ຫົວພັນຄຶກຄັກ ມວນຊົນແຫ່ຊົມດອກຄາຍກາງອາກາດໜາວ

ດອກຄາຍປ່າຖືເປັນສີສັນໃໝ່ຂອງການທ່ອງທ່ຽວພາຍໃນແຂວງຫົວພັນໄລຍະນີ້ໂດຍສະເພາະຊ່ວງທ້າຍອາທິດຜ່ານມາ,ມວນຊົນພາຍໃນ ແລະຕ່າງແຂວງລ້ວນໃຫ້ຄວາມສົນໃຈມາທ່ຽວຊົມ ແລະຖ່າຍຮູບອວດເອ້ຄວາມງົດງາມຂອງດອກໄມ້ເມືອງໜາວຊຶ່ງຂະແໜງທ່ອງທ່ຽວພະແນກ ຖວທ ແຂວງຫົວພັນກໍໃຫ້ຄວາມສຳຄັນຕໍ່ບັນຫານີ້.


   ດອກຄາຍປ່າເປັນຕົ້ນໄມ້ເມືອງໜາວ, ຫາພົບໄດ້ງ່າຍຕາມທຳມະຊາດໃນພາກເໜືອຂອງລາວເລີ່ມອອກດອກແຕ່ທ້າຍເດືອນທັນວາຫາທ້າຍເດືອນມັງກອນຂອງທຸກໆປີ, ດອກມີສີສັນງົດງາມຄ້າຍດອກຄາຍບ້ານ, ມີໝາກນ້ອຍ ແລະມີລົດຂົມ. ສະເພາະຢູ່ແຂວງຫົວພັນ, ການປູກດອກຄາຍປ່າໄດ້ມີແນວຄິດເລີ່ມ ແລະປູກລຽບຕາມສາຍທາງຫຼວງ, ຕົວເມືອງຕ່າງໆມາແຕ່ປີ 2008 ພາຍໃຕ້ການຊີ້ນຳຂອງທ່ານ ດຣ ພັນຄຳ ວິພາວັນ ຮອງປະທານປະເທດ ສປປ ລາວ ໃນໄລຍະທີ່ທ່ານດຳລົງຕຳແໜ່ງເປັນເຈົ້າແຂວງໆຫົວພັນ ແລະໄດ້ມີການຂະຫຍາຍ,ບົວລະບັດຮັກສາຕະຫຼອດມາ. ໃນທີ່ສຸດ, ໄດ້ຮັບກະແສນິຍົມຈາກສັງຄົມ ແລະນັກທ່ອງທ່ຽວພາຍໃນ-ຕ່າງປະເທດໃນໄລ ຍະ 2-3 ປີ ກ່ອນໜ້ານີ້.

  ທ່ານ ນາງ ກ່ອງມະນີລາ ບົວທາວົງ ຮອງຫົວໜ້າຂະແໜງທ່ອງທ່ຽວພະແນກ ຖວທ ແຂວງຫົວພັນໃຫ້ຮູ້ວ່າ: ເພື່ອຕອບສະໜອງຄວາມຮຽກຮ້ອງຕ້ອງການທີ່ພວມເປັນກະແສຂອງສັງຄົມໃນການທ່ຽວຊົມດອກຄາຍປ່າໃນຊ່ວງໄລຍະ 3 ປີຜ່ານມາ. ໂດຍໄດ້ຮັບທິດຊີ້ນຳຈາກການນຳແຂວງ, ປີນີ້ແຂວງຫົວພັນຈະຈັດງານນິເທດສະການທ່ຽວຊົມດອກຄາຍບານຂຶ້ນຢູ່ເທສະບານເມືອງຊຳເໜືອໃນວັນທີ 11-12 ມັງກອນ 2020 ນີ້ຊຶ່ງກິດຈະກຳຈະປະກອບດ້ວຍງານປະກວດນາງສາວງາມດອກຄາຍ,ທ່ຽວຊົມດອກຄາຍປ່າຢູ່ເມືອງຊຳເໜືອ, ທ່ຽວຊົມສວນຊາກຸຣະຢູ່ເມືອງວຽງໄຊ ແລະກິດຈະກຳອື່ນໆຊຶ່ງຂະແໜງການທ່ອງທ່ຽວໄດ້ຈັດສັນສະຖານທີ່ຮອງຮັບເອົາໄວ້ແລ້ວໂດຍ

