ກອງປະຊຸມສະໄໝສາມັນ ເທື່ອທີ 10 ສພຂ ໄຊຍະບູລີ ຮັບຮອງຫຼາຍບັນຫາ

 ກອງປະຊຸມສະໄໝສາມັນເທື່ອທີ 10 ສະພາປະຊາຊົນແຂວງໄຊຍະບູລີ ຊຸດທີ I ໄດ້ສໍາເລັດລົງໃນວັນທີ 31 ທັນວາ 2020 ພາຍຫຼັງທີ່ໄດ້ດໍາເນີນມາເປັນເວລາ 3 ວັນ ທີ່ຫໍປະຊຸມໃຫຍ່ຂອງແຂວງໂດຍການເປັນປະທານຂອງ ທ່ານ ສົມລິດ ເປືອກແກ້ວ ປະທານສະພາປະຊາຊົນແຂວງ, ໃຫ້ກຽດເຂົ້າຮ່ວມກອງປະຊຸມຄັ້ງນີ້ມີ ທ່ານ ພົງສະ ຫວັນ ສິດທະວົງ ເຈົ້າແຂວງໄຊຍະບູລີ, ມີຄະນະປະຈໍາພັກແຂວງ, ກໍາມະການພັກແຂວງ, ສະມາຊິກສະພາແຫ່ງຊາດປະຈໍາ ເຂດເລືອກຕັ້ງທີ 7, ອາດີດການນໍາຂອງແຂວງ, ອາດີດສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ,ນັກປະຕິວັດອາວຸໂສ-ບໍານານ, ຜູ້ຊົງຄຸນວຸດທິ,ຕາງໜ້າອົງການຈັດຕັ້ງພັກ-ລັດ, ອົງການຈັດຕັ້ງແນວລາວສ້າງຊາດ, ອົງການຈັດຕັ້ງມະຫາຊົນ, ນັກທຸລະກິດ ແລະຜູ້ປະກອບການ.


 ໃນກອງປະຊຸມໄດ້ສຸມໃສ່,ພິຈາລະນາ ແລະຮັບຮອງເອົາບັນຫາສໍາຄັນຂອງທ້ອງຖິ່ນເຊັ່ນ: ຮັບຟັງບົດລາຍງານໂດຍສັງເຂບຂອງທ່ານເຈົ້າແຂວງກ່ຽວກັບການຈັດຕັ້ງປະຕິ ບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂອງແຂວງປະຈໍາປີ 2020 ແລະ ທິດທາງແຜນການປະຈໍາປີ 2021; ຮັບຟັງການລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ (2016-2020) ແລະທິດທາງແຜນການ 5 ປີ(2020-2025);ຮັບຟັງການລາຍງານກ່ຽວກັບຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງປະຈໍາປີ 2019 ແລະການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2020 ແລະ ທິດທາງແຜນການປະຈໍາປີ 2021; ຮັບຟັງການລາຍງານກ່ຽວກັບການກວດກາຕາມຜົນການກວດສອບສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງປະຈໍາປີ 2018 ແລະ ສະຫຼຸບວຽກງານການກວດກາລັດຕາມຜົນການກວດສອບປະຈໍາ 5 ປີ (2016-2020) ແລະທິດທາງແຜນການ ປະຈໍາປີ 2021; ຮັບຟັງການລາຍງານກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2020, ທິດທາງແຜນການເຄື່ອນໄຫວວຽກງານປະຈໍາປີ 2021 ແລະການຈັດຕັ້ງປະຕິບັດວຽກງານ 5 ປີ (2016-2020),(ຮ່າງ)ທິດທາງແຜນການ 5 ປີ (2021- 2025) ຂອງອົງການໄອຍະການປະຊາຊົນແຂວງ; ຮັບຟັງການລາຍງານກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2020, ທິດທາງແຜນການເຄື່ອນໄຫວວຽກງານປະຈໍາປີ 2021 ແລະການຈັດຕັ້ງປະຕິບັດວຽກງານ 5 ປີ (2016-2020), (ຮ່າງ) ທິດທາງແຜນການ 5 ປີ (2021-2025) ຂອງສານປະຊາຊົນແຂວງ; ຮັບຟັງບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານ 5 ປີ (2016-2020) ແລະປະຈໍາປີ 2020 ຂອງສະພາປະຊາຊົນແຂວງຊຸດທີ I, ຄາດຄະເນແຜນການປະຈໍາປີ 2021; ຮັບຟັງການປະກອບຄໍາເຫັນຂອງຕາງໜ້າແນວລາວສ້າງຊາດແຂວງຕໍ່ການເຄື່ອນໄຫວວຽກງານຂອງສະພາປະຊາຊົນແຂວງ; ພິຈາລະນາຮັບຮອງເອົາ 5 ຮ່າງມະຕິຂອງກອງປະຊຸມສະໄໝສາມັນເທື່ອທີ 10 ຂອງສະພາປະຊາຊົນແຂວງ ຊຸດທີ I; ພິຈາລະນາຮັບຮອງເອົາຮ່າງນິຕິກໍາໃຕ້ກົດໝາຍ 2 ສະບັບຄື: ຮ່າງແຜນຈັດສັນທີ່ດິນ, ຄຸ້ມ ຄອງຊັບພະຍາກອນທໍາມະຊາດ ແລະສິ່ງແວດລ້ອມແບບຮອບດ້ານຂອງແຂວງໄຊຍະບູລີ ແລະຂໍ້ຕົກລົງຂອງທ່ານເຈົ້າແຂວງວ່າດ້ວຍການກໍານົດປະເມີນລາຄາທີ່ດິນ ແລະສິ່ງປຸກສ້າງແຂວງໄຊຍະບູລີ.

  ນອກນີ້ກອງປະຊຸມຍັງໄດ້ວິເຄາະວິໄຈຕໍ່ບັນດາຈຸດອ່ອນ, ຂໍ້ຄົງຄ້າງພ້ອມທັງສະເໜີຫຼາຍມາດຕະການທີ່ເປັນຮູບປະທໍາ ແລະທາດແທ້ຕົວຈິງເພື່ອແກ້ໄຂສະພາບຄວາມຫຍຸ້ງຍາກທາງດ້ານເສດຖະກິດ, ການເງິນ, ການຜະລິດຂອງທຸລະກິດ, ການແກ້ໄຂຜົນການກວດສອບ, ຜົນການກວດກາຕາມຜົນການກວດສອບ ແລະແກ້ໄຂປາກົດ ການຫຍໍ້ທໍ້ຢູ່ໃນແຕ່ລະຂົງເຂດວຽກງານໃຫ້ມີຄຸນນະພາບ ແລະຫັນປ່ຽນຢ່າງຕັ້ງໜ້າດ້ວຍບັນດານະໂຍບາຍມາດຕະການທີ່ບຸກທະລຸຢ່າງແຂງແຮງແທດກັບຕົວຈິງຫຼາຍຂຶ້ນກວ່າເກົ່າ, ແນໃສ່ກະຕຸ້ນເສດຖະກິດ-ສັງຄົມ ເພື່ອພັດທະນາແຂວງໃຫ້ມີການຂະຫຍາຍຕົວຢ່າງຕໍ່ເນື່ອງ ແລະເປັນຮູບປະທໍາ.

--------------

ຂ່າວ: ບຸນທີ

ຮູບພາບ: ໜັງສືພິມເສດຖະກິດ-ສັງຄົມ

แชร์