ເສຍຊີວິດແລ້ວ 16 ຄົນ ຈາກອຸບັດເຫດທາງດ່ວນວຽງຈັນ-ວັງວຽງ

   ນັບແຕ່ມື້ເລີ່ມກໍ່ສ້າງເສັ້ນທາງດ່ວນນະຄອນຫຼວງວຽງຈັນ-ວັງວຽງແຕ່ວັນທີ 4 ເມສາ 2018 ຫາວັນທີ 23 ທັນວາ 2020, ມີອຸບັດຕິເຫດເກີດຂຶ້ນທັງໝົດ 30 ຄັ້ງເຮັດໃຫ້ມີຜູ້ເສຍຊີວິດ 16 ຄົນ ແລະສ້າງຜົນເສຍຫາຍເປັນຈໍານວນຫຼາຍ.
   ທ່ານ ພັອ ກົງສີ ສຸວັນນະຕຸ້ມ ຫົວໜ້າກົມຕໍາຫຼວດຈະລາຈອນກົມໃຫຍ່ຕໍາຫຼວດຖະແຫຼງຕໍ່ນັກຂ່າວ ປກສ ໃນວັນທີ 29 ທັນວາ 2020 ວ່າ: ນັບແຕ່ມື້ເລີ່ມກໍ່ສ້າງເສັ້ນທາງດ່ວນນະຄອນຫຼວງວຽງຈັນ-ວັງວຽງ ເຖິງທ້າຍເດືອນທັນວານີ້ມີອຸບັດຕິເຫດເກີດຂຶ້ນ 30 ຄັ້ງ, ສົ່ງຜົນເຮັດໃຫ້ພາຫະນະເປ່ເພທັງໝົດ 60 ຄັນ; ໃນນີ້, ເປ່ເພເລັກໜ້ອຍ 17 ຄັນ, ເປ່ເພສົມຄວນ 43 ຄັນ ແລະສົ່ງຜົນເຮັດໃຫ້ມີຜູ້ເສຍຊີວິດທັງໝົດ 16 ຄົນ, ສະເພາະຢູ່ເຂດເມືອງນາຊາຍທອງ ນະຄອນຫຼວງວຽງຈັນ ມີອຸ ບັດຕິເຫດເກີດຂຶ້ນ 11 ຄັ້ງແລະມີຜູ້ເສຍຊີວິດ 6 ຄົນ, ສ່ວນແຂວງວຽງຈັນຢູ່ເຂດເມືອງໂພນໂຮງມີອຸບັດເຫດເກີດຂຶ້ນທັງໝົດ 13 ຄັ້ງ ແລະມີຜູ້ເສຍຊີວິດ 8 ຄົນ, ຢູ່ເຂດເມືອງຫີນເຫີບມີອຸບັດເຫດເກີດຂຶ້ນທັງໝົດ 3 ຄັ້ງ ແລະມີຜູ້ເສຍຊີວິດ 1 ຄົນ,ຢູ່ເຂດເມືອງວັງວຽງມີອຸບັດເຫດເກີດຂຶ້ນທັງໝົດ 3 ຄັ້ງ ແລະມີຜູ້ເສຍຊີວິດ 1 ຄົນ.

   ນັບແຕ່ມື້ເປີດເສັ້ນທາງດ່ວນນະຄອນຫຼວງວຽງຈັນ-ວັງວຽງໃນວັນທີ 20-23 ທັນວາ 2020, ມີອຸບັດເຫດເກີດຂຶ້ນແລ້ວທັງໝົດ 4 ຄັ້ງ, ພາຫະນະເປ່ເພທັງໝົດ 5 ຄັນ, ໃນນີ້, ເກີດຢູ່ເມືອງນາຊາຍທອງ 1 ຄັ້ງ, ພາຫະນະເປ່ເພເລັກໜ້ອຍ 1 ຄັນ, ເປ່ເພສົມຄວນ 1 ຄັນ, ເກີດຢູ່ເມືອງໂພນໂຮງ3 ຄັ້ງ,ພາຫະນະເປ່ເພເລັກໜ້ອຍ 1 ຄັນ, ເປ່ເພສົມຄວນ 2 ຄັນ.
   ຫົວໜ້າກົມຕໍາຫຼວດຈະລາຈອນກ່າວຕື່ມອີກວ່າ: ສາເຫດຫຼັກທີ່ພາໃຫ້ເກີດອຸບັດເຫດເກີດຂຶ້ນຢູ່ເສັ້ນທາງດ່ວນນັ້ນແມ່ນເກີດຈາກຫຼາຍປັດໄຈເປັນຕົ້ນແມ່ນເກີດຈາກຕົວຂອງຜູ້ຂັບຂີ່ເອງທີ່ບໍ່ປະຕິບັດ ແລະເຄົາລົບກົດລະບຽບຈະລາຈອນໂດຍຂັບຂີ່ດ້ວຍຄວາມໄວເກີນທາງການກຳນົດໄວ້, ຂັບຂີ່ລົດບໍ່ໃຫ້ກຽດເຊົ່ງກັນ ແລະກັນ, ຜູ້ຂັບຂີ່ຍັງບໍ່ທັນຮັບຮູ້ ແລະເຂົ້າໃຈກ່ຽວກັບຊ່ອງທາງຈະລາຈອນ. ນອກນີ້, ຍັງເກີດຈາກສະພາບເເວດລ້ອມ, ເກີດຈາກສັດທີ່ລິດລອດເຂົ້າໄປໃນເສັ້ນທາງດ່ວນແລ້ວພາໃຫ້ເກີດອຸບັດ ເຫດຕາມມາ.


    ຕໍ່ກັບບັນຫາການລະເມີດກົດລະບຽບຂອງຜູ້ຂັບຂີ່ນີ້, ເຈົ້າໜ້າທີ່ຕໍາຫຼວດຈະລາຈອນທີ່ປະຈໍາຢູ່ເສັ້ນທາງດ່ວນຈະອອກເຄື່ອນໄຫວເຮັດໜ້າທີ່ໃນການກວດກາຢູ່ຕາມທາງດ່ວນເມື່ອພົບເຫັນຜູ້ຂັບຂີ່ລະເມີດກົດລະບຽບຈະລາຈອນເປັນຕົ້ນແມ່ນຂັບຂີ່ລົດໄວເກີນປ້າຍຫ້າມ, ຂັບຂີ່ບໍ່ຖືກຊ່ອງທາງຈະລາຈອນ ຫຼືຢຸດຈອດລົດລົງໄປຖ່າຍຮູບຢູ່ຕາມແຄມເຈົ້າໜ້າທີ່ຈະໄດ້ສຶກສາອົບຮົມກ່າວເຕືອນ, ແຕ່ຖ້າວ່າໃນອະນາຄົດຫາກມີດຳລັດຫຼືມາດຕະການຈາກຂັ້ນເທິງອອກມາເຈົ້າໜ້າທີ່ຈະເຂັ້ມງວດໃຊ້ມາດຕະການປັບໃໝຖ້າຫາກຜູ້ຂັບຂີ່ຍັງຝືນດື້ລະເມີດກົດລະບຽບຈະລາຈອນ, ຊຶ່ງການປັບໃໝນັ້ນແມ່ນເປັນການດັດນິໃສຂອງຜູ້ຂັບຂີ່ທີ່ສືບຕໍ່ລະເມີດກົດລະບຽບຈະລາຈອນໃຫ້ຫັນມາໃສ່ໃຈປະຕິບັດກົດລະບຽບຈະລາຈອນຢ່າງເຂັ້ມງວດເພື່ອເປັນການປ້ອງກັນບໍ່ໃຫ້ຕົວທ່ານເອງເກີດອຸບັດເຫດ ຫຼືເສຍຊີວິດຈາກອຸບັດເຫດ.

-----------------
ຂ່າວ: ປກສ, ຮູບພາບ: ໜັງສືພິມເສດຖະກິດ-ສັງຄົມ

แชร์