເພື່ອຊ່ວຍໃຫ້ຊຸມຊົນເຫັນຄວາມສໍາຄັນໃນກິດຈະກໍາດັ່ງກ່າວຫຼາຍຂຶ້ນ, ປ່ອຍປາໃສ່ວັງສະຫງວນ, ກິດຈະກໍາປູກຈິດສໍານຶກກ່ຽວກັບການອະນຸລັກທໍາມະຊາດໃຫ້ແກ່ນ້ອງນັກຮຽນ ແລະ ປະຊາຊົນ, ກໍານົດເຂດແດນໂດຍມີການປັກຫຼັກອ້ອມບຶງຂາເປຍ ແລະ ສ້າງກົດລະບຽບເພື່ອຫ້າມບໍ່ໃຫ້ປະຊາຊົນບຸກລຸກເກີນເນື້ອທີ່ຕົນເອງໃນການເຮັດກະສິກໍາຊຶ່ງເປັນການທໍາລາຍລະບົບນິເວດເຂດບຶງຂາເປຍ, ສ້າງກອງທຶນຊຸມຊົນເປັນການແບ່ງສັນປັນສ່ວນຈາກກິດຈະກໍາໂຄງການເພື່ອມອບໃຫ້ຊຸມຊົນສ້າງເປັນກອງທຶນໝູນວຽນຂອງບ້ານພາຍຫຼັງໂຄງການສິ້ນສຸດລົງ, ສົ່ງເສີມຄວາມຮູ້ໃຫ້ປະຊາຊົນມີລາຍຮັບເສີມໂດຍສະ ເພາະວຽກງານດ້ານການຕໍ່າແຜ່ນແພ ແລະສາດຜືຂອງກຸ່ມແມ່ຍິງບ້ານ ແລະວຽກງານອື່ນໆ ຊຶ່ງໃຫ້ເປັນບູລິມະສິດຄອບຄົວທຸກຍາກ ແລະດ້ອຍໂອກາດ.

 ໂອກາດດັ່ງກ່າວ: ທ່ານ ອ່ອນລໍາພັນ ບົວສີແກ້ວ ໄດ້ສະແດງຄວາມຊົມເຊີຍໂຄງການດັ່ງກ່າວຕະຫຼອດເຖິງອໍານາດການປົກຄອງບ້ານ, ພໍ່ແມ່ປະຊາຊົນທີ່ເປັນສ່ວນໜຶ່ງໃນການຊ່ວຍກັນປົກປັກຮັກສາ ແລະອະນຸລັກຊັບພະຍາກອນທໍາມະຊາດເປັນຕົ້ນກໍ່ແມ່ນການກໍານົດວັງສະຫງວນບຶງຂາເປຍໃຫ້ເປັນວັງສະຫງວນຂອງບ້ານ,ເມືອງ ແລະຮຽກຮ້ອງໃຫ້ອໍານາດການປົກຄອງບ້ານສືບຕໍ່ປະຕິບັດລະບຽບຫຼັກການທີ່ວາງອອກເພື່ອປົກປັກຮັກສາແຫຼ່ງນໍ້າທໍາມະຊາດຊີວະນາໆພັນໃຫ້ຍືນຍົງຄົງຕົວຕະຫຼອດໄປເພື່ອລູກຫຼານໃນອະນາຄົດ,ຈາກນັ້ນໃນພິທີກໍ່ໄດ້ມີການເຊັນມອບ-ຮັບໂຄງການດັ່ງກ່າວໂດຍແມ່ນທ່ານນາງ ສົມເດັດ ແພງວົງສັກ ປະທານສະຫະພັນແມ່ຍິງເມືອງ ແລະ ຮັບໂດຍທ່ານ ສົມຈິດ  ນາຍບ້ານໆກ້າງປາ ໂດຍການຊ່ອງໜ້າຂອງທ່ານເຈົ້າເມືອງ ແລະໜ່ວຍງານກ່ຽວຂ້ອງ.

------------

ຂ່າວ: ສະຫວັນ, ຮູບພາບ: ໜັງສືພິມເສດຖະກິດ-ສັງຄົມ

แชร์