ສຳເລັດຍົກລະດັບການຄຸ້ມຄອງວຽກວິທະຍາສາດ ແລະເຕັກໂນໂລຊີ

 ພິທີປິດຊຸດຝຶກອົບຮົມການຄຸ້ມຄອງວຽກງານວິທະຍາສາດ ແລະເຕັກໂນໂລຊີສຳລັບຕຳແໜ່ງບໍລິຫານລະດັບກາງ (ປະເພດ 4) ໄດ້ຈັດຂຶ້ນໃນວັນທີ 29 ທັນວາ 2020 ທີ່ສະຖາບັນການຄຸ້ມຄອງວິທະຍາສາດ ແລະເຕັກໂນໂລຊີໂດຍໃຫ້ກຽດເຂົ້າຮ່ວມຂອງທ່ານ ຫຸມພັນ ອິນທະຣາດ ຮອງລັດຖະມົນຕີກະຊວງວິທະຍາສາດ ແລະເຕັກໂນໂລຊີ, ມີບັນດາຫົວໜ້າກົມ, ສະຖາບັນພາຍໃນກະຊວງເຂົ້າຮ່ວມ.
    ທ່ານນາງ ໂສດາ ລາຊະສິມມາ ຮອງຫົວໜ້າສະຖາບັນການຄຸ້ມຄອງວິທະຍາສາດ ແລະເຕັກໂນໂລຊີໄດ້ຜ່ານບົດສະຫຼຸບການຝຶກອົບຮົມວ່າ: ການຝຶກອົບຮົມໃຫ້ຕຳ ແໜ່ງບໍລິຫານລະດັບກາງຫຼັກສູດ 35 ຊົ່ວໂມງ ໄດ້ແບ່ງອອກເປັນ 2 ຊຸດຄື: ຊຸດໜຶ່ງແມ່ນໃນລະຫວ່າງວັນທີ 14-18 ທັນວາ 2020 ແມ່ນຝຶກອົບຮົມກ່ຽວກັບການຄຸ້ມຄອງວຽກງານວິທະຍາສາດ ແລະເຕັກໂນໂລຊີສຳລັບຕຳແໜ່ງບໍລິຫານລະດັບກາງ (ປະເພດ4) ຊຶ່ງຜູ້ ເຂົ້າຮ່ວມຝຶກອົບຮົມດັ່ງກ່າວແມ່ນຂັ້ນຫົວໜ້າພະແນກ, ສູນ, ພາຍໃນຫ້ອງການ,ກົມ ແລະສະຖາບັນໃນ ກວຕ ມີຜູ້ເຂົ້າຮ່ວມ 41 ທ່ານ,ຍິງ 13 ທ່ານ ແລະຊຸດສອງໃນລະຫວ່າງວັນທີ 23-28 ທັນວາ 2020 ແມ່ນຝຶກກ່ຽວກັບການຄຸ້ມຄອງວິທະຍາສາດ ແລະ ເຕັກໂນໂລຊີສຳລັບຕຳແໜ່ງບໍລິຫານລະດັບກາງຂັ້ນແຂວງ ແລະ ນະຄອນຫຼວງວຽງຈັນ ຊຶ່ງມີນັກສຳມະນາກອນຂັ້ນຮອງຫົວໜ້າພະ ແນກ ແລະຫົວໜ້າຫ້ອງການບໍລິຫານແຂວງ ແລະນະຄອນຫຼວງວຽງຈັນມີຜູ້ເຂົ້າຮ່ວມຈຳນວນ 37 ທ່ານ, ຍິງ 3 ທ່ານ.
