ອັດຕະປື ມີຫຼາຍໂຄງການເຊົ່າ ແລະສໍາປະທານດິນລັດແລ້ວບໍ່ເຄື່ອນໄຫວ

 ການທີ່ລັດອະນຸຍາດໃຫ້ການພັດທະນານັກລົງທຶນພັດທະນາບັນດາໂຄງການຕ່າງໆດ້ວຍຮູບການໃຫ້ເຊົ່າ ແລະສໍາປະທານທີ່ດິນກໍ່ເພື່ອສ້າງມູນຄ່າເພີ່ມໃຫ້ແກ່ດິນ, ເພື່ອນໍາລາຍໄດ້ດັ່ງກ່າວໄປພັດທະນາພື້ນຖານໂຄງລ່າງ, ເຮັດໃຫ້ປະຊາຊົນມີວຽກເຮັດງານທໍາ, ສ້າງລາຍຮັບໃຫ້ແກ່ຄອບຄົວຫຼຸດພົ້ນຈາກຄວາມທຸກຍາກເທື່ອລະກ້າວ, ແຕ່ໃນຂະນະດຽວກັນຍັງມີບາງໂຄງການເຊົ່າ ແລະສໍາປະທານທີ່ດິນຂອງລັດຢູ່ແຂວງອັດຕະປືທີ່ລັດໄດ້ອະນຸຍາດໄປແລ້ວຊໍ້າພັດບໍ່ມີການພັດທະນາທີ່ດິນດັ່ງກ່າວຕາມວັດຖຸປະສົງຂອງການອະນຸຍາດ ແລະອື່ນໆ .

  ທ່ານ ຫັດສະໃນ ສີບຸນເຫຼືອງ ຫົວໜ້າພະແນກຊັບພະຍາກອນທໍາມະຊາດ ແລະສິ່ງແວດລ້ອມແຂວງອັດຕະປືໄດ້ກ່າວລາຍງານຕໍ່ກອງປະຊຸມສະໄໝສາມັນເທື່ອທີ 10 ຂອງສະພາປະຊາຊົນແຂວງອັດຕະປືຊຸດທີ 1 ເມື່ອບໍ່ດົນມານີ້ວ່າ: ໄລຍະຜ່ານມານັບແຕ່ປີ 2016- 2020 ແຂວງອັດຕະປືໄດ້ມີການອະນຸຍາດໃຫ້ນັກລົງທຶນເຊົ່າ ແລະ ສໍາປະທານທີ່ດິນຂອງລັດໃນເນື້ອທີ່ຫຼາຍສົມຄວນແຕ່ຜ່ານການຈັດຕັ້ງປະຕິບັດຍັງມີຫຼາຍໂຄງການບໍ່ທັນມີການເຄື່ອນໄຫວພັດທະນາທີ່ດິນດັ່ງກ່າວເທົ່າທີ່ຄວນເປັນຕົ້ນ: ເມື່ອລັດອະນຸຍາດໄປບາງໂຄງການບໍ່ມີການພັດທະນາ, ມີແຕ່ຫວງທີ່ດິນໄວ້ເພື່ອຊອກຫານັກລົງທຶນອື່ນມາເຊົ່າ ຫຼືຊື້ກິດຈະການຂອງຕົນແທນ, ຖ້າລັດຈະຍົກເລີກພັດມີຂໍ້ຕໍ່ລອງ ຫຼືຂໍຕໍ່ສັນຍາ, ຊຶ່ງມັນເປັນການກົດໜ່ວງຖ່ວງດຶງການພັດທະນາ, ບາງໂຄງການມີການຍົກເວັ້ນຄ່າສໍາປະທານທີ່ດິນ 5-7 ປີ, ເມື່ອຮອດກໍານົດແລ້ວພັດບໍ່ຢາກເສຍຄ່າສໍາປະທານອ້າງວ່າບໍ່ມີຜົນກໍາໄລ ແລະຊອກຫາເຫດຜົນອື່ນໆ ເພື່ອບໍ່ຢາກເສຍຄ່າສໍາປະທານ, ບັນດາບໍລິສັດຈໍານວນໜຶ່ງທີ່ໄດ້ຮັບການອະນຸຍາດເຊົ່າ-ສໍາປະທານທີ່ດິນຈາກລັດແຕ່ບໍ່ມີການພັດທະນາຢ່າງເຕັມສ່ວນ, ພ້ອມທັງບໍ່ປະຕິບັດຕາມແຜນຄຸ້ມຄອງສິ່ງແວດລ້ອມ, ທີ່ໄດ້ຮັບຮອງຢູ່ໃນບົດປະເມີນຜົນກະທົບຕໍ່ສິ່ງແວດລ້ອມ-ສັງ ຄົມ ແລະທໍາມະຊາດຂອງໂຄງການ, ຍັງມີບາງບໍລິສັດບໍ່ໄດ້ມອບພັນທະ, ງົບປະມານໃນການຕິດຕາມກວດກາສິ່ງແວດລ້ອມໃຫ້ແກ່ແຂວງ, ເມືອງທີ່ໄດ້ຮັບຮອງຢູ່ໃນບົດປະເມີນຜົນກະທົບຕໍ່ສິ່ງແວດລ້ອມ-ສັງຄົມ ແລະທໍາມະຊາດ ແລະການປະກອບເອກະສານທາງສິ່ງແວ້ດລອມຍັງບໍ່ທັນໃຫ້ການ ຮ່ວມມືເທົ່າທີ່ຄວນ .