ເລືອກເພັ້ນເອົາບ່ອນທີ່ມີດອກຄາຍປ່າເບັ່ງບານຫຼາຍຕົ້ນ ແລະງົດງາມທີ່ສຸດເປັນຈຸດສູນລວມເປັນຕົ້ນແມ່ນຈຸດບ້ານຫ້ວຍອວງຫ່າງຈາກເທສະບານເມືອງຊຳເໜືອປະມານ 8 ກິໂລແມັດ ຊຶ່ງເປັນຈຸດທີ່ນັກທ່ອງທ່ຽວໃຫ້ຄວາມສົນໃຈ ແລະ ນິຍົມມາທ່ຽວຊົມເພາະເປັນຈຸດທີ່ມີດອກຄາຍປ່າເບີກບານຫຼາຍຕົ້ນລຽນກັນ ແລະ ມີມູມຖ່າຍຮູບທີ່ງົດ ງາມ. ສະນັ້ນ, ຂະແໜງການທ່ອງທ່ຽວໄດ້ບູລະນະດ້ວຍການສ້າງບັນດາກິດຈະກຳປິ່ນອ້ອມເປັນຕົ້ນແມ່ນສ້າງຈຸດຖ່າຍຮູບ ແລະສ້າງສິ່ງອຳນວຍຄວາມສະດວກຕ່າງໆເພື່ອຮອງຮັບນັກທ່ອງທ່ຽວມາທ່ຽວຊົມ.


   ທ່ານຍັງໃຫ້ຮູ້ຕື່ມອີກວ່າ: ນອກຈາກທ່ຽວຊົມດອກຄາຍປ່າທີ່ເປັນຈຸດເດັ່ນແລ້ວ, ພາຍໃນແຂວງຫົວພັນຍັງມີແຫຼ່ງທ່ອງທ່ຽວທຳມະຊາດ,ວັດທະນະທຳ ແລະ ປະຫວັດ ສາດຫຼາຍຈຸດທີ່ເໝາະສົມໃນການທ່ຽວຊົມໃນຊ່ວງລະດູໜາວແນວນີ້ເປັນຕົ້ນແມ່ນ: ແຫຼງທ່ອງທ່ຽວປະຫວັດສາດ-ທຳມະຊາດພູຜາຖີ່,ເຂດປະຫວັດສາດເມືອງວຽງໄຊ, ສວນຊາກຸຣະມິດຕະພາບ ລາວ-ຍີ່ປຸ່ນ ທີ່ເມືອງວຽງໄຊ ແລະບ່ອນອື່ນໆຕື່ມອີກ.


  ໂອກາດນີ້,ທ່ານຮອງຫົວໜ້າຂະແໜງທ່ອງທ່ຽວຍັງໄດ້ເຊີນຊວນທ່ານແຂກທັງພາຍໃນ ແລະຕ່າງປະເທດພ້ອມກັນມາທ່ຽວຊົມດອກຄາຍປ່າດ້ວຍຄວາມເພີດເພີນ,ເບີກ ບານ, ມ່ວນຊື່ນພ້ອມກັນເປັນເຈົ້າການຮັກສາສິ່ງແວດລ້ອມ ແລະກົດລະບຽບຂອງສະຖານທີ່ທ່ອງທ່ຽວ.

--------------

ຂ່າວ: ໄອແກ້ວ, ຮູບພາບ: ໜັງສືພິມເສດຖະກິດ-ສັງຄົມ

แชร์