ດ່ານປາກຊັນ ທຳລາຍສິນຄ້າຫ້າມນຳເຂົ້າ

  ບ່າຍວັນທີ 6 ມັງກອນ 2021 ເຈົ້າໜ້າທີ່ດ່ານສາກົນປາກຊັນ ແຂວງບໍລິຄໍາໄຊ ໄດ້ຈັດພິທີຝັງທໍາລາຍສີນຄ້າຕ້ອງຫ້າມນໍາເຂົ້າຜິດກົດໝາຍ, ປະເພດ ປາມືກ ແລະ ຊິ້ນສ່ວນໝູ, ໂດຍການເຂົ້າຮ່ວມຂອງທ່ານ ພັນໂທ ວົງວິໄລ ອິນທິສານ ຫົວໜ້າຄຸ້ມຄອງດ່ານສາກົນປາກຊັນພ້ອມດ້ວຍຄະນະ, ຕະຫຼອດຮອດພະນັກງານຂະແໜງການທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.

  ເຈົ້າໜ້າທີ່ວິຊາສະເພາະດ່ານສາກົນປາກຊັນໃຫ້ຮູ້ວ່າ: ໃນເວລາປະມານ 16 ໂມງ ຂອງວັນທີ 5 ມັງກອນ 2021, ເຈົ້າ ໜ້າທີ່ວິຊາສະເພາະດ່ານສາກົນປາກຊັນໄດ້ປະຕິບັດໜ້າທີ່ກວດກາຄວາມເປັນລະບຽບຮຽບຮ້ອຍ ແລະການນໍາເຂົ້າ-ສົ່ງອອກສີນຄ້າປະເພດຕ່າງໆ, ຈຶ່ງໄດ້ກວດຄົ້ນລົດບັນທຸກສີນຄ້າໝາຍເລກທະບຽນ 70-1285 ໜອງຄາຍປະເທດໄທ,ພົບເຫັນສີນຄ້າຕ້ອງຫ້າມນໍາເຂົ້າທີ່ຜິດກົດໝາຍປະເພດປາມືກ ແລະຊິ້ນສ່ວນຜະລິດຕະພັນໝູໃນນັ້ນມີປາມືກ ຈໍານວນ 150 ກິໂລກຣາມ ແລະຊິ້ນສ່ວນຜະລິດຕະພັນໝູຈໍານວນ 120 ກິໂລກຣາມ ຢູ່ໃນລົດບັນທຸກ,ເຈົ້າໜ້າທີ່ວິຊາສະເພາະຈຶ່ງໄດ້ກັກສິນຄ້າຈໍານວນດັ່ງກ່າວໄວ້ແລ້ວທໍາການສືບສວນ-ສອບສວນຫາທີ່ມາ, ຈຶ່ງສາມາດຮູ້ໄດ້ວ່າຜູ້ປະກອບການທີ່ນໍາເຂົ້າສີນຄ້າຈໍານວນດັ່ງກ່າວມີ 3 ຄົນຄື: ນາງ ອຽນ ອາຍຸ 35 ປີ, ອາຊີບຄ້າຂາຍ ປະຈຸບັນຢູບ້ານມີໄຊ ເມືອງປາກຊັນ, ນາງ ໄລ ອາຍຸ 46 ປີ, ອາຊີບຄ້າຂາຍ ຢູ່ບ້ານໂພນໄຊ ເມືອງປາກຊັນ ແລະທ້າວ ບຸນແໜ້ນ ອາຍຸ 41 ປີ,ອາຊີບຄ້າຂາຍ, ບ້ານນາໄຊ ເມືອງທ່າພະບາດທັງ 3 ຄົນ ແມ່ນຢູ່ແຂວງບໍລິຄໍາໄຊ.

  ຕໍ່ກັບສະພາບການດັ່ງກ່າວເຈົ້າໜ້າທີ່ປະຈໍາດ່ານສາກົນປາກຊັນໄດ້ນໍາຕົວພວກກ່ຽວມາເຮັດບົດບັນທຶກສຶກສາອົບຮົມ, ພ້ອມທັງຢຶດສີນຄ້າຕ້ອງຫ້າມມາຝັງທໍາລາຍຖິ້ມ ໂດຍຊ່ອງໜ້າເຈົ້າຂອງສີນຄ້າ ແລະພະນັກງານພາກສ່ວນທີ່ກ່ຽວຂ້ອງ.

  ເຈົ້າໜ້າທີ່ຍັງໄດ້ຮຽກຮ້ອງມາຍັງຜູ້ປະກອບການທຸກຄົນໃຫ້ເອົາໃຈໃສ່ປະຕິບັດຕາມຄໍາສັ່ງ, ແຈ້ງການ ແລະລະບຽບການນໍາເຂົ້າສີນຄ້າຢ່າງເຂັ້ມງວດໂດຍສະເພາະແມ່ນໃຫ້ປະຕິບັດຕາມແຈ້ງການຂອງຫ້ອງວ່າການ ແຂວງບໍລິຄໍາໄຊ ສະບັບເລກທີ 1615/ຫກ.ຂບຊ ລົງວັນທີ 24 ທັນວາ 2020 ວ່າດ້ວຍການຫ້າມນໍາເຂົ້າຊົ່ວຄາວອາ ຫານທະເລສົດ ແລະແຊ່ແຂງທຸກປະເພດແນໃສ່ຕິດຕາມກວດກາ, ສະກັດກັ້ນການນໍາເຂົ້າ, ເຄື່ອນຍ້າຍ ແລະຈໍາໜ່າຍຊ້ິນສ່ວນຜະລິດຕະພັນໝູ, ຊີ້ນໝູ ແລະອາຫາທະເລສົດ ແລະແຊ່ແຂງທຸກປະເພດທີ່ບໍ່ຖືກຕ້ອງທັງນີ້ກໍ່ເພື່ອຮັບປະກັນຄວາມປອດໄພຂອງຜູ້ບໍລິໂພກ ແລະເປັນການສະກັດກັ້ນການແຜ່ລະບາດຂອງພະຍາດໂຄວິດ-19 ອີກດ້ວຍ.

___________

ຂ່າວ: ພອນສະຫວັນ 

ຮູບພາບ: ໜັງສືພິມເສດຖະກິດ-ສັງຄົມ

แชร์