ສຶກສາ ໄຊຍະບູລີ ປະກາດພະນັກງານ ຮັບອຸດໜູນບຳນານ

  ພະແນກສຶກສາທິການ ແລະກີລາແຂວງໄຊຍະບູລີ ໄດ້ຈັດພິທີປະກາດພະນັກງານເພື່ອຮັບອຸດໜູນບຳນານໃນເມື່ອວັນທີ 31 ທັນວາ 2020 ຜ່ານມານີ້ທີ່ຫ້ອງປະຊຸມພະແນກສຶກສາທິການ ແລະກີລາແຂວງໄຊຍະບູລີ ໂດຍເຂົ້າຮ່ວມຂອງ ທ່ານ ບຸນເພັງມາຖາຮອງຫົວໜ້າພະແນກສຶກສາທິການ ແລະກີລາແຂວງໄຊຍະບູລີ, ມີຫົວໜ້າຫ້ອງການສຶກສາທິການ ແລະກີລາ ເມືອງໄຊຍະບູລີ, ຮອງຜູ້ອຳນວຍການໂຮງຮຽນອອ້ມຂ້າງແຂວງ, ຜູ້ອຳນວຍການໂຮງຮຽນເຕັກນິກວິຊາຊີບແບບປະສົມແຂວງ, ຫົວໜ້າຫ້ອງການສຶກສາສົງແຂວງ, ຫົວໜ້າ-ຮອງຫົວໜ້າຂະແໜງ, ຫົວໜ້າ-ຮອງຫົວໜ້າສູນ, ພະນັກງານພາຍໃນພະແນກເຂົ້າຮ່ວມຢ່າງພ້ອມພຽງ.

  ໃນພິທີ ທ່ານ ສຸນີ ວິໄລວອນຮອງຂະແໜງຈັດຕັ້ງ-ພະນັກງານພະແນກສຶກສາທິການ ແລະກີລາ ແຂວງໄຊຍະບູລີຂຶ້ນຜ່ານຂໍ້ຕົກລົງ ວ່າດ້ວຍການອະນຸມັດອອກພັກການເພື່ອຮັບອຸດໜູນບຳນານຈຳນວນ 1 ທ່ານ ຂອງພະແນກສຶກສາທິການ ແລະກີລາແຂວງໄຊຍະບູ ລີ, ຂໍ້ຕົກລົງຂອງລັດຖະມົນຕີກະຊວງສຶກສາທິການ ແລະກີລາເລກທີ 4590/ສສກ ລົງວັນທີ 08 ຕຸລາ 2020 ເຫັນດີຕົກລົງໃຫ້ທ່ານ ບຸນທັນ ໄຊຍະສິດຫົວໜ້າຂະແໜງກ່ອນໄວຮຽນພັກການເພື່ອຮັບອຸດໜູນບຳນານນັບແຕ່ວັນທີ 1 ມັງກອນ 2021 ເປັນຕົ້ນໄປ, ລວມປີການທັງໝົດໄດ້ 34 ປີ, ອັດຕາສ່ວນຮ້ອຍບຳນານ 77%, ຜ່ານຂໍ້ຕົກລົງຂອງລັດຖະມົນຕີກະຊວງສຶກສາທິການ ແລະກີລາວ່າດ້ວຍການຍ້ອງຍໍ ເລກທີ 7134 /ສສກ ວັນທີ 28 ທັນວາ 2020 .

  ໂອກາດນີ້ ທ່ານ  ບຸນເພັງມາຖາຮອງຫົວໜ້າພະແນກສຶກສາທິການ ແລະກີລາແຂວງໄຊຍະບູລີໄດ້ໂອ້ລົມຕໍ່ພິທີກ່ອນອື່ນໝົດໄດ້ຍ້ອງຍໍຊົມເຊີຍໃນການປະກອບສ່ວນເຫື່ອແຮງສະຕິປັນຍາເຂົ້າໃນວຽກງານການສຶກສາ ແລະກີລາຕະຫຼອດໄລຍະຜ່ານມາເປັນຕົ້ນແມ່ນການເຄື່ອນໄຫວວຽກງານແຕ່ລະດ້ານທີ່ໄດ້ຮັບການມອບໝາຍສຳເລັດເປັນຢ່າງດີຈາກນັ້ນກໍ່ໄດ້ມອບໃບຍໍຍ້ອງ ຂອງລັດຖະມົນຕີກະຊວງສຶກສາທິການ ແລະກີລາ, ມອບເງິນອຸດໜູນບຳນານ, ມອບຂອງຂວັນໃຫ້ທ່ານ ບຸນທັນ ໄຊຍະສິດ.

----

ໂດຍ: ນາລີ ແພງວິໄລ

แชร์