   ທ່ານ ຫັດສະໃນ ສີບຸນເຫຼືອງ ຫົວໜ້າພະແນກຊັບພະຍາກອນທໍາມະຊາດ ແລະສິ່ງແວດລ້ອມແຂວງອັດຕະປືຍັງໄດ້ກ່າວຕື່ມວ່າ: ເພື່ອແກ້ໄຂບັນຫາການເຊົ່າ-ສໍາປະ ທານທີ່ດິນຂອງລັດທີ່ຍັງບໍ່ທັນໄດ້ຮັບການພັດທະນາໃນຕໍ່ໜ້າທາງພາກສ່ວນທີ່ກ່ຽວຂ້ອງຕ້ອງເປັນເຈົ້າການປະຕິບັດຢ່າງເຂັ້ມງວດຕາມຂັ້ນຕອນຂອງກົດໝາຍການລົງ ທຶນ ແລະ ກົດໝາຍອື່ນໆທີ່ຕິດພັນ, ບໍລິສັດ, ບຸກຄົນ, ນິຕິບຸກຄົນທີ່ເຊົ່າ-ສໍາປະທານທີ່ດິນຂອງລັດຖ້າໝົດອາຍຸສັນຍາເຊົ່າ-ສໍາປະທານຕ້ອງສົ່ງຄືນພື້ນທີ່ດິນໃຫ້ລັດເພື່ອຈັດສັນຄືນໃໝ່ຕາມຄວາມເໝາະສົມ, ບັນດາບໍລິສັດຜູ້ພັດທະນາໂຄງການຕ້ອງສ້າງບົດລາຍງານສຶກສາຜົນກະທົບດ້ານສິ່ງແວດລ້ອມເບື້ອງຕົ້ນ ແລະ ການປະເມີນຜົນກະທົບຕໍ່ສິ່ງແວດລ້ອມ ແລະແຜນຄຸ້ມຄອງສິ່ງແວດລ້ອມ-ສັງຄົມ ແລະທໍາມະຊາດ,ລວມທັງລົງຕິດຕາມກວດກາຊຸກຍູ້ໃຫ້ບໍລິສັດຜູ້ພັດທະນາໂຄງການປະຕິບັດຕາມແຜນຄຸ້ມຄອງສິ່ງແວດລ້ອມທີ່ໄດ້ຮັບຮອງຢູ່ໃນບົດບັນທຶກຂອງໂຄງການ.

-------------

ຂ່າວ: ວັດທະນາ

ຮູບພາບ: ໜັງສືພິມເສດຖະກິດ-ສັງຄົມ

แชร์