ຊຸກຍູ້ວຽກງານຄຸ້ມຄອງການທ່ອງທ່ຽວ ຢູ່ໄຊສົມບູນ

ກອງປະຊຸມຊຸກຍູ້ວຽກງານຄຸ້ມຄອງການທ່ອງທ່ຽວໄດ້ຈັດຂຶ້ນໃນວັນທີ 7 ມັງກອນ 2021 ທີ່ຫ້ອງປະຊຸມພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວແຂວງ, ໂດຍການເປັນປະທານຮ່ວມຂອງ ທ່ານ ຕົ່ງມົວ ຊົວໂກ້ ຮອງເຈົ້າແຂວງໄຊສົມບູນ, ຫົວໜ້າພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວແຂວງ, ທ່ານ ໄຊສົມ ບັດບຸນນະຜົນຮອງຫົວໜ້າກົມຄຸ້ມຄອງການທ່ອງທ່ຽວ, ມີທີມງານຈາກກົມຄຸ້ມຄອງການທ່ອງທ່ຽວ, ຫ້ອງການຖະແຫຼງຂ່າວ,ວັດທະນະທໍາ ແລະທ່ອງທ່ຽວ 5 ເມືອງ ພ້ອມດ້ວຍຜູ້ປະກອບການ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

ໂອກາດດັ່ງກ່າວ ທ່ານ ຕົ່ງມົວ ຊົວໂກ້ ໄດ້ລາຍງານກ່ຽວກັບສະ ພາບການຄຸ້ມຄອງການທ່ອງທ່ຽວຢູ່ແຂວງໄຊສົມບູນ ໃນໄລຍະຜ່ານມາ, ຈາກນັ້ນທ່ານ ໄຊສົມບັດ ບຸນນະຜົນໄດ້ລາຍງານກ່ຽວກັບນະໂຍບາຍຕ່າງໆຂອງການທ່ອງທ່ຽວຢູ່ ສປປ ລາວ ໂດຍສະເພາະແມ່ນນິຕິກໍາຕ່າງໆຂອງຂະແໜງທ່ອງທ່ຽວ, ກິດຈະການທຸລະກິດທ່ອງທ່ຽວ, ການເກັບຄ່າທໍານຽມ-ຄ່າ ບໍລິການ, ມາດຕະຖານການທ່ອງ ທ່ຽວອາຊຽນ ແລະອື່ນໆ, ຊຶ່ງປະ ຈຸບັນພັກ-ລັດໄດ້ຖືເອົາວຽກງານການທ່ອງທ່ຽວເປັນວຽກບູລິມະສິດໃນການພັດທະນາເສດຖະກິດ-ສັງຄົມ ໂດຍສົ່ງເສີມການທ່ອງທ່ຽວໄປຄຽງຄູ່ກັບການຜະລິດກະສິກໍາເປັນສິນຄ້າ, ຊຸກຍູ້ການທ່ອງທ່ຽວທາງດ້ານທໍາມະຊາດ, ປະຫວັດສາດ ແລະວັດທະນະທໍາໃຫ້ມີຄວາມຍືນຍົງໂດຍປະຊາຊົນມີສ່ວນຮ່ວມເພື່ອໃຫ້ປະຊາຊົນບັນດາເຜົ່າໄດ້ມີວຽກເຮັດງານທໍາ, ມີລາຍຮັບເຂົ້າໃນຄອບຄົວ ແລະມີຊີວິດການເປັນຢູ່ທີ່ດີຂຶ້ນກວ່າເກົ່າ.

  ກອງປະຊຸມດັ່ງກ່າວຜູ້ເຂົ້າຮ່ວມຍັງໄດ້ຮັບຟັງການເຜີຍແຜ່ບັນດາເອກະສານຕ່າງໆທີ່ຕິດພັນກັບວຽກງານຄຸ້ມຄອງການທ່ອງທ່ຽວເປັນຕົ້ນແມ່ນການຄຸ້ມຄອງທຸລະກິດນໍາທ່ຽວ, ການຄຸ້ມຄອງສະຖານທີ່ພັກແຮມ, ມາດຕະຖານການທ່ອງທ່ຽວ ແລະ ບໍລິການ, ການຄຸ້ມຄອງທຸລະກິດຮ້ານອາຫານ-ຮ້ານບັນເທີງ ແລະ ການຄຸ້ມຄອງສະ ຖານທີ່ທ່ອງທ່ຽວຕ່າງໆ, ໂດຍແຕ່ລະພາກສ່ວນໄດ້ປະກອບຄໍາຄິດຄໍາເຫັນປຶກສາຫາລືແລກປ່ຽນບົດຮຽນເຊິ່ງກັນ ແລະກັນເພື່ອຄວາມເຂົ້າໃຈ ແລະເປັນເອກະພາບກັນໃນການຈັດຕັ້ງປະຕິບັດວຽກງານໃນຕໍ່ໜ້າເພື່ອໃຫ້ ວຽກງານທ່ອງທ່ຽວຢູ່ແຂວງໄຊສົມບູນໄດ້ຮັບການພັດທະນາດີຂຶ້ນເທື່ອລະກ້າວພ້ອມທັງສາມາດຮັບປະກັນການຮອງຮັບນັກທ່ອງທ່ຽວທັງພາຍໃນ ແລະຕ່າງປະເທດເຂົ້າມາທ່ຽວຊົມ ແຂວງໄຊສົມບູນ ໃຫ້ໄດ້ຫຼາຍຂຶ້ນໃນອະນາຄົດ.

ຂຽນໂດຍ: ພາພອນ ນະວົງໄຊ

ຮູບພາບ: ໜັງສືພິມເສດຖະກິດ-ສັງຄົມ

แชร์