187 ຮ້ານກຽມຂົນສິນຄ້າສວຍງາມຮ່ວມງານວາງສະແດງຜະລິດຕະພັນເຟີນິເຈີໄມ້ລາວ

  ເພື່ອປະຕິບັດຕາມທິດນະໂຍບາຍໃນການສົ່ງເສີມທັງເປັນການໂຄສະນາເຜີຍແຜ່ໃຫ້ສັງຄົມຮັບຮູ້ຜະລິດຕະພັນເຟີນີເຈີໄມ້ລາວຫຼາຍຂຶ້ນໃຫ້ຜູ້ຜະລິດສາມາດເຂົ້າຫາຕະ ຫຼາດ ແລະຈຳໜ່າຍສິນຄ້າໂດຍສະເພາະການເຈາະຕະຫຼາດພາຍໃນຊ້ວງໄລຍະຜ່າວິກິດໂຄວິດ-19 ທີ່ກຳລັງລະບາດຮອບໃໝ່ຢູ່ບັນດາປະເທດໃກ້ຄຽງສະມາຄົມເຟີນີເຈີລາວຈຶ່ງຈະໄດ້ຈັດງານວາງສະແດງຜະລິດຕະພັນເຟີນີເຈີໄມ້ລາວຄັ້ງທີ 7 ປະຈຳປີ 2021 ຂຶ້ນໂດຍເວລານີ້ຜູ້ປະກອບການໄດ້ຫຼັ່ງໄຫຼເຂົ້າຈັບຈອງຫ້ອງຂາຍສິນຄ້າຈົນກາຍເປົ້າໝາຍເຈົ້າພາບຕັ້ງໄວ້ ຫຼືມີທັງໝົດ 187 ຮ້ານ ຈາກທີ່ຕັ້ງໄວ້ເບື້ອງຕົ້ນພຽງແຕ່ 175 ຫ້ອງ.

 ທ່ານ ກອງມາລາ ພົມມາໄລ ຮອງປະທານສະມາຄົມເຟີນີເຈີລາວເປີດເຜີຍຕໍ່ທີມຂ່າວໜັງສືພິມເສດຖະກິດ-ສັງຄົມ ວ່າ: ງານຄັ້ງນີ້ຈະຈັດຂຶ້ນໃນລະຫວ່າງວັນທີ 9-17 ມັງກອນ 2021 ທີ່ຈະມາເຖິງນີ້ທີ່ສູນການຄ້າລາວ-ໄອເຕັກ (ຕຶກເກົ່າ) ໂດຍຕາມແຜນທີ່ວາງໄວ້ເບື້ອງຕົ້ນສຳລັບຫ້ອງວາງສະແດງແມ່ນຈະມີທັງໝົດ 175 ຫ້ອງ ໃນນັ້ນມີ 25 ຫ້ອງ ສຳລັບຫົວໜ່ວຍທຸລະກິດໂອດັອບແຕ່ປະຈຸບັນມີການຈັບຈອງຫ້ອງຂາຍບັນລຸແລ້ວ 187 ຫ້ອງການແຜນ 8 ຫ້ອງ, ທີ່ມາຈາກຕ່າງແຂວງ ແລະນະ ຄອນຫຼວງວຽງຈັນ ທັງນີ້ຄາດຄະເນຕະຫຼອດງານຈະມີການຈໍລະຈອນຊື້-ຂາຍສິນຄ້າ ປະມານ 10 ຕື້ກີບ ແລະຈະມີຜູ້ເຂົ້າທ່ຽວຊົມປະມານ 1 ແສນຄົນ.

   ທ່ານ ກອງມາລາ ພົມມາໄລ ກ່າວຕື່ມອີກວ່າ: ການຈັດງານນີ້ກໍເພື່ອເປັນການຈັດຕັ້ງປະຕິບັດ ແລະຜັນຂະຫຍາຍຕາມເນື້ອໃນຈິດໃຈຂອງຂັ້ນເທິງວາງອອກໃຫ້ປາກົດຜົນເປັນຈິງໄປເທື່ອລະກ້າວ, ຜັນຂະຫຍາຍ

   ຕາມເນື້ອໃນຂອງແຈ້ງການເລກທີ 15/ນຍ, ເພື່ອເປັນການອະນຸລັກຮັກສາປ່າໄມ້, ການນຳໃຊ້ໄມ້ໃຫ້ເກີດຜົນປະໂຫຍດສູງສຸດແລະມີໄມ້ໄວ້ໃຊ້ຢ່າງຍືນຍົງໂດຍການປຸງແຕ່ງໃຫ້ເປັນຜະລິດຕະພັນສຳເລັດຮູບມາຈາກໄມ້, ຫວາຍ ແລະ  ໄມ້ປ່ອງໃຫ້ມີຫຼາກຫຼາຍຜະລິດຕະພັນ ຕາມທີ່ສັງຄົມປະຈຸບັນຕ້ອງການ ແລະເປັນທີ່ນິຍົມກັນຢູ່ດ້ວຍການນຳໃຊ້ເຕັກໂນໂລຊີທີ່ທັນສະໄໝ ແລະທັງເປັນການສ້າງມູນຄ່າເພີ່ມໃຫ້ກັບຜະລິດຕະພັນເຟີນີເຈີລາວໃຫ້ກາຍເປັນສິນຄ້າທີ່ມີຄຸນນະພາບ ແລະລາຄາສູງຕາມຄວາມ ຕ້ອງການຂອງລູກຄ້າ ແລະຍັງເປັນການສ້າງວຽກເຮັດງານທຳໃຫ້ກັບປະຊາຊົນບັນດາເຜົ່າ, ຕ້ານໄພວ່າງງານເພື່ອຜ່ານຜ່າວິດກິດໂຄວິດ-19 ທີ່ກຳລັງລະບາດໃນເວລານີ້ຢູ່ປະເທດໃກ້ຄຽງ ແລະປະກອບສ່ວນຊ່ວຍໃຫ້ປະຊາຊົນຫຼຸດພົ້ນຈາກຄວາມທຸກຍາກໄດ້ໃນອະນາຄົດ.

  ທ່ານ ກອງມາລາ ພົມມາໄລ ກ່າວຕື່ມວ່າ: ສຳລັບຜະລິດຕະພັນທີ່ຈະນຳມາວາງສະແດງມີເຄື່ອງເຟີນີເຈີທີ່ເຮັດດ້ວຍໄມ້, ຫວາຍ, ໄມ້ປ່ອງ ແລະຈາກວັດສະດຸເສດເຫຼືອຕ່າງໆ, ຜະລິດຕະພັນຫັດຖະກຳ ແລະເຄື່ອງແກະສະຫຼັກ, ເຄື່ອງປະດັບຕົກແຕ່ງ ແລະເອ້ຢ້ອງພາຍໃນເຮືອນ ແລະອື່ນໆ.

แชร์