ກຳມະບານຮາກຖານ ຖວທ ບໍ່ແກ້ວ ເຊື່ອມຊຶມເອກະສານສຳຄັນ

  ກອງປະຊຸມເຊື່ອມຊຶມເອກະສານສໍາຄັນຕິດພັນກັບການມອບໃບຍ້ອງຍໍຂອງຄະນະບໍລິຫານງານສະຫະພັນກໍາມະບານລາວປະຈໍາປີ 2019 ຂອງຮາກຖານກໍາມະບານພະແນກ ຖວທ ແຂວງບໍ່ແກ້ວ ໄດ້ຈັດຂຶ້ນໃນວັນທີ 31 ທັນວາ 2020 ຜ່ານມານີ້ ທີ່ຫ້ອງປະຊຸມພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວແຂວງ (ຖວທ) ໂດຍການເປັນປະທານຂອງສະຫາຍ ສົມສັກ ວຽງວິໄລ ປະທານສະຫະພັນກໍາມະບານຮາກຖານພະແນກ ຖວທ ແຂວງ,ເຂົ້າຮ່ວມຂອງ ສະຫາຍ ສົມຄິດ ວົງປັນຍາ ຫົວ ໜ້າພະແນກ ຖວທ ແຂວງ, ມີຫົວໜ້າໜ່ວຍກໍາມະບານ, ສະມາຊິກກໍາມະບານເຂົ້າຮ່ວມ.

 ເອກະສານທີ່ໄດ້ເຊື່ອມຊຶມປະກອບມີ: ການຮັບຮອງເອົາຄະນະບໍລິຫານງານສະຫະພັນກໍາມະບານແຂວງບໍ່ແກ້ວສະໄໝ VIII, ເອກະສານວ່າດ້ວຍການແບ່ງຄວາມຮັບຜິດຊອບນໍາພາ, ຊີ້ນໍາແຕ່ລະຂົງເຂດວຽກງານປະທານ-ຮອງປະທານ,ຄະນະບໍລິຫານງານສະຫະພັນກໍາມະບານແຂວງສະໄໝທີ VIII, ເອກະສານວ່າດ້ວຍສິດ-ໜ້າທີ່ ແລະແບບແຜນວິທີເຮັດວຽກຂອງຄະນະບໍລິຫານງານສະຫະພັນກໍາມະບານແຂວງ ແລະ ເອກະສານອື່ນໆຈໍານວນໜຶ່ງ, ແນໃສ່ເຮັດໃຫ້ພະນັກງານແຕ່ລະສະຫາຍຮູ້ ແລະກໍາແໜ້ນບັນດານິຕິກໍາ, ຂໍ້ກໍານົດກົດລະບຽບ, ສິດພາລະບົດບາດຂອງສະຫະພັນກໍາມະບານລາວວາງອອກ ໂດຍສະເພາະແມ່ນຮູ້ເຖິງຜົນສໍາເລັດຂອງກອງປະຊຸມໃຫຍ່ຜູ້ແທນສະຫະພັນກໍາມະບານແຂວງບໍ່ແກ້ວສະໄໝທີ VIII.

  ພິທີໄດ້ຜ່ານຂໍ້ຕົກລົງວ່າດ້ວຍການຍ້ອງຍໍກົມກອງ, ບຸກຄົນທີ່ມີຜົນງານດີເດັ່ນໃນການຈັດຕັ້ງປະຕິບັດການເຄື່ອນໄຫວວຽກງານກໍາມະບານລາວປະຈໍາປີ 2019 ມີຈໍານວນ 63 ໃບ, ເປັນກຽດມອບໂດຍສະຫາຍ ສົມຄິດ ວົງປັນຍາ ຫົວໜ້າພະແນກ ຖວທ ແຂວງ ພ້ອມທັງມີຄໍາເຫັນໂອ້ລົມຮຽກຮ້ອງໃຫ້ບັນດາສະມາຊິກແຕ່ລະສະຫາຍຈົ່ງສືບຕໍ່ຮັກສາມູນເຊື້ອອັນດີງາມໄວ້,ເອົາໃຈໃສ່ປະຕິບັດຂໍ້ແຂ່ງຂັນ 5 ເປັນເຈົ້າຂອງສູນກາງສະຫະພັນກໍາມະບານວາງອອກໃຫ້ເຂັ້ມງວດ,ເປັນເຈົ້າການປະຕິບັດວຽກງານວິຊາສະເພາະທີ່ການຈັດຕັ້ງມອບໝາຍໃຫ້, ແນໃສ່ພັດທະນາຕົນເອງໃຫ້ເປັນພະນັກງານທີ່ດີເດັ່ນໃນອົງການຈັດຕັ້ງພັກ-ລັດນັບມື້ພັດທະນາຍິ່ງໆຂຶ້ນ.

---------

ຂ່າວ: ຄໍາພັນ ແກ້ວມະນີ

แชร์