ລາວ ຮັບເຄື່ອງຊ່ວຍເຫຼືອຈາກບໍລິສັດແຟຊັ່ນ

 ວັນທີ 30 ທັນວາ 2020 ທີ່ສະຖານເອກອັກຄະລັດຖະທູດແຫ່ງ ສປປ ລາວ ປະຈຳ ສສ ຫວຽດນາມ ໄດ້ມີພິທີມອບ-ຮັບເຄື່ອງຊ່ວຍເຫຼືອຈາກບໍລິສັດແຟຊັ່ນ ELISE ຈຳກັດ, ຫວຽດນາມມອບໃຫ້ປະຊາຊົນລາວຜູ້ທີ່ຈໍາເປັນຢູ່ເຂດຊົນນະບົດກ່າວມອບໂດຍແມ່ນ ທ່ານ ນາງ ຫງວຽນ ກຸກ ແອງ, ຜູ້ອຳນວຍການບໍລິສັດແຟຊັ້ນ ELISE ຈຳກັດ, ຫວຽດນາມ ແລະກ່າວຮັບໂດຍແມ່ນທ່ານ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສສ ຫວຽດນາມ ໂດຍການເຂົ້າຮ່ວມເປັນສັກຂີພິຍານຂອງພະນັກງານທັງສອງຝ່າຍ.

ເຄື່ອງທີ່ນຳມາມອບຄັ້ງນີ້ແມ່ນເຄື່ອງນຸ່ງສໍາລັບແມ່ຍິງອາຍຸປະມານ 20-45 ປີ (7.909 ຊຸດ) ແລະເຄື່ອງນຸ່ງເດັກນ້ອຍ (2.322 ຊຸດ) ເປັນເຄື່ອງໃໝ່ຍີ່ຫໍ້ ELISE ຈຳນວນ 10.231 ຊຸດລວມມູນຄ່າທັງໝົດ 7,6 ຕື້ດົ່ງ ປະມານ 327,587 ໂດລາສະຫະລັດ ເພື່ອເປັນສ່ວນໜຶ່ງໃນການປະກອບສ່ວນເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງລາວ-ຫວຽດນາມ, ພິເສດແມ່ນເພື່ອຮັດແໜ້ນຄວາມສາມັກຄີຖານສະຫາຍອ້າຍນ້ອງລະຫວ່າງປະຊາຊົນສອງຊາດລາວ-ຫວຽດນາມໃຫ້ນັບມື້ແໜ້ນແຟ້ນ.

  ໃນໂອກາດກ່າວຮັບເຄື່ອງຊ່ວຍເຫຼືອດັ່ງກ່າວ ທ່ານ ແສງເພັດ ຮຸ່ງບຸນຍວງ ໄດ້ສະແດງຄວາມຮູ້ບຸນຄຸນ ແລະຂອບອົກຂອບໃຈຢ່າງຈິງໃຈມາຍັງອຳນວຍການບໍລິສັດແຟຊັ່ນ ELISE ຈຳກັດ, ຫວຽດນາມ ທີ່ມອບເຄື່ອງຊ່ວຍເຫຼືອດັ່ງກ່າວນີ້ໃຫ້ແກ່ ສປປ ລາວ ແລະ ຍັງໄດ້ຢືນຢັນວ່າເຄື່ອງຈຳນວນທີ່ໄດ້ຮັບການຊ່ວຍເຫຼືອນີ້ທາງສະຖານທູດຈະຈັດສົ່ງໃຫ້ພາກສ່ວນທີ່ກ່ຽວຂ້ອງຂອງ ສປປ ລາວ ເພື່ອນໍາໄປມອບຕໍ່ໃຫ້ເຖິງມືຂອງປະຊາຊົນລາວຜູ້ທີ່ຈໍາເປັນຢູ່ເຂດຊົນນະບົດຢ່າງທົ່ວເຖິງ ແລະທັນເວລາ.

แชร์