ຈຳປາສັກ ກວດເຂັ້ມຄວາມປອດໄພອາຫານນຳເຂົ້າ

 ເພື່ອຮັບປະກັນໃຫ້ຜູ້ບໍລິໂພກອາຫານທີ່ນໍາເຂົ້າຈາກຕ່າງປະເທດມີຄວາມປອດໄພທັງເປັນການຕີຖອຍການລັກລອບນໍາເຂົ້າອາຫານປະເພດຊີ້ນອາຫານທະເລ ແລະ ເປັນການຄຸ້ມຄອງລາຄາໃຫ້ໄປຕາມກົນໄກທີ່ລັດຖະບານກໍານົດໄວ້ອຸດສາຫະກໍາ ແລະການຄ້າແຂວງຈໍາປາສັກໄດ້ສືບຕໍ່ປະຕິບັດໜ້າທີ່ ແລະເຂັ້ມງວດພ້ອມເພີ່ມມາດຕະການຕໍ່ຜູ້ລະເມີດຫວັງເຮັດໃຫ້ສະພາບການບໍລິໂພກ ແລະເໜັງຕີງລາຄາສິນຄ້າ ແລະອາຫານພາຍໃນແຂວງໃຫ້ຢູ່ໃນກົດເກນທີ່ກໍານົດໄວ້.

  ພາຍຫຼັງທີ່ອໍານາດການປົກຄອງແຂວງຈໍາປາສັກກໍ່ຄືພະແນກອຸດສາຫະກໍາ ແລະການຄ້າ, ເຈົ້າໜ້າທີ່ກ່ຽວຂ້ອງໄດ້ມີການກວດພົບສານເຈືອປົນ (ສານພິດ) ຢູ່ໃນອາ ຫານປະເພດທະເລທີ່ນໍາເຂົ້າຈາກປະເທດໃກ້ຄຽງເມື່ອກາງເດືອນທີ່ຜ່ານມາດັ່ງນັ້ນທາງຂະແໜງການທີ່ກ່ຽວຂ້ອງຈຶ່ງໄດ້ອອກແຈ້ງການຫ້າມການນໍາເຂົ້າປະເພດອາ ຫານດັ່ງກ່າວທັນທີພ້ອມດຽວກັນນັ້ນກໍ່ໄດ້ລົງຕິດຕາມກວດກາຄວາມປອດໄພອາຫານປະເພດຊິ້ນ, ອາຫານທະເລ ແລະສິນຄ້າທີ່ນໍາເຂົ້າໃນແຂວງຈໍາປາສັກຢ່າງເປັນຂະບວນການ ແລະເປັນການຈັດຕັ້ງປະຕິບັດໜ້າທີ່ໆເຮັດໃຫ້ສັງຄົມມີຄວາມໝັ້ນໃຈຕໍ່ການບໍລິໂພກອາຫານຫຼາຍຂຶ້ນ ແລະເປັນການຍອມຮັບຂອງພໍ່ແມ່ປະຊາຊົນໃນການລົງຕິດຕາມເຂັ້ມງວດເລື່ອງລາຄາສິນຄ້າທີ່ມີການສວຍໂອການຂຶ້ນລາຄາສິນຄ້າຕາມລຳພັງໃຈ.
  ເມື່ອບໍ່ດົນມານີ້ທ່ານ ບຸນຍະເດດ ທອງສະຫວັນ ຫົວໜ້າພະແນກອຸດສາຫະກໍາ ແລະການຄ້າແຂວງຈໍາປາສັກໄດ້ເປີດເຜີຍຕໍ່ສື່ມວນຊົນປະຈໍາທ້ອງຖິ່ນໃຫ້ຮູ້ວ່າ: ປະຈຸ ບັນນອກຈາກໄດ້ເຄື່ອນໄຫວກວດກາການນໍາເຂົ້າ ແລະຈໍາໜ່າຍອາຫານທະເລສົດ ແລະແຊ່ແຂງແລ້ວທາງພະແນກພວກເຮົາຍັງໄດ້ເອົາໃຈໃສ່ວຽກງານຄຸ້ມຄອງ-ກວດກາການຊື້-ຂາຍຊີ້ນໝູ ແລະສິນຄ້າອຸປະໂພກ-ບໍລິໂພກທີ່ມີຜົນກະທົບໄວ ຕໍ່ຊີວິດການເປັນຢູ່ຂອງພະນັກງານ, ລັດຖະກອນ, ທະຫານ,ຕໍາຫຼວດ ແລະພໍ່ແມ່ປະຊາຊົນ, ໂດຍໄດ້ລົງຊຸກຍູ້-ແນະນໍາໃຫ້ເຈົ້າໜ້າທີ່ກວດກາການຄ້າລົງເຄື່ອນໄຫວຕິດຕາມກວດກາຢູ່ຕາມທ້ອງຕະຫຼາດແຫ່ງຕ່າງໆໃນເທສະບານແຂວງພ້ອມດຽວກັນນັ້ນໄດ້ອອກແຈ້ງ ການແນະນໍາໃຫ້ເຈົ້າໜ້າທີ່ກວດກາການຄ້າ, ຫ້ອງການອຸດສາຫະກໍາ ແລະການຄ້າ 9 ເມືອງ 1 ນະຄອນເອົາໃຈໃສ່ເຄື່ອນໄຫວກວດກາຢ່າງເຂັ້ມງວດ, ຖ້າພົບເຫັນຜູ້ຝ່າຝືນກໍ່ໃຫ້ດໍາເນີນຄະດີຕາມລະບຽບກົດໝາຍຢ່າງເຄັ່ງຄັດ.