   ນັກສຳມະນາກອນທັງສອງຊຸດນີ້ແມ່ນໄດ້ຮຽນຮູ້ກ່ຽວກັບການຄຸ້ມຄອງລັດກ່ຽວກັບວຽກງານຊັບສິນທາງປັນຍາ; ການຄຸ້ມຄອງວຽກງານແຜນການວິທະຍາສາດ ແລະ ເຕັກໂນໂລຊີ; ຂັ້ນຕອນ ແລະວິທີການການເຂົ້າເຖິງກອງທຶນພັດທະນາວິທະຍາສາດ ແລະເຕັກໂນໂລຊີ; ການຄຸ້ມຄອງລັດກ່ຽວກັບວຽກງານເຕັກໂນໂລຊີ ແລະນະວັດຕະ ກຳ; ການຄຸ້ມຄອງຊັບພະຍາກອນມະນຸດໃນຂະແໜງການວິທະຍາສາດ ແລະເຕັກໂນໂລຊີ; ການຄຸ້ມຄອງລັດກ່ຽວກັບວຽກງານເຕັກໂນໂລຊີດີຈີຕອລ; ການຄຸ້ມຄອງລັດ ກ່ຽວກັບວຽກງານເຕັກໂນໂລຊີມາດຕະຖານ ແລະວັດແທກ; ການຄຸ້ມຄອງລັດຕໍ່ກັບວຽກງານວິທະຍາສາດ, ເຕັກໂນໂລຊີ ແລະຄວາມປອດໄພດ້ານລັງສີ-ນີວເຄຼຍ; ວຽກ ງານການຄົ້ນຄວ້ານິເວດວິທະຍາ ແລະເຕັກໂນໂລຊີຊີວະພາບ; ວຽກງານການຄົ້ນຄວ້າພະລັງງານທົດແທນ ແລະວັດສະດຸໃໝ່; ວຽກງານການຄົ້ນຄວ້າເຕັກໂນໂລຊີຄອມ ພິວເຕີ ແລະເອເລັກໂຕຼນິກ; ການຮ່າງເອກະສານທາງລັດຖະການ; ການຮຽນຮູ້ການເປັນຜູ້ນຳຊຶ່ງເປັນສ້າງທັກສະນະໃນການນຳພາວຽກງານໃຫ້ໜັກແໜ້ນ, ທັງເປັນການຍົກລະດັບຄວາມຮູ້ຄວາມສາມາດໃນການຊີ້ນຳ-ນຳພາ ແລະ ສາມາດຈັດຕັ້ງປະຕິບັດໜ້າທີ່ວຽກງານທີ່ໄດ້ຮັບມອບໝາຍແນໃສ່ເຮັດໃຫ້ໄດ້ຮຽນຮູ້ ແລະ ເພີ່ມຄວາມ ເຂົ້າໃຈດ້ານທິດສະດີ, ຫຼັກການ ແລະແຜນພັດທະນາກ່ຽວກັບວຽກງານການຄຸ້ມຄອງວິທະຍາສາດ ແລະເຕັກໂນໂລຊີໃຫ້ມີປະສິດທິພາບສູງຂຶ້ນ.
 ຈຸດປະສົງຂອງການຝຶກອົບຮົມແມ່ນເປັນການເປີດໂອກາດໃຫ້ສູນກາງ ແລະທ້ອງຖິ່ນໄດ້ພົບປະແລກປ່ຽນຂໍ້ມູນຂ່າວສານ, ສະພາບຄວາມຈຳເປັນ ແລະ ຄວາມຕ້ອງການສິ່ງຕ່າງໆຂອງທ້ອງຖິ່ນເພື່ອນຳເອົາຄວາມຮູ້, ບົດຮຽນກໍຄື: ແນວຄວາມຄິດທິດທາງການສົ່ງເສີມ, ຄຸ້ມຄອງ ແລະການພັດທະນານຳໃຊ້ວິທະຍາສາດ ແລະ ເຕັກໂນໂລຊີ ຈາກການຝຶກອົບຮົມໃນກອງປະຊຸມຄັ້ງນີ້ນຳໄປໝູນໃຊ້ໃຫ້ໄດ້ປະໂຫຍດສູງສຸດເພື່ອສ້າງຜົນງານໃນການຊຸກຍູ້ການຜະລິດຂອງສັງຄົມໃຫ້ຫຼາຍຂຶ້ນ, ທັງໄດ້ຮັບຜົນດີ ແລະພັດທະນາຂະແໜງການວິທະຍາສາດ ແລະເຕັກໂນໂລຊີ ໃຫ້ບັນລຸຜົນສຳເລັດຕາມຈຸດປະສົງ ແລະເປົ້າໝາຍທີ່ກຳນົດໄວ້.

แชร์