ປະກາດກຸ່ມບ້ານປາກຫາດ ເປັນກຸ່ມບ້ານວັດທະນະທໍາ

  ເມືອງຜາອຸດົມ ແຂວງບໍ່ແກ້ວ ໄດ້ປະກາດຮັບຮອງກຸ່ມປາກຫາດເປັນກຸ່ມວັດທະນະທຳ ແລະບ້ານສາມັກຄີປອງດອງ, ຊຶ່ງພິທີດັ່ງກ່າວໄດ້ຈັດຂຶ້ນໃນທ້າຍເດືອນທັນວາ2020 ຜ່ານມາ ທີ່ເດີ່ນໂຮງຮຽນມັດທະຍົມ ສົມບູນປາກຫາດ ໂດຍມີທ່ານ ສູນທອນ ວັນສະຫວ່າງປະທານແນວລາວສ້າງຊາດ ເມືອງ, ທ່ານ ສົມນິດ ໄຊທະວົງສິດ ຮອງເຈົ້າເມືອງໆຜາອຸດົມຜູ້ຊີ້ນໍາວຽກງານຂົງເຂດວັດທະນະທໍາ-ສັງຄົມ, ທ່ານ ສົມສັກ ມະຫາພົນ ຮອງຫົວໜ້າພະແນກຖະແຫຼງຂ່າວ, ວັດທະນະທຳ ແລະທ່ອງ ທ່ຽວແຂວງບໍ່ແກ້ວ, ພ້ອມດ້ວຍຄະນະພັກຮາກຖານ, ອໍານາດການປົກ ຄອງບ້ານ, ຄູ-ອາຈານຕະຫຼອດຮອດພໍ່ແມ່ປະຊາຊົນເຂົ້າຮ່ວມ.
  ທ່ານ ຄຳສະນັດ ຕະວີຄອນ ຮອງເລຂາຄະນະພັກຮາກຖານກຸ່ມບ້ານປາກຫາດໄດ້ລາຍງານວ່າ: ກຸ່ມບ້ານປາກຫາດປະກອບມີ 5 ບ້ານຄື: ບ້ານປາກຫາດ, ດອນແກ້ວ, ຫາດຄຳ, ຫາດລີ່ ແລະບ້ານສີດອນໄຈ ລວມມີ 4 ຊົນ ເຜົ່າຄື: ເຜົ່າລາວ, ເຜົ່າລື້, ເຜົ່າກືມມຸ ແລະເຜົ່າລະເມດ, ມີ 546 ຫຼັງຄາເຮືອນ, ມີ 654 ຄອບຄົວ, ພົນລະເມືອງທັງໝົດ 2.513 ຄົນ ໃນນັ້ນ ມີ ຄອບຄົວວັດທະນະທໍາ 618 ຄອບ ຄົວ ເທົ່າກັບ 94,49% ແລະມີ ຄອບຄົວສາມັກຄີປອງດອງ 248 ຄອບຄົວ, ໃນໄລຍະຜ່ານມາ ເລຂາຄະນະພັກຮາກຖານ, ເລຂາໜ່ວຍພັກ, ອໍານາດການປົກຄອງບ້ານແຕ່ລະບ້ານໄດ້ເຮັດວຽກເປັນ ໝູ່ຄະນະແບ່ງບຸກຄົນຮັບຜິດຊອບຕາມສິດໜ້າທີ່ ແລະພາລະບົດບາດ ໂດຍອີງໃສ່ 4 ເນື້ອໃນ 4 ຄາດໝາຍຂອງພັກ-ລັດວາງອອກ; ໄດ້ປະສານສົມທົບກັບແນວລາວສ້າງຊາດເມືອງອົງການພາຄີກໍານົດວິທີການ ແລະແບບແຜນການສ້າງຄອບຄົວ ແລະບ້ານສາມັກຄີປອງດອງ, ນຳພາບັນດາຄອບຄົວພາຍໃນບ້ານຈັບມືແຂ່ງ ຂັນກັນສ້າງຄອບຄົວໃຫ້ໄດ້ຕາມ 4 ເນື້ອໃນມາດຖານຄອບຄົວສາມັກຄີປອງດອງ ແລະໄດ້ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ກັບພໍ່ແມ່ປະຊາຊົນ, ໂດຍສະເພາະເຊື່ອມຊຶມແນວທາງ ນະໂຍບາຍຂອງພັກ-ລະບຽບກົດ ໝາຍຂອງລັດເຮັດໃຫ້ພໍ່ແມ່ປະຊາ ຊົນມີແນວຄິດອຸ່ນອ່ຽນທຸ່ນທ່ຽງ ເຊື່ອໝັ້ນຕໍ່ການຊີ້ນໍາໆພາຂອງພັກ-ລັດ; ປຸກລະດົມໃຫ້ພໍ່ແມ່ປະຊາຊົນ ຮັກສາຮີດຄອງປະເພນີອັນດີງາມ ຂອງຊາດຂອງເຜົ່າ ແລະສ້າງ ຄວາມສາມັກຄີຮັກແພງຊ່ວຍເຫຼືອ ເຊິ່ງກັນ ແລະກັນປະກອບສ່ວນ ເຂົ້າໃນວຽກງານປົກປັກຮັກສາ ແລະສ້າງສາພັດທະນາປະເທດ ຊາດ ໂດຍອີງໃສ່ພື້ນຖານປະຊາຊົນ ແມ່ນຖືເອົາການເຮັດນາເປັນອາຊີບ ຕົ້ນຕໍ, ການປູກຝັງ-ລ້ຽງສັດ ແລະ ຄ້າຂາຍເປັນອາຊີບສຳຮອງທົ່ວ ບ້ານມີຍອດລາຍຮັບລວມທັງໝົດ 11,83 ຕື້ກີບ ສະເລ່ຍຕໍ່ຫົວຄົນໜຶ່ງ ໄດ້ 4,7 ລ້ານກີບຕໍ່ຄົນຕໍ່ປີ, ພາຍໃນ ກຸ່ມມີໄຟຟ້າໃຊ້ຢ່າງທົ່ວເຖິງ, ມີໂຮງ ຮຽນທັງໝົດ 5 ແຫ່ງ, ແຕ່ລະບ້ານສໍາເລັດການປະກາດເປັນບ້ານສາທາລະນະສຸກແບບຢ່າງ, ມີໂຮງໝໍນ້ອຍ 1 ແຫ່ງ, ມີພະນັກງານແພດ ໝໍ 4 ຄົນ ແລະມີຖົງຢາປະຈຳບ້ານຈໍານວນໜຶ່ງໄວ້ໃຫ້ກັບປະຊາຊົນ, ກຳລັງປ້ອງກັນຊາດ-ປ້ອງກັນຄວາມສະຫງົບແມ່ນໄດ້ເຄື່ອນໄຫວ ຕາມສິດໜ້າທີ່ຂອງຕົນໃນການກວດກາການເຂົ້າ-ອອກຂອງປະຊາຊົນຢ່າງເປັນປົກກະຕິ.
  ໃນພິທີໄດ້ຜ່ານຂໍ້ຕົກລົງຂອງທ່ານເຈົ້າແຂວງ ແລະຂໍ້ຕົກລົງ ຂອງທ່ານເຈົ້າເມືອງວ່າດ້ວຍການມອບໃບຢັ້ງຢືນກຸ່ມບ້ານວັດທະນະທຳ, ຄອບຄົວ ແລະບ້ານສາມັກຄີ ປອງດອງ, ທ່ານ ສູນທອນ ວັນສະຫວ່າງ ປະທານແນວລາວສ້າງຊາດ ເມືອງ ໃຫ້ກຽດມອບໃບຢັ້ງຢືນບ້ານສາມັກປອງດອງ, ຈາກນັ້ນທ່ານ ສົມນິດ ໄຊທະວົງສິດຮອງເຈົ້າ ເມືອງໆ ຜາອຸດົມ ໃຫ້ກຽດມອບໃບຢັ້ງຢືນກຸ່ມບ້ານວັດທະນະທຳແລະ ທ່ານ ຄຳສະນັດ ຕະວີຄອນຮອງເລຂາຄະນະພັກຮາກຖານໄດ້ມອບໃບຢັ້ງຢືນຄອບຄົວສາມັກຄີປອງດອງອີກດ້ວຍ.

----

ຂ່າວ: ແປ

แชร์