   ຜ່ານການລົງປະຕິບັດກວດກາດັ່ງກ່າວເຈົ້າໜ້າທີ່ພວກເຮົາໄດ້ກວດພົບຜູ້ທີ່ຂາຍຊີ້ນໝູ 50 ພັນຕໍ່ກິໂລກຣາມ 1 ຮ້ານ, ຊຶ່ງເກີນກວ່າລາຄາທີ່ກໍານົດໄວ້, ຊຶ່ງເຈົ້າໜ້າທີ່ໄດ້ກັກຢຶດຊີ້ນໝູພ້ອມທັງສ້າງບົດບັນທຶກ, ສຶກສາອົບຮົມຕໍ່ຜູ້ລະເມີດຕາມລະບຽບການ, ນອກຈາກນີ້ເຈົ້າໜ້າທີ່ໄດ້ສ້າງບົດບັນທຶກກັບບັນດາຮ້ານຂາຍຊີ້ນໝູແຕ່ລະຮ້ານໃຫ້ຂາຍຊີ້ນໝູທີ່ທາງການກໍານົດໃຫ້ຄື: ລາຄາ 40-45 ພັນກີບຕໍ່ກີໂລ, ຖ້າຂາຍເກີນລາຄານີ້ໃຫ້ຜູ້ຊື້ກໍ່ຄືຜູ້ບໍລິໂພກລາຍງານຕໍ່ເຈົ້າໜ້າທີ່ເພື່ອຈະໄດ້ດໍາເນີນການປັບໃໝຕາມລະບຽບກົດໝາຍ,ພ້ອມດຽວກັນນີ້ພະແນກອຸດສາຫະກໍາ ແລະການຄ້າແຂວງຈໍາປາສັກຍັງໄດ້ລົງຕິດຕາມເອົາໃຈໃສ່ຕໍ່ຜູ້ປະກອບການເຊັ່ນ: ຟາມລ້ຽງໝູ, ໂຮງງານຊື້-ຂາຍຊີ້ນໝູພາຍໃນແຂວງໃຫ້ຂາຍຊີ້ນໝູຕາມໂຄງສ້າງລາຄາທີ່ກໍານົດໄວ້.

แชร์